Hamlet. 
Nick Nicholas (nsn@speech.language.unimelb.edu.au, verse) 
& Andrew Strader (dls9@aol.com, prose). 
Work in progress. 
Copyright (c) 1995 KLI.  

Qo'noS ta'puq, *Hamlet* lotlut.

lutvaD ghotvam luDalu'.

*tlhaw'DIyuS*; Qo'noS ta' ghaH
*Hamlet*; ben ta' puqloD; DaHjaj ta' loDnI'puqloD je ghaH
*polonyuS*; Qang ghaH
*Horey'So*; *Hamlet* jup ghaH
*layerteS*; *polonyuS* puqloD ghaH
*voltImaD*
*qornelyuS*
*roSenQatlh*; toy'wI'pu' chaH
*ghIlDeSten*
*'oSrIq*
wa' qaH
wa' lalDan'utlh
*marSe'luS*; 'utlh chaH.
*bernarDo*
*veranchISqo*; mang ghaH
*reynalDo*; *polonyuS* toy'wI' ghaH
vagh DawI'pu'
cha' tlhaQwI'; molwI' Da
*vortIbraS*; *DuraS* qorDu''a' pIn be'nI'puqloD ghaH
wa' HoD
tera' Duypu'
wa' jaw
wa' mang
cha' QumwI'
*Horey'So* wa' toy'wI'
QonoSnganpu'
*Hamlet* vav lomqa'

*ghertlhuD*; Qo'noS ta'be', *Hamlet* SoS je ghaH
*'ovelya*; *polonyuS* puqbe' ghaH
jawloDpu', jawbe'pu' je, 'utlhpu' je, mangpu' je, yo'mangpu' je, toy'wI'pu' 
latlh je; jatlhbe' chaH
lut Daq: QonoS

lut 'ay' wa'
lut 'ay'Hom wa'
*tlhIn*. ta'qach'a' 'et 'avwI'Daq jen.

['avtaH *veranchISqo*. ghaHDaq 'el *bernarDo*]

ber: chol 'Iv?

ver: Qo', jIH HIjang. yIQamchoH 'ej yIngu'egh.

ber: taHjaj wo'!

ver: *bernarDo*?

ber: jIHbej.

ver: bImatlhba', qarqu'mo' bIcholmeH poHlIj.

ber: qaSpu' ramjep. QongDaq yIghoS, *veranchISqo*.

ver: qatlho'bej, Qu'wIjvo' choSonmo'. bIrqu'.
'ej roplaw' tIqwIj.

ber: bI'avtaHvIS jot'a'?

ver:                     vIHbe' je ghew.

ber: vaj maj. Qapla'.
*Horey'So* quv, *marSe'luS* je Daghomchugh ---
jI'avtaHvIS qochma' chaH --- vaj tImoDmoH.

ver: SuH, chaH vIQoylaw'. 'eH, yIQam! chol 'Iv?

['el *Horey'So*, *marSe'luS* je]

Hor: qo'vam juppu'.

mar:                Qo'noS pIn'a' lobwI' je.

ver: tlhIHvaD Qapla'.

mar:                  Qapla', SuvwI' yuDHa'.
DuSonta' 'Iv?

ver:          Qu'vaD mucho' *bernarDo*.
Qapla'.
[mej]

mar:    SuH! SuH! *bernarDo*!

ber:                          toH, yIja':
SaH'a' *Horey'So*?

Hor:               SaHlaw' 'ay'Daj neH.

ber: nuqneH, *Horey'So* QaQ. nuqneH, *marSe'luS*.

Hor: qaStaHvIS ramvam, narghqa''a' HoSDo'Hey?

ber: paghna' vIleghpu'.

mar: "Sunaj neH" ja' *Horey'So*. ghaH jon qechvetlh
'e' botqu' je ghaH, qa'Hey Dojqu''e'
cha'logh wIleghpu'bogh Harbe'taHvIS.
naDev vaj ramvam tupmey bejlI'meH,
vItlhejmoHpu'. vaj cholqa'chugh HoSDo'Hey,
mInDu'maj 'ollaH ghaH, 'ej qa'vaD jatlhlaH.

Hor: wejpuH. narghbe'ba' bIH.

ber:                          toH, loQ yIba'.
'elbe'meH lutmaj, teS Surchem DarIHlaw'.
vaj bIH DIHIvqa'meH, wanI' wIleghbogh,
qaStaHvIS cha' ramjep, wIja'.

Hor:                          maba'.
'ej maHvaD ghu'vam ja'chu'jaj *bernarDo*.

ber: qaStaHvIS wa'Hu' ram,
lengDI' QuvHov poS yuQvetlh, 'ej, DaH SepDaq
wovmoHbogh, bochmeH ghoSpu'DI' lengwI'; 
naDev ma'avtaHvIS *marSe'luS* jIH je,
ghumDI' rep wa' ---

['el lomqa']

mar: bIjatlh 'e' mev! peqIm! DaH cholqa' bIH!

ber: Heghpu'bogh ta'ma' rapmeH chenta' bIH.

Hor: HaDwI' SoH. bIHvaD vay' yIjatlh, *Horey'So*.

ber: ta' rurqu' bIH, qar'a'? yIqIm, *Horey'So*.

Hor: rurqu'bej bIH. mumerqu' 'ej mubItmoH.

ber: bIHvaD jatlh vay' DaH neHlaw'.

mar:                                 'eH, *Horey'So*.
bIHvaD yIjatlh.

Hor: ram repvam, porghvetlh vIDqu' 'IH'e' je,
ben yItmeH lo'bogh Qo'noS ta' webHa'
wInolpu'bogh, boDoQta', HattaHvIS.
vaj nuq tlhIH jay'? ghuy'cha' Sara': pejatlh!

mar: bIH mawlu'law'.

ber:                 SuH! Haw'meH moDchoH bIH.

Hor: peloS! pejatlh! pejatlh! Sara': pejatlh!

[mej lomqa']

mar: DaH Haw'ta', 'ej jangQo'.

ber: nuqneH, *Horey'So*? DaH bIchIS. bIQomlaw'.
wa'Hu' manaj neH DaH 'e' DaHar'a'?
toH, vuDlIj nuq?

Hor: vI'Iprup jay': wanI'vam vIHarQo',
'olbe'chugh tu'chu'bogh 'ej vItbogh mInwIj.

mar: ta'ma' lurur, qar'a'?

Hor:                       bIrur'egh je!
*DuraS* pIn tlhIvqu' Hay'taHvIS je ghaH,
yoDSutvetlh'e' tuQ. qejmeH qabvetlh 'ang ghaH,
chuchDaq yoDDuj *qInSaya* qIpDI' je,
QeHtaHvIS ja'chuq. Hujqu'.

mar: qaStaHvIS ramjepna' tup qar, DaH wejlogh
vID 'ej nujuSpu' ghaH, ma'avtaHvIS.

Hor: qechwIj vIvangnISbogh vIwIvlaHbe'.
'ach nom jIwuqnISchugh jIqelchu'pa',
vaj wo'vaD qaS Qugh taQ 'e' pIHmoHlaw'.

mar: toH, DaH peba', 'ej ja'choHjaj SovwI':
qatlh wo' rewbe'pu', negh je vumnISmoH
yepbogh 'ej SaHnISqu'moHbogh ram Qu'vam,
qaSDI' ram Hoch? 'ej qaStaHvIS pem Hoch,
qatlh, chenmeH may'morgh, baS lutetmoHlu'?
qatlh, veS mIqta'mey je'meH, novvaD mechlu'?
'ej qatlh Duj chenmoHwI' lumuvmoHlu'?
pavqu'mo' Qu'chaj, chaHvaD Hatlaw' len.
DaH vummeH pemvaD jIjnIS je ramjep,
moDmo' Doy'wI'pu'. Hochvam vangnISlu',
qaSbeHmo' nuq? 'oH QIjlaH 'Iv?

Hor:                           SuH, jIH.
toH, joS lutlhuplu'bogh vIja'laH jIH.
wanI' DaSov: DaH maHvaD narghlaw'pu'bogh
ben ta'ma' Hay'meH qaDta' *DuraS* pIn,
*vortIbraS*, ghaH tungHa'mo' qeHbogh DujDaj.
'ej Hay'DI', *vortIbraS*vetlh tlhIvqu' HoH
ta' *Hamlet* yoHqu' --- yoHqu' ghaH, 'e' noH
mIchvam ngan Hoch. vaj ra'mo' may' mab'e'
lu'olchu'pu'bogh chutmey, batlh lurDech je,
yInDaj ghajHa'DI', SepmeyDaj Hoch'e'
nIteb ben charghbogh ghaH, ghajHa'nIS je,
'ej SuqnIS may' QapwI''e'. mabchajvaD
rapbogh Sep yoSmey SuDruppu' je ta'ma'.
'ej SuqmeH *vortIbraS*vaD yaHnIS bIH,
chaq lujchugh ta'. vaj ra'mo' may'chaj mab,
'ej poQmo' ghItlhvetlh chut lulajpu'bogh,
*Hamlet*vaD yaHnIS SepDaj'e'. toH, qaH:
*vortIbraS* Qup'e' tujmoHmo' 'ej tebmo'
lagh toDuj'e' wej qeqmoHchu'bogh poH,
yoSvamDaq yoSvetlhDaq je, Sepchaj veHDaq,
chutmey pabbe'taHbogh vIDwI' tlhoQ'e'
nom boSta'. Soj, jajHuch je SuqmeH chaH,
HuH Qu'vaD HuHchaj qu'moHta' QupwI'.
'ej Qu'chaj ra'bogh ghovchu' wo'maj qum:
raDmo' rojmabDaj, HoSmo' je mangghomDaj,
Sep'e' ghajHa'bogh vavDaj Suqqa' neHba'.
'ej qeqmeymaj meq potlh, ram Qu'maj mung je,
wo'majDaq moDbogh mISHey Hal je 'oHlaw'
wanI'vam'e'.

ber: toH 'oHba'. 'a ghaytan taQbe' wanI',
ma'avtaHvIS nucholDI' San HoSDo'Hey,
nuH qengtaHvIS. ta' rur, 'ej ben, DaHjaj je,
veS qeqvam meq ghaH ta'vetlh'e', qar'a'?

Hor: lam 'ay'Hom neH bIH. 'a yab mIn lunuQlaH.
tIQtaHvIS, chepbogh romuluS wo' quvDaq
poS molmey Hoch, loQ pumpa' *yulyuS* Dunqu'.
'ej chImchu'. romuluS vengHeDaq jawchoH
'ej jach lom'e' wej luqatHa'lu'bogh.
lIy tlha' chal qulmey tIqqu', SISbogh 'Iw je.
pemHovDaq qIj maQmIgh. 'ej Hov QIbmo'
ropmo' bIQ'a'mey wuvmoHbogh maS'e',
jaj Qav'e' maqlaw' 'oH. ben mIchmajvaD,
wo'maj nganpu'vaD je, wanI'mey qu'
nungwI'mey rap, San QeH pIHmoHtaHwI' je,
wa'leS lotna' lIHwI' je 'angpu' je
jIjchuqbogh chal, ngeHbej je ---
'a SuH! peqIm! DaH cholqa'!

['elqa' lomqa']

yIt 'e' vInISrup, tugh muSangchugh je.
loS, Dolqoq! QIch, ghoghlaH joq vay' Daghajchugh,
HIjatlh!
bIjotmeH SoH, 'ej naD vISuqmeH jIH,
Qu' vay' vIchav DaH 'e' DapoQqangchugh,
HIjatlh!
wo'maj nem Qugh DaSovchugh, vaj, SoHvo'
leSSov wISuqDI', Do' wIbotlaHchugh,
HIjatlh!
pagh, yavmaj chorDaq mIp DanIHta'bogh
DaboSta'DI' DaSo'chugh, HattaHvIS ---
'ej pIj wanI'vetlhmo' SuyItnIS, qa'pu',
SuHeghpu'DI' --- vaj HeS yIja'. [jach jajlo'ghogh Qa'] yIratlh!
yIja'! *marSe'luS*, yIt ghaH 'e' yImev!

mar: SuH, vIqIp'a'? betleHwIj vIlo''a'?

Hor: yevQo'chugh, vaj yIqIp.

ber:                         naDev!

Hor:                                naDev!

mar: loj rIntaH! [mej lomqa']
nurna' SuvwI' ghaH. vaj wImawpu'bej,
yolqoq wInIDmo': muD rur, rIQlaHbe'mo'.
wIqIpDI' 'ej malujDI', ghaH wIvaq neH.

ber: jatlhrup ghaH, jachDI' Qa'.

Hor:                             'ej jachDI' 'oH,
DIvwI' Da, yay'mo'. ghIjlaw' pIch jabbI'ID.
ghogh jenqu' HoSqu' lo'DI' jajlo' Qa''e',
povaD chuS'ughHey'e', reH vem pem qa'.
'ej ghumDI' 'oH, bIQ'a'Daq, qulDaq joq,
chalDaq joq, ghorvamDaq joq tu'lu'chugh je,
vaj tugh bIghHa'meychajDaq moDqu'nIS
lengbogh 'ej Hopbogh qa'pu'. 'e' vI'Ij.
'ej DaH 'e' toblaw' Dolvetlh.

mar: ngab, jachDI' jajlo' Qa'. 'ej ngoDvam ja'lu':
qaSbeHDI' QI'lop poH, yo' qIj mangpu''e'
DIquvmoHrupDI', jach po Ha'DIbaHvetlh
qaStaHvIS rammey naQ. 'ej jachtaHvIS,
ghorDaq lengQo' qa' Hoch net Har: ngIlbe' chaH.
pIvmoH ram muD. 'ej tar lIngbe'choH tI.
jonbe'nIS Sor HoSDo'. luj qa' SeHwI'pu';
quvqu'mo' poHvetlh potlh, 'ej Dunqu'mo'.

Hor: vIQoypu' je 'ej loQ vIHar. 'a SuH:
nIH HuDvetlh jen rambIQDaq yItlaw'taHvIS,
ngup Doq tuQ po. ma'avtaH 'e' wImev.
SaqeS je: *Hamlet* QupvaD Hoch wIleghbogh,
qaStaHvIS ram, wItey'. vI'Iprupbej:
*Hamlet*vaD jatlhrup maHvaD tambogh qa'.
ghaHvaD wISovmoH, vangmoHmo' wo' Qu'maj,
'ej 'utmoHmo' parHa'ghachmaj. Qoch'a'?

mar: wIruch, Satlhob. 'ej nuqDaq ghaH wItu',
qaStaHvIS povam, 'e' vISov. maghoS.

[mej chaH]

lut 'ay'Hom cha'
ta'qach'a' qumpa'.

['el *tlhaw'DIyuS*, *ghertlhuD*, *Hamlet*, *polonyuS*, *layerteS*,
*voltImaD*, *qornelyuS*, jawpu', toy'wI'pu' je]

t: Heghpu' loDnI'wI' vIparHa'bogh: *Hamlet*.
wej 'e' wIlIjmeH, ghu rur De'vam: Qupchu'.
'ej 'It tIqDu'maj, bIH DIDamoHmo',
'e' ra' lurDech. 'IQwI' wa' Huy' lughajmeH
tay'nIS 'ej gheghnIS wo'wIj ngan QuchDu'.
'ach tIqwIj Suvmo' rIntaH noHbogh yabwIj,
ta' vIqelmeH jI'IQba' 'ej jIvalba',
DotlhwIj vIqawmo' je. vaj ben be'nI'wI',
DaHjaj ta'be'nalwI' je, Qojbogh wo'vam
ta'cho'qoch je, --- jIQuch 'e' jeylu'law'DI',
HaghDI' wa' mIn, 'ej nIjDI' wa' mIn latlh,
nolDaq jIloppu'DI', tlhoghDaq jISaQDI',
Dotlh Quch, Dotlh 'IQ je 'ay'mey rap vIlelDI' ---
vISawpu'. ghu'vamvaD SuqeSpu' je,
valwI'pu' quv, 'e' vIbotbe'. 'ej ghu'vaD
SughIbpu', SaraDbe'taHvIS. Satlho'.
DaH ghu' boSovchu'bogh wIqelnISchoH.
puj HoSmeywIj 'e' noHlaw' *vortIbraS*.
pagh, Heghpu'mo' loDnI'wI' vIparHa'bogh,
wo'Daq Dach Sun, matlhwI'pu' je 'e' Harlaw'.
'ej nIvchoH ghaH 'e' naj. ghaH DorDI' qechvam,
munuQbe'Qo' ghaH, jIHvaD QumtaHvIS.
loDnI'wI' yoHqu'vaD ben Sep Hoch'e'
jeghpu'bogh vavDaj, chaw'taHvIS chut Hoch ---
vIjeghnIS 'e' Del Hoch muQumpu'bogh.
wejpuH ta'meyvam chav. DaH qepvamDaq,
jIvangmeH jIH malja' wIbuSchoHjaj.
chay' Hech be'nI'puqDaj DaH wej 'e' Sovlaw'
*DuraS* pIn, *vortIbraS* Qup SoSloDnI',
reH ropmo' 'ej QongDaqDaq yIntaHmo'.
ghaHvaD jIQum. Sepmaj 'ay' latlh Dan nuvvetlh
'e' nISnIS ghaH. Sep latlhDaq muvmoH nuv
net tuchnIS, SepDaj yoSmeyvo' ngaqwI'pu', 
ghuvpu' je, negh je muvmoHpu'mo'. Hat.
'eH, *voltImaD*, *qornelyuS* je, pIn qanvaD
vanvam boqengmeH DaH SangeH. woQ'e'
lIchaw'nISbogh malja'vam neH Sanob.
Sumatlh --- SumoDmo' 'e' yI'ang. Qapla'.

qor, vol: mamoDmeH, 'ej latlh Hoch wIchavmeH, ta',
SoHvaD mamatlh chIch 'e' wI'angrupbej.

t: 'e' vIHonQo'. Qapla'! SIbI' pemej.

[mej *voltImaD* *qornelyuS* je]

toH, SuH! *layerteS*: SoHvo' chu' De' nuq?
chotlhobqang 'e' choja'. 'ut nuq, *layerteS*?
Qo'noS pIn'a'vaD Qu'lIj vay' DatlhobDI', 
jochbe'chugh Qu', vaj temlaHbe' pIn'a'.
toH, nuq DapoQqangchugh, *layerteS*oy,
vaj vIta'Qo' DapoQDI'? pagh, qar'a'?
wa' porgh lujeSchu'lI' qar'a' tIq, yab je.
'ej nujvaD toy'chu'lI' qar'a' ghop po'.
vaj Qo'noS ta'vaD toy'chu' je vavlI',
wo' qum wIjeStaHvIS. yIja', *layerteS*:
DaH nuq Daghajqang?

la:                  HajmoHbogh joHwI',
romuluSDaq jIchegh tugh 'e' yIchaw'neS.
SoHvaD jImatlh, bIche'choHDI' 'e' 'angmeH,
Hu' pa'vo' Qo'noSDaq jIghoSqangpu'.
'ach romuluS luqImqa' yabwIj, tIq je,
rInpu'DI' Qu'wIj; SoHvaD 'e' vIchID.
'ej chaw'lIjvaD yab, tIqwIj je vIqoy'moH.

t: 'ej vavDaj chaw' ghaj'a' ghaH? 'eH, *polonyuS*.

pol: QIt jIHvo' chaw'wIj ghajchoHta', joHwI',
mutlhobqu'lI'mo' ghaH 'ej nIDqu'mo'.
vaj rInDI' ghu'vam, mejmeH chaw' vInob
'e' chav 'ej naw'ta', QatlhtaHvIS je Qu'.
vaj joH, qatlhobqu'. mej ghaH 'e' yIchaw' je.

t: toH, poHlIj Qup yItIv, *layerteS*oy.
poHlIj yISeHtaH SoH. 'ej poH Dalo'meH
wIvlIj DaneHDI', Qochjaj pagh. DaH: *Hamlet* --- 
qorDu''a'ghotwI' quvqu', puqloDwI' je.

Ham: [pegh'egh] qorDu'Hom 'oH. 'ej puqvaD qorlu'law'.

t: qatlh qaStaHvIS poH'a', Sut qIj Dachoq?

Ham: ghobe'. quploD ghaHbe'law' puqloD'e'.
vaj pagh vIcho'laHlaw', joHwI'.

tb: luSpetHey Sut yIwoDta', *Hamlet* QaQ.
'ej Qo'noSta'vaD jup mInDu' tI'ang.
lamDaq vavlI' quv lom yInejtaHQo',
reH yav DabejtaHvIS. reH motlhqu' ghu',
reH 'e' DaSovbej. HeghnIS yInbogh Hoch.
'u'Daq ghomHa'nIS Hoch, 'ej 'u'vo' yaH.

Ham: HIja', joH. motlh.

tb:                     toH, motlh 'oH 'e' Dalajchugh,
vaj qatlh DabuSlaw'taH? qatlh reH bI'Itlaw'?

Ham: jI'Itlaw''a'? Qo', joH. jI'Itbej jIH.
"'Itlaw'"'e' vISovQo'. muDelchu'be'
wovHa'bogh wepwIj neH, SoS QaQ. ghobe'.
muDelchu'be' 'ItmeH lurDech Sut qIj,
tlhuH joq vIraDnISbogh vItlhovchoHDI',
mInwIjDaq lIngtaHbogh bIQtIqHey joq.
jI'IQmeH chen, qoj nargh, qoj 'ang'egh DotlhwIj,
'ach jIH muDelchu'be'. teH. 'Itlaw' Hochvam,
chIch reHmeH Hochvam DalaHmo' ghot vay'.
'ach vay' vIngaS, 'ej 'Itlaw'wI'mey jey 'oH.
'ej 'oH lu'ang 'ej Dor neH DotlhHey Sey, joH.

t: qa'lI' vInaDnIS 'ej "bImatlh" vIjatlhnIS,
vavlI'vaD 'ItmeH Qu' Davangmo', *Hamlet*.
'ach ben vavlI'vaD lojpu' vavDaj'e',
'ej lojbogh vavDajvaD loj vav. yItlhoj.
vaj 'ItmeH Qu''e' ra'bogh puq lurDech
lutoy'nIS yInmey, rInpa' poH nI'be'.
'ach multaHbogh Dotlh 'IQqu' qaplu'chugh,
vaj multaHmo' quvHa'qanglu'law' neH.
qoHvam DaQo' SuvwI'. lalDanvaD tlhIvqu'
'e' 'ang. boH yabvetlh. Hub'eghbe'law' tIqvetlh.
QIp Sovvetlh, 'ej DuSaQDaq SaHlaw'Qo'.
qaSnISbej ghu' wISovbogh. motlhqu'mo',
vay' qetlh'e' neH lutu'bogh nochmaj rur.
vaj qatlh, maDoghtaHvIS wIqeHtaHmo',
wISaHnIS maH? baQa'! lalDanvaD HeS 'oH.
Heghpu'wI'pu'vaD HeS 'oH. 'u'vaD HeS 'oH.
meqlaHvaD taQ 'oH. "HeghnIS vavpu'ra'",
reH maq meqlaH. 'ej Heghpu'DI' lom wa'DIch,
HeghDI' je wa'Hu' lom, reH jach meqlaH:
"qaSnISbej". Dotlhvam 'IQ lI'be' yIwoD;
qatlhob. 'ej SoHvaD vav jIH 'e' yIHarchoH.
'eH, qImjaj qo'. ta'cho'vaD wa'DIch SoH.
puqvaD muSHa'ghach quvqu' 'angqang vav.
SoHvaD muSHa'ghachvam vI'ang je jIH.
toH vulqanDaq DuSaQ Da'elqangqa'law'.
'ach neHtaHghachwIj Qochqu' nab Daja'bogh.
qatlhob: naDev yIratlhqangchoH. naDev
Dubejjaj Quchbogh, belqangmoHbogh mInwIj:
'utlhghomwIj la', qorDu'ghotwI', puqwI'.

tb: lujbe'jaj Qu''e' neHqu'bogh SoSlI'.
vulqanDaq yIghoSQo'. yIratlhneS, *Hamlet*.

Ham: SoSwI', jIloblaHtaHvIS, SoH qalobrup.

t: may 'ej muSHa'bej ghaH, nujangpu'mo'.
toH Qo'noSDaq bIratlhtaHvIS, HIDa.
reH 'e' vIchaw'. ta'be', yItlha'. jIQuchqu'.
QochQo'mo' *Hamlet*, raDlu'be'taHvIS,
batlh DataHvIS ghaH, jIHvaD HaghchoH tIqwIj.
vIlopchu'meH, DaHjaj HIq vay' vItlhutlhDI',
jIQuchqu' 'engvaD 'e' luja' bach'a'.
'ej tlhutlhtaH ta' 'e' Qoyqa'moHtaH chal,
'ej chuSlaw' ralbogh 'engmey. Ha'. maghoSjaj.

[mej *Hamlet* nopbogh Hoch'e']

Ham: va, tetjaj porghwIj lamqu' lamqu' lamqu'!
tugh ngoSjaj 'oH, 'ej ram SISwI' neH mojjaj!
pagh, HoH'egh wej quvHa'choHbogh SuvwI'
'e' chaw'jaj neH chaw'Qo'bogh batlh tIgh'e'!
QI'yaH! QI'yaH! va, jIHvaD Doy'law', raghlaw',
qetlh 'ej lI'be'law' qo' malja'mey Hoch!
baQa'! tI ghom neH ngejHa'be'lu'bogh 'oH.
pa' boghpu'DI' tIghu, DaH 'oH luDanchu'
pujchu'bogh neH 'ej moHbogh Dochmey'e'.
wejpuH qaS ghu'vam jay'! cha' jar neH lom ghaH!
ghobe', jIlachbej, "cha'" vIjatlhDI' je.
povpu' ben ta'. DaHjaj ta' qellu'chugh,
vaj yIH neH ghaH, 'ej qeylIS ghaH ben ta''e'.
SoSwI''e' ben muSHa'qu'mo', SoS qabDaq
vaQchoH chal SuS 'e' botmeH, SuSmey ra' ghaH.
Hu'tegh! jIqawnIS'a'? ghaH wuv SoSwI'.
qaStaHvIS ben. pa' SopDI', ghungqa'law'taH.
'ach qaSpu'DI' wa' jar neH! vIQubQo'jaj.
Qu'vatlh! pujchu'ghach: "be'" 'oH ponglIj'e'!
va, qaSpa' jar neH; Qoppa' waqvetlh'e',
vavwI' lom tlha'meH tuQpu'bogh ta'be'nal,
bIQHalHey DataHvIS, reH SaQtaHmo' ---
tugh, tugh vaj --- Qu'vatlh! 'ItmeH meqlaHbe'bogh
targh, poH nI' law', loSmeH ghaH poH nI' puS ---
tugh vavloDnI'wI' nay. vav rurchugh ghaH,
vaj bong ta' qeylIS Dun vIrurlaH je.
rInpa' wa' jar, va, 'oy'choHmeH mInDu'Daj
DoqchoHmoHpa' mInbIQDaj qutmey yuDqu' ---
naypu'. QI'yaH, qorDu'wem'a' QongDaqDaq
moDDI' chaH. chaHvaD ngeDqu'. mIghqu' Dochaj!
QaQbe'taH 'ej QaQchoHlaHbe'law' ghu'.
'ach tIq, yISIQ neH; tamnISlI'mo' jatwIj.

['el *Horey'So*, *bernarDo*, *marSe'luS* je]

Hor: nuqneH, joH quv!

Ham:                  jIQuch bIcheplaw'mo'.
*Horey'So*! toH, jIlIj'eghchoHruplaw' je!

Hor: jIHbej, joH QaQ. 'ej reH toy'wI'lI' jIHrup.

Ham: jupna'wI' SoH, qaH. pongvetlh matlh qamechqang.
qatlh vulqanvo' bIghIQchoHlaw', *Horey'So*?
*marSe'luS* SoH, qar'a'?

mar: joH quv ---

Ham: jIQuch qaleghmo' je. nuqneH, qaH yoH.
'a SuH! yIja': qatlh vulqanvo' bIchegh?

Hor: jIbuDqu'mo' jIHaDchoHQo', joH QaQ.

Ham: va, pumvetlh jatlhchugh je wa' gholna'lI',
vaj vIHarQo'. 'ej teSwIj yIngorQo',
Dupumbogh mu'lIj'e' DavoqmoHmo'.
bIbuDlaHbe'ba'. Ha' qatlh *tlhIn*Daq SoH? 
bItlhutlhqu' 'e' pIghojmoHlaw' bItlheDpa'.

Hor: joH, vavlI' nol vIbejneSmeH jIcholpu'.

Ham: DuSaQ tlhejwI'wI', HIvaqQo'. qatlhob.
va, SoSwI' tlhogh Dabejlaw'meH bIchol.

Hor: toH quqlaw' taymeyvetlh, joHwI'. jIchID.

Ham: vu'bejmeH! vu'bejmeH! yIqIm, *Horey'So*:
bIrDI' nol chabmey, tlhoghDaj vaSDaq jablu'.
QI'tu'Daq jIHtaHvIS, veqlargh vIleghchugh, 
vaj ghu' vImaSbej. tlhoghDaj jaj vIlegh,
not 'e' vImaS, *Horey'So*. va, vavwI' ---
vavwI' vIleghlaw'.

Hor:               nuqDaq?

Hom: va, yabwIj mInHeyDaq vIlegh, *Horey'So*.

Hor: wa'logh vIleghpu'. toH, ta' QaQqu' ghaHlaw'.

Ham: loDna' ghaH jay'. 'ej laHDaj Hoch vIqelDI',
vaj not ghaH rurbogh latlh vIleghqa'laH.

Hor: joH, wa'Hu' ram vIleghlaw'.

Ham:                             'Iv legh'a'?

Hor: ta'. vavlI'.

Ham:              ta'? vav? chay'!

Hor: bIyay' loQ 'e' yISeH, 'ej qImjaj teSlIj.
nutu'taHvIS cha' qaHvam, DaH nom SoHvaD
wanI'vam taQ vIja'.

Ham:                vI'Ijjaj jay'!

Hor: SuH: 'avmeH tay'taHvIS  cha' qaHvam yoH, 
*marSe'luS* qu', *bernarDo* je, 'ej qaSDI'
cha' ram ramjep, rep chImqu' je, luqIHlu'.
'etchajDaq nargh vavlI' quv rurbogh vay''e'.
porgh naQ yoDSutmey tuQmo', Suvruplaw' ghaH.
'ej QIt chaH juS ghaH, nurDaj leHtaHvIS,
'ej 'IQqu' gho'meH mIwDaj. wejlogh juSta',
bejtaHvIS mInchaj bItqu' merbogh ghaH.
'ej chuqDaj juvlaH Sa'naQDaj. 'ach qaSDI',
yay' chaH. vaj pugh lumojlaw' tetlaw'mo'.
vaj tam, 'ej Qam, 'ej ghaHvaD jatlhchoHQo'.
jIHvaD ghu' naQ lutey' chaH, HajtaHvIS.
'ej qaStaHvIS ram wejDIch, 'avDI' chaH,
vItlhej. 'ej qaSbej ghu' luja'pu'bogh.
pay' mu'meychaj lu'ollu' 'ej lutoblu'.
Dochvetlh'e' Hu' luDelbogh rurtaHvIS,
nuchol narghwI'. 'ej ghaH, vavlI' rur law',
ghopDu'wIj rurchuq puS.

Ham:                    'a nuqDaq qaS?

mar: joHwI', 'avwI'Daq jenDaq. pa' ma'avtaH.

Ham: 'ej ghaHvaD Sujatlhbe''a'?

Hor:                            joH, jIjatlhpu'.
'ach jangmeH pagh mujatlh. toH wa'logh chaq
nach jenmoH. vIHchoHmo', ghaytan vaj jatlhrup.
'ach qaSDI', jachqu'choH jajlo'ghogh Qa'.
'ej chuSDI', Haw'meH moD ghaH. maHvo' ngab.

Ham: Hujqu'.

Hor: jI'IpmeH, yIn vISuDrupneS, joH quv:
teHqu'. 'ej ghu' pIja', 'e' poQ vajQu'maj,
mamatlhmo' 'e' wIHar.

Ham: maj, maj, qaHpu'. 'a jIHvaD nub wanI'vam.
DaHjaj ramjep Su'avqa''a'?

mar, ber je:                      HIja'.

Ham: yoDSutmey tuQ, qar'a'?

mar, ber je:                       yoDSutmey, joH.

Ham: nachvo' qamDu'Daq?

mar, ber je:                   naQ, joH.

Ham:                               vaj nach'e'
boleghlaHbe'.

Hor:          wIlegh. mInyoDDaj teqpu'.

Ham: qej'a' mInDu'Daj?

Hor:                   nachDaj 'IQlaw' law', 
joH, 'oH QeH puS.

Ham:              chIS'a'? Doq'a'?

Hor:                               reH chISqu'.

Ham: 'ej tlhIHDaq mInDaj buSmoH'a'?

Hor:                                chIch buSqu'.

Ham: pa' jIHchugh neH!

Hor:                   bISaHchugh, vaj Dumerqu'.

Ham: ghaytan, ghaytan. nI''a' pa' ratlhmeH poHDaj?

Hor: QIt wa'vatlh toghlaH vay', pa' ratlhtaHvIS.
 
ber, mar je: nI'qu', nI'qu'.

Hor: vIleghDI', nI'qu'be'.

Ham:                       'ej chISchoH rolDaj,
qar'a'?

Hor:    yIntaHvIS rolDaj ghajbogh rurchu'.
qIj 'oH, 'ej 'oHDaq DanchoH ghItlhmey chIS.

Ham: qaStaHvIS ram, jI'av. chaq yItqa'.

Hom:                                    DIch.

Ham: vavwI' quv qab, mInDu' je ghajchugh ghaH,
vaj poSchoHchugh je ghe''or, 'ej jItammeH
mura'chugh je, vaj ram: ghaHvaD jIjatlh.
Hochra' Satlhob. wanI'vam taQ bopeghchugh,
qaSpa' DaHjaj, vaj wej 'oH lupeghHa'jaj
ghoghmeyraj tam. tugh qaSchugh ghu' latlh vay',
vaj vumjaj yabraj, 'a vumbe'jaj jatraj.
jupwI' boDataHmo', Savan. Qapla'.
qaSpa' rep wa'maHcha', 'avwI'DaqDaq
SaSuchbej. 

Hoch:      joH, mamatlhtaH 'ej pIvan.

Ham: Qo'. HIparHa'taH, SaparHa'mo' je.
Qapla'.

[mej *Hamlet* nopbogh Hoch'e']

Ham:    yoDSutmey tuQ vavwI' lomqa'!
qay' vay'. Hu' qaS wemna', DaH 'e' vIpIHchoH.
tugh SaHjaj ram. yIloSlI' SaHpa', tIqwIj.
reH ghot mInDu'vaD narghnIS Haw'bogh HeS.
bIH DItu'be'meH So'chugh je qIbHeS.

[mej]

lut 'ay'Hom wej
*polonyuS* juH pa'.

['el *layerteS*, *'ovelya* je]

la: toH, DujDaq tepwIj lanlu'. vaj Qapla'.
be'nI'wI', chaw'DI' romuluS neHmaH,
'ej boQDI' lengbogh Duj, vaj yIbuDQo',
'ej De'meylIj HISovmoH.

'ov:                    DaHon'a'?

la: *Hamlet* bangvI'Hey ram DaqeltaHvIS,
ngongna', 'IwQuj je neH 'oH 'e' yIHar.
DISbov Qup naH 'oH. 'eqqu' 'a taHQo'.
Doj 'a ratlhQo'. He' tup 'ej belmoH tup.
'a tugh loj Hoch.

'ov:               loj'a' neH?

la:                            'e' yIHar.
puqHom mojHa'lu'DI', HoSchoH Somraw, 
'ej tInchoH porgh. 'ach 'ItlhDI' Dotlhmaj Doj,
po'choH je yabmaj, qa' je laH Hoch'e'
So'taHbogh porgh. DaHjaj chaq DumuSHa'.
'ej HechtaHvIS yuDHa', DaH 'e' Sorghbe'laH
naDHa'ghach, tojrupghach je. 'ach yIyep:
patlh'a'Daj toy'nISmo' je toy'moHwI'vetlh,
vaj neHtaHghachDaj loblaHbe'bej ghaH. 
ghot ram Dabe'nISmo', nay' pe'laHbe' ghaH.
pIvmeH 'ej taHmeH wo'maj, wIvDaj wuvtaH
wo' naQ. vaj wIvDaj vuSnIS wo'porgh vuD,
Qochbe'ghach je, porgh nachHey Damo' ghaH.
toH SoHvaD jatlhchugh je: "bangna'wI' SoH",
vaj mu'Daj tob chav'e' neH ta'laHbogh
patlh DotlhDaj je wa' ghot. 'ej 'e' DapIHchugh,
vaj yonnIS yablIj. 'ej Do' mu'Daj tobmeH
lulajnIS Qo'noS che'bogh ghoghmey law''e'.
'ej bIquvHa'choHlaH, bomchaj Da'Ijchugh
bIvoqchu'taHvIS, pagh, ghaH toy'chugh tIqlIj,
pagh, boHmo' poQtaHvIS, SeH'eghtaHQo'vIS,
chIch ghaHvaD be'batlhlIj DapoSmoHchugh.
DuHvam yIqelchu'. 'ej yIyep, *'ovelya*.
yIyep, be'nI'oy. 'ej DuDevqangchugh
muSHa'ghachDaj, vaj 'o'DajDaq yIpol'egh.
neHtaHghach pu' chuqvo', Qobvo' je DoH!
'IHtaH be' yepqu', maSvaD neH 'e' 'angchugh, 
vaj ngIlqu' be'vetlh. HIvrupchugh pumHa'ghach
vaj junlaHbe' je batlh. tIghumey chu''e'
pIj ngejtaH gharghmey, narghpa' naHmeychaj.
'ej SIStaHvIS Dotlh Qup rambIQ, pobIQ je,
nom qaSnIS ngejbogh ropmey. vaj yIyep.
Qaghbe'meH vanglu'Qo'DI', toD'eghlu'.
lotlh'egh Dotlh Qup, wej buQtaHvIS je ghu'.

'ov: paQDI'norgh QaQ Damaqpu'bogh vIpolbej.
'ej tIqwIj 'avjaj. 'ach, loDnI'wI' QaQ,
ghobyaS puS yIDaQo': QI'tu' He Qatlhqu'
lu'ang, He buD qaDbe' lughoStaHvIS.
HemwI' SuDwI''a' je tlhIvwI' je Da chaH,
'ej qeSchaj qImrupbe'.

la:                    toH, HIpIHQo'.
jIratlhtaHqu'. 'a SuH, DaH chol vavwI'.

['el *polonyuS*]

la: cha'logh chonaDmo', cha'logh vaj jIDo'.
cha'logh mavanchuqmo', vaj Quchbej ghu'.

pol: *layerteS*, wej tlheD'a'? 'eH, tIj! tIj! wejpuH!
jonta'lIj laQchoHlu', 'ej SoH nIloStaH.
SuH. naD yISuq. 

[*layerteS* nachDaq ghopDaj lan] 
                
                'ej yabDaq qeSvam puS
yIghItlhchu'. jatlIj lulo'Qo'jaj qechlIj.
'ej ghu'lIj SujlaHlaw'chugh qechlIj vay',
vaj qechvam yIvangQo' je. yIqejHa',
'a jup DawIvtaHvIS, batlh yIQutQo' je.
jup Hoch Daghajbogh tobchugh ghu'mey poH je,
vaj qa'lI'Daq DabaghmeH mIr tIlo'.
'ach tachlIj SuchchoHbogh mIywI' vay''e'
DatIvmoHmeH Qopbe'jaj vanbogh tochlIj.
bISolnISbe'taHmeH yIyep. bISolDI',
yISuvchu'; SoHmo' yepchoHjaj ghollI'.
teSDu'lIj lo'jaj Hoch. 'a chIch ghot puSvaD
vuDghogh yI'lo'. yIqImqu', noHDI' vay' ---
yojlIj DapeghtaHvIS. chIch waghjaj SutlIj,
yapchugh HuchjolIj, 'ach taQQo'jaj bIH.
qutlhbe'jaj bIH, 'ach napjaj bIH: loD'e'
pIj Del Sut tuQbogh. 'ej SutSarmey noHDI'
po'qu'bej romuluS patlh ghot, chuQun je.
ngIpwI' nojwI' joq yIDaQo'. bInojDI',
pIj tugh loj Doch Danojpu'bogh, juplI' je;
bIngIptaHchugh, vaj vu'meH bIpo'Ha'choH.
potlhqu' wa' Qu''e'. SoHvaD yIyuDQo'.
ram tlha'ba' pem, qar'a'. vaj tlha' je ghu'vam:
ghot HochvaD bIyuDHa'nISmo', bIquvbej.
Qapla'. 'ej SoHvaD qeSwIj boQjaj naDwIj.

la: jImejneS 'e' yIchaw'.

pol:                       DupoQlI' poHlIj.
vaj Ha' toy'wI'pu'lI' tIvu' yIghoS.

la: Qapla', *'ovelya*. qeSmeywIj qaja'bogh
tIqawchu'taH.

'ov:          lu'. yabwIjDaq vIweghta'.
'ej yabwIj poSmoHwI' DapoltaH SoH.

la: Qapla'.

[mej]

pol: Suja'chuqDI', nuq jatlhpu' ghaH, *'ovelya*.

'ov: joH *Hamlet* qelneSbogh vay''e' mujatlhpu'.

pol: majQa'. 'oH qawlu'chu'.
nIteb pIj SoHvaD mobmeH poHDaj nobta',
qaStaHvIS Hu'mey; jIHvaD ja'lu'pu'.
'ej mu'meyDaj DaqImmeH nI'pu' poHlIj,
'ej ghaHvaD ghIbqu'pu'. toH, teHchugh ghu'vam ---
'ej teH 'oH 'e' muHarmoHlu'DI', Hojlu' ---
vaj bIyajHa''eghlaw'; qaja'nISba'.
'ej batlhvaD Qu'Daj yajnISchu' puqbe'wI'.
tlhIHvaD tlhetlh nuq? yIvIt.

'ov: bangDaj jIH, Hu' 'e' tobneSmeH, joHwI',
pIj SoQmey law' mujatlhpu'.

pol: "bangDaj SoH"? Hu'tegh! be'Hom Soy' DaDa. 
wej ghu'vam Qobqu'vaD bI'ongchoHlaw'.
'ej bangqoq SoQmeyqoqDaj DaHar'a'?

'ov: joH, nuq vIHarnIS DaH 'e' vISovbe'.

pol: baQa', qaghojmoH. ghu SoH 'e' yIHar,
SoQvam Da'IjlI'mo' DuSorghtaHvIS.
SoQmeyvaD qoghlIj'e' yISoQmoHchu'.
'ej qogh DaSoQmoHbe'chugh --- mu' vImawbej,
pe'vIl vIQoDlI'mo' --- vaj pumDI' qoghlIj,
qoHna' jIH 'e' vIpumlu'.

'ov:                     'a joH QaQ,
"bangwI' SoH" jatlhDI', nong 'ej quvqu' mIwDaj.

pol: Ha', mIymeH mIwDaj neH 'oH. Hu'tegh! Ha'.

'ov: 'ej SoQDaj tobchu'meH 'ej ngaqneSmeH,
QI'tu' quv buSbogh 'Ip Hoch'e' mujatlh.

pol: HIja', qoHQa'mey jonmeH janmey bIH.
pubtaHvIS 'Iwmaj, tIqvaD ngeDqu' chav,
jatvaD 'Ip nojDI' tIqmaj; 'e' vISovchu'.
qulqoqvetlh wovtaH law', 'oH tujtaH puS.
'ej qulqoqvetlh cha' Dotlhvam luchu'Ha'lu',
lay'taHvIS je chu'wI' --- bIH tojmoHmo'.
vaj batlh qulna' 'oH qulqoq'e', puqbe',
'e' yIHarQo'. bIquvmeH, leS ghaH'e'
pIj yISuchQo'. 'ej ja'chuqmeH neH bang
Dutlhob, "ghghgh" jatlhDI', 'e' yIHon. joH *Hamlet*
ngoDmeyvam neH tIHar: DaH Qupqu' ghaH.
'ej yItmeH, weghbogh tlheghDaj reH nI' law',
tlheghqoqlIj chaw'lu'bogh nI' puS. nom jatlhmeH:
*'ovelya*, 'IpDaj tIHarQo'. SuyDuy bIH.
nur'e' lu'angbogh paHchaj lughajbe'.
'ach yonmeH Qu' quvHa'qu' qoy'lI' neH.
'ej tlhu'moHchu'meH chaH, Human 'oSwI' Da:
SoQ'a'mey, batlhqoq je lo'. pItlh jIjatlh:
joH *Hamlet*vaD QIch mu'mey joq DamechmeH
wa' luplIj lenHom Dalo'Ha' --- baQa',
qaStaHvIS nemmey, pe'vIl 'e' vIbotbej.
yIta'. qara'. mamej.

'ov:                  qalob, joHwI'.

[mej chaH]

lut 'ay'Hom loS
'avwI'Daq.

['el *Hamlet*, *Horey'So*, *marSe'luS* je]

Ham: choptaHvIS jejlaw' muDvam Ho'Hey. bIrqu'.

Hor: HIvruplaw' muDvam vID, 'ej chopDI' yoHbej.

Ham: DaH qaS rep 'ar?

Hor:                  wej qaS ramjep, qar'a'.

mar: ghobe'. DaH jachpu' tlhaq.

Hor: qar'a'?  vIQoypu'be'. vaj yItmeH qa'
tugh qaS poH motlh.

[chuS lopmeH chuS'ughmey, 'ej 'etDaq baHlu']

                    nuq lopmeH baHlu', joH?

Ham: DaHjaj QongQo' 'ej lop 'ej tlhutlhqu' ta'.
chechqu' yupma'Daj. mu'qaD veSvaD SuvDI',
yoHqu' SuvwI''a'qoq, qochpu'Daj je.
'ej romuluS HIq HIvje''a' tlhutlhDI' ghaH,
Hugh yayDaj Dun lumaq chuS'ugh, QoQluch je.

Hor: tIgh 'oH'a'?

Ham:              tIgh 'oH jay'.
toH, wo'vam Sung jIH. jIHvaD motlhtaH tIghvam,
jIyIntaHvIS. 'ach vuDwIj tlhoblu'chugh,
vaj tIghvam'e' wIquvmoHqu' wIbIvDI'.
'ej tIgh wIpabtaHvIS, chIch maquvHa'.
neHmaH qIbHeS je DopmeyDaq nupumtaH,
'ej pIchmaj ja'choH wo'mey latlh, 'e' qaSmoH
nach 'uHqu' chenmoHbogh yupma'vam'e'.
"chechwI'na' chaH" lujatlh. 'ej targh DIrur
pIj 'e' lumaqmo', lamchoH pongmaj QaQ.
DInIDDI', jenqu' chavmeymaj DIta'bogh;
nunoymoHmeH Hombotlh DujQuQ je bIH.
bIH jotlh je ghu'vetlh. toH, pIj ghotvaD qaS je:
DotlhDaj Duy' naS lughaj chaH. chaq boghHa'pu' ---
chuntaHvIS, mungDaj wIvlaHbe'mo' ghot.
chaq HoSqu' Dujchaj vay', 'ej HoSqu'mo',
meqlaHchaj nuH, Surchem je pejchoH 'oH.
pagh, chaq belHa'qu'choHmoH DameH mIwchaj,
'oH QopmoHmo' wa' tIgh lupabtaHbogh.
wa' Duy'chaj DeghHom neH luqengtaH ghotvam,
Dotlhchaj lutoy'nISmo', pagh, puQmo' Sanchaj.
toH, qeylIS Dunqu' DameH Dojchugh je
batlhmeychaj Hoch, 'ej batlhmey ghajbogh chaH
leHruplaHbe'chugh je latlh vay', vaj rambej.
ghotvam lunoHlu'DI', Sab batlhmeyvam,
SaHmo' neH Duy'chaj. webmeH batlh baSna',
naDHa'ghachvaD butlh mIghqu' ---

Hor:                             'eH, joH! chol!

['el lomqa']

Ham: nuQanjaj boQqangbogh 'ej Qumbogh qa'pu'!
qa' QaQ SoH'a'? pIch ghe''ormang SoH'a'?
QI'tu' naD Daqem'a'? chaq ghe''orvo'
qulpummey Daqem'a'? bIHechtaHvIS
bIboQqang'a'? pagh bImIgh'a'? ram Hoch.
qayu'nISmeH bIchenpu'mo', qajatlh.
qapongmeH, *Hamlet* pong vIlo'rup. ta'!
Qo'noSngan'a'! vavwI'! SIbI' yIjang!
jIjIvmo' tugh jIQay'rup 'e' yIbot.
yIja' neH. qatlh lomSut lughormoHlaw'pu'
HomDu'lIj'e' Hu' weghbogh Hegh bIghHa',
'ej naDpu'bogh SonchIy? 'ej qatlh DulelmeH
poSlaw'pu' naghmey mollIj nujHey 'ughqu'?
molDaq pIroQDI', bIvIHbe'chu'bej.
chay' ghu' vIyaj? yoDSutlIj naQ DatuQ,
lomna' neH SoHtaHvIS, 'ej maSwov DoS
DaSuchqa', ram DaghIjmoHtaHvIS jay'!
jotrupbogh 'u' qoH, maHbogh, tIq DaSujchu'.
'ej qechmey'e' SIchQo'bogh qa'pu'ma'
jubuSmoH. nuqvaD? qatlh? DaH nuq wIta'nIS?

[*Hamlet* cholmoHmeH ghop vIHmoH lomqa']

Hor: SuH, naDevvo' DatlhejmeH ghopDaj vIHmoH.
nIteb DuQumqanglaw'.

mar:                 Daq Hop DaghoSmeH
DucholqangmoH, DochHa'qu'taHvIS mIwDaj.
'ach yItlhejQo'.

Hor:             Qo', joH. yItlhejbejQo'.

Ham: chay'? jIHvaD jatlhlaw'Qo'. vaj ghaH vItlha'.

Hor: Qo', joH.

Ham:           qatlh? QobDaj nuq vIHajnIS jay'?
jIHvaD mavjop potlh law', yInwIj potlh puS.
'ej qa'wI''e' not QIHlaHba' lomqa',
jubmo' qa' Hoch. mura'qa'law'. vItlha'.

Hor: 'a joH, bIQ'a' DaghoS 'e' tlhu'moHneSchugh?
pagh, bIngDajvo' bIQ'a' botlh DungDaq HuSbogh
'ej ghIjqu'bogh qoj'a' DaghoSmoHchugh?
pa' pumbeHlaw' 'ej chong qoj'a'vetlh jej.
pa' chenqa'laH je qa'. 'ej qu'mo' qabDaj,
chaq SoHvo' che'bogh yablIj laHmey nge'laH.
bImaw'choHmeH DujotlhlaH. ghu' yIqel.
yab HochDaq 'Itchu'meH Qujqechmey lanlaH
Daqvetlh neH --- 'ItmeH DachtaHvIS meq latlh ---
qelI'qam law' bIQ'a'vetlh ral lubejmo',
'ej bIngDaq jachqu' 'oH reH 'e' luQoymo'.

Ham: DacholchoH neH ghaH. Ha' yIghoS. qatlha'.

mar: pa' bIcholbe'.

Ham:                jIHvo' ghopDu' tIteq.

Hor: yIra''eghchu'. pa' yIghoSQo'.

Ham:                              jach SanwIj.
'ej porghwIj 'aDHomDu' Hoch letmoHmo',
DaH bIH rotlh law', veqlargh Somraw rotlh puS.
mura'lI'. qaH, jIHvo' ghopDu' tIteq.
baQa', lomqa'na' moj munISbogh ghot.
vIjatlh: peDoH. Ha', qa'! yIghoS. qatlha'lI'.

[mej lomqa' *Hamlet* je]

Hor: 'Itqu'choH ghaH, qech jochqu' buStaHmo'.

mar: wItlha'nIS. mujbej Qu'maj, ghaH wIlobchugh.

Hor: SIbI' vItlha'. wanI'vammo' tlha' nuq?

mar: Hu'tegh, DaH Qo'noS wo'Daq nonlaw' vay'.

Hor: Do' ghu'Daj naQ che' San.

mar:                           Qo'. SuH, wItlha'.

[mej chaH]

lut 'ay'Hom vagh
'avwI'Daq yoS latlh.

['elqa' *Hamlet* lomqa' je]

Ham: nuqDaq choDev? yIjang! jIghoStaHQo'.

lom: HIqImchu'.

Ham:            lu'.

lom:                 tugh qaSqa' bIjmeH repwIj.
'ej joy'bogh 'ej He'So'bogh qulmeyDaq
jIjegh'eghnIS.

Ham:           va, bIDo'Ha'ba', qa'.

lom: Qo', HIvupQo'. 'a ngoD qaja'rupbogh
tI'Ijchu', 'ej tIbuS.

Ham:                  yIja'. qa'Ijrup.

lom: bortaS Data'rup je, cho'Ijpu'DI'.

Ham: nuqjatlh?

lom:           vavlI' lomqa' jIH.
qaStaHvIS ram jIyItnISmeH vIqIchlu',
taHtaHvIS HupmeH bov. 'ej qaSDI' po,
jIpaylI'meH bIjqulmeyDaq vIweghlu' ---
HeSmeywIj webqu' Hoch vIta'pu'bogh,
qaStaHvIS yInwIj jaj, vISay'moHpa',
'ej bIH vIqIlpa'. toH bIghHa'wIj peghmey
vIja' net chaw'chugh, vaj lut Doj vIja'laH.
'ej qa'lI' QommoHlaH lut mu'Hom neH.
chaq ghoDajvo' bavHa'laHchugh yuQ vay',
vaj mInlIj rurlaH 'oH, lut mu' Da'IjDI'.
chevchuqlaH bagh'eghbogh 'ej jeDbogh jIblIj.
'ej Qammo' jIb tlheghDu'lIj Hoch, bIyay'DI',
to'baj pachDu' rur bIH, pay' HajDI' 'oH.
'ach 'Iw neH ghajbogh teSvaD bov SanbIjvam
ja'be'nISlu'. yI'Ij! baQa', yI'Ij!
qaSDI' poH vay', vavlI' DavuvchoHchugh, ---

Ham: QI'yaH!

lom: vaj vavvetlh chotlu'mo', quvHa'lu'taHvIS,
qorDu'Daj wemlu'DI' --- bortaS yIta'.

Ham: chot'a'?

lom: quvHa'qu' chotDI'. reH quvHa' chotwI'.
'ach chotDI' Hujqu', wemqu', 'ej quvHa'qu'.

Ham: SIbI' HISovmoH. vaj yabqech, bang choH joq
vIDataHvIS jImoDqu'mo', bortaSvaD
jIHIv.

lom:   bIvangrupba'. bISuvnISDI',
chaq vulqan tI DaDachugh je, bIbuDmo',    
vaj Qu' Davangrupbej. HI'IjchoH, *Hamlet*.
naHSormey ghomwIjDaq jIQongtaHvIS,
mu'aw'pu' ghargh net maq. 'ej Qo'noS qoghHey
lutojbejpu' webwI'pu', Hegh luja'DI',
chIch ngebmoHmo'. SuvwI' quv, ngoD yISov:
vavlI' mIv'e' DaH tuQ vav 'aw'pu'bogh
Hu' gharghqoq'e'.

Ham: tIqwIj: leSSov vIghajlaw'! vavloDnI'wI'!

lom: HIja'. tlhogh wembogh, 'ej qorDu'Daj ngaghbogh
petaQ! DaH nga'chuq tuHnIStaHvIS chaH,
'e' lajmeH quvlaw'qu'bogh be'nalwI',
'urmangDaj nobmey much, 'ej 'ongchu' yabDaj.
vaj Qapta' ghaH. Qu'vatlh, bImIghbej, yab!
SumIghbej, nobmey, be' botojlaHchu'mo'!
Sab be'nal Dotlh jay', *Hamlet*! jIHvo' pum.
'ej reH nur leHtaHmo' muSHa'ghachwIj,
vaj tlhoghvaD 'Ip vIlay'bogh DorbeHbej 'oH.
'a DaH petaQDaq pum. 'ej SupwIj vay'
QaQ law', petaQvam jo QaQ puSqu' jay'!
batlh'e' not ponlaH ngaghbogh wem, qar'a';
ponmeH, QI'tu'ngan rurmeH chenchugh je.
toH, vaj quv wovqu' muvchugh je wemDotlh,
vaj DalchoH batlh QongDaq 'e' Har, 'ej tugh
veQ Sopqang!
QI'yaH! jajlo' vIlarghlaw'. nom jIja'nIS.
qaStaHvIS pov, SorghomwIjDaq jIQong.
reH tIghwIj 'oHtaH. pa' jIQongtaHvIS,
qaStaHvIS jIHubbe''eghmeH len rep,
mucholmeH pegh'egh vavloDnI'lI' 'ong.
'ej *He'benon* tItaS HIvje'Hom qengDI',
qoghDu'wIj 'ochDaq DIrroptaSvam chaghmoH.
yoq 'IwvaD ghol luDamo' taSvam HoSmey,
tugh porgh lojmItmeyDaq, porgh HemeyDaq je
moDqu' bIH. moDDI', 'aj toQDuj lurur.
jeDchoH 'ej SubchoH pIvtaHbogh 'Iw yIQ,
'ej ghu SojtaS rur, nonmo' wIbchoHDI'.
tugh nom 'e' chav 'oH. jeDchoHpu' je 'IwwIj.
'ej vaQbogh porghwIj Dech DIrnaghHey letqu'.
'ej muroSHa'moH HIghbogh rop DIr mo'Hey
web'e'.
vaj jIHvo' be'nal, yIn je, ta'mIv je
nge'pu' loDnI'wI' ghop, 'ej quqpu' Hoch.
murInmoHta', jIchun'eghchoHmoHpa'.
mInDu'wIj bej, 'ej lomDaq jach pagh vaj.
yo' qIj vI'elrupbe'. loj paymeH 'ebwIj.
Qu'vatlh! 'ej Duy'wIj Hoch vIqengtaHvIS,
tugh mughIpDIjchu'meH veqlargh, mungeH.
QI'yaH! Ha', QI'yaH! vav Davuvrupchugh,
vaj ghu'vam yISIQQo'. qorDu'wIj wemmeH
'ej ngaghmeH neH taHqeq, lI' ta' QongDaq,
Qo'noSDaq 'e' yIbot. 'ach Qu' DanIDDI',
SoSlI' DaQIHmeH SoH, 'oghbe'jaj qa'lI'.
'ej joch'eghQo'jaj yablIj. ghaH lubIjjaj
veqlargh meqba''a', tIqDaj 'oy'moHbogh
'ej 'aw'taHbogh pach jejqu''e' je. QI'yaH!
naDev jIratlhlaHbe'. tugh qaSchoH po,
'e' 'ang ghargh wov. 'ej qulDaj tlhIb rIHHa' 'oH.
Qapla'. qamej! qamej! qamej! HIqaw!

[mej]

Ham: QI'tu' mangghom! ngeHbej! QI'yaH, nuq latlh?
ghe''or vIpongnIS'a' je? SuH, SIQ, SIQ,
SomrawwIj, 'ej SIbI' peqanchoHQo'.
jIQamlaHmeH HIboQ! peHoS! "HIqaw"?
lomqa' Do'Ha'qu', tamey leHlaHtaHvIS
maw'rupbogh nachvam! chay'? "HIqaw"? HIja',
yabwIj HablI'vo' ghItlhmey Dogh ram Hoch
vIQaw'bej. paq paQDI'norgh Hoch. qech Hoch.
ngoDmey Hoch'e' ben qonpu'bogh qoj tu'bogh
yablaHwIj Qup. nIteb yab paqwIjDaq,
HablI'Daq je ratlh Qu' chora'pu'bogh.
pa' lam quvHa' DuDbe'lu'bej. ghuy'cha'!
be' mIghqu'!
taHqeq! taHqeq! Haghbogh webbogh taHqeq!
nuqDaq ghItlhpaqwIj? ngoD vIqonnISba':
HaghlaH 'ej HaghtaH je taHqeq quvHa'.
Qo'noSDaq qaSlaH DaH 'e' tobbej ghu'. 

[ghItlh]

pItlh, vavloDnI'. DaH SoQ vIqelnISqa'.
nuq jatlhpu' ghaH? "qamej! qamej! HIqaw!"
vI'Ipchu' rIntaH.

Hor, mar: ['o'vo'] joHwI'! joHwI'!

mar: ['o'vo'] joH *Hamlet*!

Hor: ['o'vo']               Qanjaj qeylIS!

Ham:                                       toH, vaj qaSjaj.

mar: ['o'vo'] Ha'! Ha'! Ha' joHwI'!

Ham: HaHaHa! Haghlaw' mang!

['el *Horey'So* *marSe'luS* je]

mar: joH, DotlhlIj nuq?

Hor:                    De' nuq Daghojpu'neS?

Ham: toH! merqu' De'!

Hor:                  vaj 'oH ghoja'neS.

Ham:                                     Qo'.
De' DapeghHa'ba' SoH.

Hor: jIjatlhpa', jatlhbej Hovmey.

mar:                              jatlhbej Hov, joH.

Ham: vuDraj nuq? toH! 'oH HarlaH'a' tIq vay'?
'a De' bopegh, qar'a'?

Hor, mar:              wIpeghbejneS.

Ham: Qo'noSDaq yInbogh wa' taHqeq web law', 
Qo'noS latlh Hoch web puS. 'ej --- toH, petaQ ghaH.

Hor: De'vam nuja'meH 'utba' molvo' cheghbogh
pagh qa', joHwI'.

Ham:              HIja', bIlugh. bIlughba'.
vaj lIHmeH wa' mu' latlh vIja'choHbe' je.
mavanchuq 'ej matlheDchuq 'e' vIwuq.
Qu', neHtaHghach je pabnIS Hoch, qar'a',
Sar Hoch wIqelchugh. vay' vIpabnISmo' je ---
vaj SuH: Somraw vIqeqmeH DaH jIjaH.

Hor: maw' neH 'ej taQqu' mu'meyvam, joH quv.

Ham: Dumawmo' bIH, jIQoSqu', jup. jIQoSqu'.
HIja'. jIQoS.

Hor:          ghobe'. mawbe'ba', joH.

Ham: qarbe', *Horey'So*. 'oljaj ghe''or Qang.
chIch mawqu'lu'bejta'. HoSDo' vIqelDI' ---
yuDHa'bej qa'vetlh. De'vam'e' Saja'laH.
'a nuq wIbuSpu', pa' maja'chuqtaHvIS ---
wej 'e' boSovqangchoHchugh, vaj petung'egh.
'ej tugh, Do', Qap SutammeH Qu'. toH, jup:
SuvwI', HaDwI' je, jupna'wI' je tlhIHmo',
jIHvaD wa' Qu'Hom neH yIta'.

Hor:                         Qu' nuq?
wIta'rup.

Ham: wanI'mey'e' DaHjaj boleghpu'bogh
not bopeghHa'.

Hor, mar:      luq, joH.

Ham:                     pe'Ip je.

Hor:                               Hu'tegh,
not vIpeghHa'bej, joH.

mar:                   not vIpeghHa' je.

Ham: 'etlhwIjDaq 'e' yI'Ip.

mar:                        wI'Ipta', joH.

Ham: ghobe'. ghobe'. 'ach 'etlhwIjDaq pe'Ipqa'.

lom: [bIngvo'] pe'Ip.

Ham: baQa', nuqjatlh? Ha' lomoy! pa' SoH'a'?
juppu', Ha'. SomDaq ghotvetlh chuS boQoy.
pe'Ipqang.

Hor:       nuq wI'IpnIS 'e' ghoQIjneS.

Ham: not ghu'vam Hoch boleghpu'bogh boja',
'etlhwIjDaq 'e' yI'Ip.

lom: [bIngvo'] pe'Ip.

Ham: chay'? *Here and everywhere*? vaj Daq wIchoHjaj.
qaH, naDev ghoS.
'ej 'etlhwIjDaq ghopDu'raj'e' tIlanqa'.
'eH, 'etlhwIjDaq yI'Ip:
not ghu'vam Hoch boQoypu'bogh boja'.

lom: [bIngvo'] 'eH, 'etlhDajDaq pe'Ip.

Ham: majQa', lamto'baj! nom yav bIng DalenglaH!
po'qu' tlhIlwI'vam! Daq yIchoH, juppu'.

Hor: Hu'tegh! baQa'! Hat ghu'!

Ham:                           vaj Hat yISIQ,
'ej tujDI', DoplIj qul yIchenmoHQo'.
chalDaq, ghorDaq je law'bej Doch, *Horey'So*.
'ej puS Doch'e' neH najlaHbogh je QeDlIj.
toH Ha'.
jaS peDaQo'. 'ej batlh yo' qIj bo'elmeH:
JitaQchugh qoj jIHujchoHchugh jIDaDI',
leS chIch qoH tlhaQ vIDa chaq 'e' vIwuqDI' ---
qaStaHvIS poHmeyvetlh, tuleghDI' tlhIH,
'eH, not DeSDu' tIbagh. not nach tIjoqmoH.
not Honbogh mu'tlhegh vay' tIjatlh je jay' ---
vaj not "toH, toH, ghu''e' wISov", "mata'laH, mata'qangchugh" joq, 
"maja'qangchugh neH" joq, "net chaw'chugh, vaj 'e' ta'meH lutu'lu'" joq.
'ej not SuloymoHmeH SoQghoch yIjunmoH.
toH ghu'wIj'e' boSov, not 'e' yIqImmoH.
'ej "Hochvam wIvangQo'" SIbI' yI'Ip.
vaj rInDI' Heraj, 'ej bo'elrupDI',
Do' lomrajDaq yo' qIjvaD jachlu'jaj!

lomqa': [bIngvo'] pe'Ip!

Ham: yIleS, yIleS, qa' Sot.

['Ip chaH]

vaj, juppu'wI',
Savan 'ej jupna'ra' vIDarupbej.
lIvuv 'ej lIparHa'taH *Hamlet* puj,
Do' not net 'angmeH Dachjaj 'eb, chavlaH je.
Qo', HItlha'Qo'; matay'. patlh tIgh yIbIv.
'ej SuH: lojmIt vay' poSDaq DaqlaH pagh.
pupHa'law' bov. va, noDbogh San vIpay.
va, qatlh vIlughmoHmeH jIboghpu' jay'!
Qo'. Ha' matay'.

[mej chaH]

lut 'ay' cha'
lut 'ay'Hom wa'
*polonyuS* juH pa'.

['el *polonyuS* *reynalDo* je]

pol: 'eH, ghaHvaD Huchvam ghItlhvam je tInob.

rey: luq, joH.

pol: *reynalDo* QaQ, bIvalqu', Qu' Data'chugh:
chay' Da ghaH, latlhvaD 'e' yIyu' DaSuchpa'.

rey: joH, 'e' vIHech.

pol:                  majQa'! majQa'! yIqIm:
wa': romuluSDaq Qo'noS 'Iv lutu'lu';
'e' vISovmeH yIyu'. chay' ghoSta' chaH.
'Iv chaH. chay' chep chaH. Huchchaj law'moH nuq.
'Iv lutlhej. chay' wagh mIp. puqwI' luSov,
QIt 'e' Datu'DI', DechlI'mo' moDQo'bogh
bIyu'meH QIch, ghu' potlh yIcholchoHchu' ---
'oH chollaHbe'mo' yu'chu'wI' yuDHa'.
DaSovqu'be'law' pa' 'e' HarnIS Hoch.
"vavDaj, juppu'Daj puS je neH vISov.
'ach ghaH vISovchu'be'." qIm'a', *reynalDo*?

rey: qaqImchu', joH.

pol: "vISovchu'be'bej jIH" Dajatlh net chaw'.
"toH, ghot vIqelbogh ghaHchugh, vaj DaHa'taH.
chavvam lI'be' parHa'qu'." DaH DapummeH,
DubelmoHbogh ngoD ngeb tI'ogh. 'ach Hu'tegh,
not luquvHa'moHlaw'meH, ramnIS bIH.
Qu'vam yIqIm. wej SuvchoHbogh loD Qup'e'
tlhejtaHmo' reHbogh HeSHom motlhqu' tlhIv,
vaj HeSHommeyvam ghov 'ej SovtaH Hoch.
qaH, HeSvammo' yIpum.

rey:                    chaq SuDlaw', joH.

pol: HIja'. chaq chechlaw'; Hay'law'; tIchlaw'; Sollaw';
toH, chaq ngaghHa'law' --- pumvam'e' qachaw' je.

rey: 'ach joH, ghaytan bong ghaH quvHa'moH pumvam.

pol: Hu'tegh, ghobe'. DamaqDI', pum yIpujmoH.
ngaghqangDI' SeH'eghbe' ghaH, yIja'Qo'.
naDHa'ghach taghlaHmo'. not 'oH vIHechpu'.
pumDaj DatlhuptaHvIS, qapHa'nIS QIchlIj.
wej Qu' lupabbogh mangHom'e' lulammoH
HeSHomvam neH vaj 'e' luHarnIS latlh.
Daw'choH 'ej joq neH meQlI'bogh wa' yab.
vaQ 'IwDaj'e' wej lobmoHpu'bogh Sun,
'ej Doch Hoch HIvqang ghaH.

rey:                          luq. 'ach joHwI' ---

pol: qatlh Qu'vam yuD Data'nIS?

rey:                            joH, HIja',
vISov vIneH.

pol:         qaH, ghu'vam'e' vIHech.
'ej maytaH tu'meH mIwvam 'e' vIHar.
puqwI' puqHeSHomvam Damaqpu'DI';
'ej "lamchoH je mIv chu', 'oH mupDI' muD"
Daja'DI'; vaj yIqIm:
HeSmo', Daja'bogh, DIv QupwI' DajoSbogh,
wa'logh 'e' leghchugh ghot DangonglI'bogh,
Suja'chuqtaHvIS, vaj, qaH, DIch yIghaj:
Suja'chuqtaH 'e' rInchoHmoHmeH ghotvetlh,
Dujatlh: "vajna'", "jupwI'" ghap, "qaH QaQ" ghap,
Segh wo' je tIgh, pongmIw je pabtaHvIS.

rey: lu', joH.

pol:           toH, qaH, ta'vam vang --- chay' vang ---
va nuq vIjatlhruppu'? Hu'tegh, vay' vIjatlhruppu'. nuqDaq vIja' 'e' vImev?

rey: "Suja'chuqtaH 'e' rInmoHmeH", "jupwI'" latlh ghap je, "qaH QaQ" je.

pol: "Suja'chuqtaH 'e' rInmoHmeH." --- HIja'!
vaj SoHvaD jatlh: "toH, qaHvetlh Qup vISov.
wa'Hu' vIleghlaw', pagh wejHu' vIleghlaw',
pagh qaSDI' vay', pagh qaSpu'DI' wanI'vetlh,
'ej vay'vam tlhejpu' ghaH, pagh vay'vetlh tlhejpu'.
'ej qarbej ghu' Daja'bogh. SuDtaH chaH.
pagh, chechqu'mo' lengHa'taHvIS, loQ vul.
pagh, SolchoH, 'ovmeH vI'qeq jeStaHvIS.
pagh, chaq vIlegh, malja' qach 'eltaHvIS.
--- vaj, ngagh 'e' DIlmeH qach. "pagh, latlhDaq ghaH." 
toH, qIm:
vIt Qa'vam jonba' tojbogh chablIj ngeb.
'ej DoS wIpuSmeH Sup 'ej SoDnIS pu'maj.
maQoDpu'DI' maDoQ, mavalqu'mo',
matu'chu'mo' je. SoQwIj qeSwIj je
Dapabchu'mo', puqloDwI''e' DapuS je.
'ej peghDaj Sov DaDoQ je SoH, bIQoDDI'.
choyaj, qar'a'?

rey:            HIja', joH.

pol:                        maj. Qapla'.

rey: lu', joH.

pol:           chay' Da ghaH 'e' yItu' je SoH.

rey: luq.

pol: 'ej QoQDaj qeq 'e' yInISQo'.

rey:                              lu', joH.

pol: Qapla'.

[mej *reynalDo*]

['el *'ovelya*]

pol:          nuqneH, *'ovelya*! qay'law' nuq?

'ov: QI'yaH, vIghIjqu'lu', joHwI', joHwI'!

pol: Hu'tegh! DughIj maQmIghHey nuq?

'ov:                                 joHwI',
pa'HomwIjDaq SutDegh vIchenmoHtaHvIS,
muchol joH *Hamlet*. 'ej QeyHa'chu' wepDaj.
mIvDaj tuQbe' ghaH. ghIH paSloghmeyDaj;
pumpu' bIH, 'ej qama' qammIrmey rur.
yIvbeHDaj rur ghaH, chISmo'. mupchuq qIvDaj.
'oy''a' luQummeH Hechlaw'mo' mInDu'Daj,
Qugh ja'meH, ghe''orvo' ghaH ghImlu'law'pu'.

pol: maw''a' DuneHqu'mo'?

'ov:                      'e' vISovbe', joH.
'ach 'e' vIpIHbejneS.

pol:                 toH, nuq Dujatlh?

'ov: ghopDu'wIj tlhapchoH, 'ej jIHaw' 'e' nISchu'.
DeSDaj naQ tIqmoH. Huy'Daq latlhDaj lanmeH,
mIwvam pab. qaSDI', qabwIj bejchoHchu'mo',
'oH Hotlhlaw'. Dotlhvam leHmeH nI'qu' poHDaj.
rInmoHmeH, DeSwIj QomchoHmoHlaw'DI',
'ej, wejlogh joqmeH nachDaj, mIwvam pabDI',
tlhuHchu' ghaH. vupmoHmo' 'ej HoSmo' tlhuHDaj,
vaj roDaj DejmoHlaw', 'ej yInDaj HoHlaw'.
rInpu'DI', muweghHa'. volchaHDajDaq
mubejmeH nachDaj tlhe'taH; HeDaj SammeH,
mInDu' lo'be'law' ghaH, pa' HurDaq ghoSpa'.
'ej HurDaq mejpa', reH mubuSlI' tIHchaj.

pol: HItlhej, Ha'. ta' vISamnIS. maw' muSHa'mo'.
teHbej. 'ej ralmo' Dotlhvetlh, Qaw''egh bang,
'ej SuDbogh Qu'mey nIDmeH, yabDaj tlhu'moH.
wanI'vam motlhtaH law', pIj Dotlh nong latlh
Hoch tlhu'moH puS. SoHvaD jIQoSqu'bej.
toH, Hu' Daqunta''a'?

'ov: ghobe', joH QaQ. 'ach qeSmeylIj vIpabta'.
jabbI'IDmeyDaj vIlajQo'. muchollI'
reH 'e' vIbot.

pol:             wanI'vammo' DaH maw'law'.
jIQoS: vIqImtaHvIS ghaH vInoHHa'
'ej muj leSSovwIj. SoHvaD reHpu' neH,
'ej leS SoH DuquvHa'moH, 'e' vIpIH.
'a Hu'tegh! jIpIHHa'ta'! qanDI' ghot,
reH qaDDaj lachruplaw'; 'ej QuptaHvIS,
reH qaDDaj machrupmoH. Ha', ta' wIghoS.
De' SovnISlu'. wIpeghtaHvIS, maSoy'DI',
pegh lot QIH law', ta' QeH QIH puS --- De' QoyDI'.

[mej chaH]

lut 'ay'Hom cha'
ta'qach pa'.

['el ta', ta'be', *roSenQatlh*, *ghIlDeSten*, tlhejwI'pu' je]

t: maj, *roSenQatlh*, maj, *ghIlDeSten*, nuqneH!
Salegh vIneHba'. jIHvaD 'ut je Qu'
Satoy'moHbogh. vaj "tugh pechol" vIra'DI',
jImoDnIS. *Hamlet* choHHey De' boQoypu'.
vIpongmeH, "choH" vIjatlhnIS; DotlhDaj ngo''e'
DaH luleHbe'mo' tIqDaj, porghDaj je.
yaj'eghlaH pe'vIl 'e' lunISchu' rIntaH
nuq, vavDaj Hegh je, 'e' vIloylaHbe'.
vaj tlhIH Satlhob. qaStaHvIS jajraj Qup,
Sutay' tlhIH ghaH je, batlh boghojtaHvIS.
boSumtaH je, SuQupmo' 'ej SuvIDmo'.
vaj loQ naDev monjuHwIjDaq peratlhqang.
chaq ghaH botlhejmo', belmey nejqangqa' ghaH.
ghaH SotmoH'a' vay''e' wej Do' vISovbogh 
chaq 'e' botu', boloy 'e' chaw'DI' 'eb.
'ej Seng bo'angDI', Do' chaq 'oH vIvorlaH.

tb: jatlhtaHvIS, pIj lIbuSpu' ghaH, qaH QaQ.
'ej qarbej: tlhIHvaD tIqDaj SumtaH law',
yInbogh cha' vay'vaD tIqDaj SumtaH puS.
yInmeH 'ej chepmeH ghu' wItullI'bogh,
Suquvqang 'ej Suvupqang, 'e' che'angchugh,
'ej loQ naDev SumImchugh, vaj, SuSuchmo',
ta' vanvaD 'umbej tlho' boSuqlI'bogh.

roS: maHvaD voDleH DIbHoS boghajneSmo',
Qu' chav boneHneSbogh boraDlaHbej.
chetlhobnISbe'.

gh:             'ach batlh relobrupbej.
'ej tlhIH retoy'rupqu'mo', baHbogh pu'HIch
wIDaqangbej. vaj DaH majegh'eghneS.
chera'meH, qamrajDaq Qu' laHmaj Hoch
wIlan, cheraDpa'.

t: *roSenQatlh*, *ghIlDeSten* je quv, retlho'.

tb: *ghIlDeSten*, *roSenQatlh* je quv, retlho'.
'ej 'eH: tugh choHqu'pu'bogh puqloDwI'
yISuch; Satlhob. Ha', 'eH, peghoS, mang puS.
'ej *Hamlet* DaqDaq qaHvam'e' tIDor.

gh: maSaHmo' 'ej maQorghmo', beljaj *Hamlet*,
'ej ghaHvaD QaHjaj ghu'!

tb:                      'e' chaw'jaj San!

[mej *roSenQantlh*, *ghIlDeSten*, tlhejwI'pu' vay' je]

['el *polonyuS*]

pol: *DuraS*vo' cheghpu'neS Duypu', joHwI'.
'ej cheghDI' Quchqu'.

t: reH De' QaQ vav DaDa.

pol:                     qar'a', joH quv?
toH DIch yIghajneS: jIHvaD potlhchugh qa'wI',
vaj jIHvaD potlhqu' ta'vaD, qa''a'vaD je
Qu''e' vIpabbogh. 'ej qatlh maw'choH *Hamlet*,
Do' 'e' vItu'pu' --- mujchugh, vaj jISammeH
po'Ha'choHlaw' ben po'qu'taHbogh yabwIj,
ngoDmey vIwamtaHvIS --- DaH 'e' vIHarqu'.

t: yIja'choH. De'vetlh lI' vI'Ijqangqu'.

pol: nISuch Duypu'ma' 'e' yIchaw', jIjatlhpa'.
rInDI' 'uQ'a'Daj, naHHey Dajaj De'wIj.

t: vaj nay' tIlIHneS SoH. naDev tIDor.

[mej *polonyuS*]

t: puqlI' QuchHa'ghach meqHey, Hal je Hoch
tu'pu' ghaH, 'e' muSovmoH, *ghertlhuD*, bang.

tb: wa' neH meq potlhmo' qaSpu', 'e' vIHar:
Heghmo' vavDaj 'ej moDqu'pu'mo' tlhoghmaj.

['elqa' *polonyuS*. lutlhej *voltImaD* *qornelyuS* je]

t: tuQDoq vIlo'rup je. nuqneH, jup QaQ!
'eH, *voltImaD*, nuq Qum *DuraS* loDnI'wI'?

vol: DurI' je 'ej Duvan, Davanpu'mo'.
maja'chuqDI', vaj muvmoH *vortIbraS*
tugh 'e' lumevmeH, pa' Duypu' ngeH pIn.
*qInSaya* HIvmeH qeqtaH Hu' 'e' Har ghaH.
'ach nuDchu'DI', nIQojmeH qeqtaH chaH
'e' tu'bej pIn. 'ej Qay'qu' --- tojlu'pu'mo',
roptaHvIS, qantaHvIS, HoSHa'taHvIS ghaH.
vaj mevmeH *vortIbraS*, jabbI'ID lab.
nom ghu' vIja': lob latlh. ghaH qunqu' pIn.
'ej not DuQoj 'e' nIDqa', vavloDnI'vaD
'e' 'IpnIS ghaH. vaj Quchqu'mo' pIn qan,
*qInSaya* HIvmeH neghvetlh muvmoHta'bogh,
DaH ghaHvaD woQDaj nobpu' pIn. 'ej Qu'vaD
DISHuchDaj bIHmeH wejSaD DeQmey nob je.
tlhobmeH ghItlh'e' lu'angbogh navvam qon je: [ta'vaD nav nob]
Qu'vetlhvaD SeplIj lenglaHlI' mangghomDaj
tugh 'e' yIchaw'neS. Qob SIQbe'meH 'oH,
'ej chaw'lIj leHmeH, Qu''e' Delbogh navvetlh
yIpab je.

t:        toH, mubelqu'moHbej ghu'vam.
vIqelmeH chaw'DI' poHwIj, ghItlh vIlaD.
ghu'vam'e' tugh vIbuSchu' 'ej vIjang je.
'a qaSpa', tlhIH Satlho' Suvumchu'ta'mo'.
peleS. yupma' wItaghbej, qaSDI' ram.
majQa' Sucheghmo'!

[mej *voltImaD* *qornelyuS* je]

pol:                 Qu' luchavchu'law'ta'.
ta', ta'be' je: nuq 'oHnIS ta'Dotlh'e';
nuq 'oH Qu''e'; nuqmo' pem 'oH pem'e';
qatlh ram --- ram'e'; 'ej qatlh poH 'oH poH'e':
Hochvetlh vIQIjchugh, vaj pem ram je poH je
Hoch vIlo'Ha' neH. toH SovlaHvaD qa'botlh
Damo' SoQ vI', 'ej Sov DeSDu', HaQchor je
Damo' SoQ Dalqu', vaj DaH nom vIja'.
maw'neS puqra'. toH, maw' ghaH, 'e' vIpong neH.
maw'lu' net QIjchu'chugh, vaj maw' QIjwI'.
'ach ramjaj SoQvetlh.

tb:                   law'jaj De'na'lIj,
'ej puSjaj mu'QujlIj.

pol:                    qa'Iprup, joH:
not mu' vIQuj. toH maw'mo', teHbej SoQwIj.
teHmo', Do'Ha' 'oH. 'ej Do'Ha'bej: teH.
Dogh mu'Qujvetlh. 'ach 'oH vIghImbej rIntaH,
mu' vIQujQo'mo'. maw' ghaH 'e' wIloyjaj.
'ej yabDaj nISchoH nuq DaH 'e' wItu'nIS.
toH, "yabDaj mISmoH nuq" DaH jaS vIjatlhnIS:
qaSba'taH nISbogh mISvam, lISmo' vay'.
vaj ratlhtaH ghu', 'ej ratlhlI' ghu' vIDelbogh.
peqImchu'.
puqbe' vIghaj. vIghaj vIghatlhtaHvIS.
'ej batlh mulobmo' ghaH 'ej Qu'Daj pabmo',
SuH: navvam nobta' ghaH. peqIm; penoH.
     HovoywI'vaD --- quvmoHbogh qa'wI' --- *'ovelya* 'IHchu'vaD

mujbej mu'vetlh. moHbej mu'vetlh. moHbej "'IHchu'vaD". 'a tugh
Hoch
bo'Ij. ghItlh:
     povqu'bogh roDaj DoqDaq, Dochvam, [taH]

tb: *Hamlet*vo' De'vam Hevpu''a'?

pol: joH quvqu', loQ yIloS. ghItlh naQ vIlaDchu'. [laD]

     meQ Hovmey 'e' yIghoH.
     ratlh pemHov 'e' HIpon.
     ngeb vIt chIch 'e' yInoH.
     bang jIH, not 'e' yIHon.

     *'ovelya*'oy, bom mu' vIqontaHvIS jIpo'be'. 'ItmoHwI'meywIj
     Hoch QumlaHchu'be' ghItlhlaHwIj. 'ach banglI' jIHbejbogh
     nong law', bangmey Dabogh latlh'e' nong puS; toH nongbe'
     latlhvetlh 'e' yIHar. Qapla', jawoy. reH banglI', porghDaj
     yInmoHtaHvIS neH QuQDaj, *Hamlet*'e'.

mulobmo', jIHvaD navvam 'ang puqwI'.
'ej ghaHvaD tlhobDI' *Hamlet*, teSwIjvaD
poH, mIw je, Daq je Hoch muja'pu' je.

t: 'ach ghaH muSHa'choH *Hamlet*, chay' 'e' laj?

pol: toH, 'Iv jIH 'e' DaHar?

t:                           loD quv, loD matlh je.

pol: vItob vIneH. 'a nuq DaQublaH, joH,
moD muSHa'ghachchaj tuj, bong 'e' vItu'DI'
('ej 'e' vItu'bej, ja'choHpa' puqbe'wI' ---
tlhIHvaD vIchIDnIS), nuq boQubneS, ta',
ta'be'lI' quv je, peghghItlhpaq vIDachugh;
qoj, tIqwIjvaD mInDu' vISoQmoHchugh,
QIchwIj vIlojmoHDI'; qoj, ghu' vIleghDI',
nochDu'wIj vIyajbe'chugh; nuq boQubneS?
ghobe'. SIbI' jIvang. puqbe'wI' QupvaD
vIjatlh: "chavqo'lIj HurDaq *Hamlet* tu'lu'.
qaSbe'nIS." 'ej vIra'choH: SuchtaH *Hamlet*
'e' nISmeH wegh'eghnIS. 'oSwI' lajbe'nIS.
nobmey Suqbe'nIS. 'ej jIra'DI' rIntaH,
yabDajDaq qeSwIj poch. vaj nom vIja':
*Hamlet*vaD janglu'Qo'DI', 'ItchoH ghaH.
Sopbe'choH. tugh Qongbe'choH. tugh HoSbe'choH.
tugh mISchoH. ghaHvaD qaSDI' choHvam Hoch,
DaH maw'. DaH wam'egh yabDaj. DaH ma'IQ.

t: ghu'vetlhmo' SabchoH ghaH 'e' DaHar'a'?

tb: ghaytan, ghaytan.

pol: joH, qaSDI' vay' --- vISovqang --- ghu' vI'olmeH,
"qaS" vIjatlh'a', qaSbe'bej 'oH net tobpa'?

t: wanI'vetlh vISovbe'.

pol:                      teHbe'chugh vuDwIj,
[nachDaj volchaHDaj je 'ang] Dochvamvo' Dochvam'e' yIteqneS jay'.
muchaw'chugh 'eb, vaj nuqDaq So''egh vIt,
tugh 'e' vItu' --- yuQbotlhDaq So''eghchugh je.

t: toH chay' wItobchoH?

pol:                    qaStaHvIS loS rep,
naDev rut HeDaq yIttaH. 'e' DaSov.

tb: yItbej.

pol:        vaj pa' puqbe'wI' vIweghHa'.
'ej qaStaHvIS, nuSo'taHjaj HaSta.
chay' ghomchuq 'e' yIqIm. ghaH muSHa'be'chugh,
'ej ghaH muSHa'qu'mo' Sabbe'chugh yabDaj,
vaj wo' qumboQ jIHbe'jaj. Du', veQDuj je
vIvu'choHjaj jay'.

t:                 toH, nab'e' wInID.

['el *Hamlet* laDtaHvIS]

tb: peqIm. DaH chol Do'Ha'wI'. Sagh 'ej laD.

pol: pemejneS, joH. SIbI' pemejneS, cha'.
SIbI' vIDorchoH. Ha' HIchaw'neS, joH.

[mej ta', ta'be', toy'wI'pu' je]

pol: DotlhlIj nuq, joHwI'?

Ham: jIquv!

pol: choghov'a', joHwI'?

Ham: qaghovchu'; verengan mut 'oH mutlIj'e'

pol: ghobe', joHwI'.

Ham: vaj bImutbe'mo' qanaD.

pol: jImutbe''a', joHwI'?

Ham: HISlaH, wa'netlh nuvvo' le' wa' mutbe'wI'.

pol: teHqu', joHwI'.

Ham: "pe'vIl targh lomDaq SISDI' 'otlh vID, gharghHom Sepchugh,
yInroHHom notlhHa'moHlaHchu'mo' woj'a'..." puqbe' Daghaj'a'?

pol: HIja', joHwI'.

Ham: SISbogh Sep'e' bong 'el ghaH 'e' yIbot. lopmoHbej ghu
muvtay, 'ach SeplaHmo' puqbe'lI' --- jup, qeS yIqel.

pol: [pegh'egh] nuqjatlh jay'? puqbe'wI' buStaH qar'a'? 'a
mughovbe'pu'. verengan jIH 'e' noHHa'. loj, lojqu' yabDaj. 'a
jIQuptaHvIS je jIH, reH muSHa'qu'bogh tIqwIjmo' jIbechbej ---
ghaH vIrurba'pu'. vIjatlhqa'. nuq DalaD, joHwI'?

Ham: mu', mu', mu'.

pol: nuq luqel, joHwI'?

Ham: vangmeH qel 'Iv?

pol: 'ach De' nuq luqel mu', joHwI'?

Ham: mu'qaD. qon qoH tlhIv, "loD qan porghDaq chIS rol, Hab Quch,
DughHa' 'ej Hurgh bIQ jeD nIjbogh mInDu''e', 'ongHa'chu' yab, 'ej
pujqu' 'uS." may tIchbogh mu'vam Hoch, 'ach maybe' mIw, mu'qaD
veSvam noDlaHbe'mo' qanwI'. nawloghwIj Qup DamuvlaH, bIHeDmeH
vetlh nuch DaDachugh.

pol: [pegh'egh] maw'bej, 'ach meqlaw'taH. --- muDvo'
bIyItqang'a', joHwI'?

Ham: molDaq.

pol: toH, muDvo' 'oH mol'e'. --- [pegh'egh] pIj jangDI' 'ongqu'
SoQDaj. SoQvam 'ong lo'laHbe' nuj pIv, Dupvam tuchmo'
mISbe'ghach. vImej, 'ej ghomchuq ghaH *'ovelya* je tugh 'e'
vInab. --- SoHvo' jIjaHnISneS, joHwI' quvqu'.

Ham: jIHvo' bIyaHDI' SoH, jIH Quch law'; yaHDI' HochHom, jIH Quch
puS -- wa' neH latlh vImaS: yaHjaj yInwIj neH, yInwIj neH, yInwIj
neH.

['el *roSenQatlh*, *ghIlDeSten* je]

pol: SoHvo' jIyaHnIS.

Ham: qoHvam qan, qetlh.

pol: *Hamlet* quv bonejlaw'. pa' ghaHtaH.

roS: [*polonyuS*vaD] Dutlho'jaj qeylIS, qaH.

[mej *polonyuS*]

ghIl: joHwI' quv!

roS: joHwI' webHa'!

Ham: juppu'wI' QaQqu'! Dotlhraj nuq, *ghIlDeSten*, *roSenQatlh*
je? nuqneH?

roS: wa'Hu' may' yoS wutlhDaq 'Iwghargh Dotlh yon 'oH
Dotlhmaj'e'.

ghIl: Do' yapmo' neH Dotlhmaj Do', maQuch. mIvDaq tuQbogh San
maQambe'.

Ham: DaSmeyDaj bIngDaq SuQambe' qar'a' je?

ghIl: HISlaH.

Ham: vaj qoghDaq tuQbogh, botlhDaj yonDaq joq SuQam.

ghIl: loQ. jojDajDaq neH maQam.

Ham: jojporgh'ay'Daq? wejpuH, teHqu'! ngaghHa'wI' ghaH. De' chu'
HIja'.

roS: chu'law' ghu'vam neH --- maychoH 'u'.

Ham: qaS maQmIgh'a'! 'ach teHbe' De'raj. Sayu'qa'chu'. HeSraj nuq
bIjmeH San, naDev bIghHa'Daq lIngeH.

ghIl: bIghHa'Daq?

Ham: bIghHa' 'oH Qo'noS'e'.

roS: vaj, 'oH je 'u''e'.

Ham: bIghHa' tIn'e' 'oH; 'oHDaq weghbogh pa'mey, Surchemmey je,
qama'DISmey je lutu'lu'; Qo'noS qab law', Hochvetlh qab puS.

roS: 'e' wIQoch.

Ham: vaj 'oH boqelDI' bIghHa' botu'be'. QaQbe' 'ej qabbe' ghu' 'a
QaQ, pagh qab 'e' tu' qelwI' neH. vIqelDI' bIghHa' vItu'.

roS: toH, bIchav 'e' Danabmo' bIghHa' Datu'. chavnablIj wegh.

Ham: QI'yaH, muweghchu'chugh je naH vaHHomHey, mIch'a'mey'e' not
luvuSlu'bogh vIche' 'e' vInoHlaH. 'ach vInoHbe' muSujmo' wanI'
vInajbogh.

ghIl: tugh bIchav 'e' Danajbej. QIb najlu'bogh 'oH chav'e'
nablu'bogh.

Ham: QIb neH 'oH je wanI' Hoch najlu'bogh.

roS: teH. tISmo' 'ej tunmo' chavnab, QIb QIb neH 'oH 'e' vInoH.

Ham: vaj porgh 'oH qoHma''e', 'ej qoH QIb neH chaH chuQunma''e',
chavbogh SuvwI'ma''e' je. vaS'a'Daq wIghoS'a', Hu'tegh
jImeqlaHbe'mo'.

cha': pItlhej.

Ham: baQa' Qo'! tlhejwI'wI' tIDaQo', toy'Ha'qu'mo' mutlhejtaHvIS.
'ach jupwI' tlhIH, pIj ben 'e' botobmo' DaH peyuDHa'. qatlh
*tlhIn*Daq tlhIH?

roS: pISuch. latlh wIneHbe'.

Ham: mIpHa'wI' vIDamo', jItlho'DI' jIchuSbe', 'ach Satlho'. 'ej,
jupoy, yapqu' mu'DeQwIj. naDev SupawmeH bora'lu''a'? boneH'a'
tlhIH? boSap'a'? Ha' Ha' HIlob. Ha' Ha'. Qo', pejatlh.

ghIl: nuq wIjatlh DaneH?

Ham: jISaHbe', 'a yIjangchu'. SupawmeH lIra' vay' 'e' luDISlaw'
qabraj DIv'e' jechlaHbe'bogh SunaDmeH mIw. lIra' ta' ta'be' je
QaQ 'e' vISov.

roS: qatlh, qaH?

Ham: tuja'nIS. 'a taHmeH boqmaj yuDHa' tuvItjaj. boqmaj matlhmo',
parHa'ghachmaj Qupmo', jupbatlhmaj yuDHa'mo', Hoch potlhmo' je
DellaHbogh gharwI'na' jIHbe'bogh HIlob 'ej pevIt, SupawmeH
bora'lu' qar'a'?

roS: [*ghIlDeSten*vaD pegh] nuq DanoH?

Ham: [pegh'egh] vaj Qo', jIDughrup. tuparHa'chugh vaj pemImQo'.

roS: joHwI', mapawmeH wIra'lu'.

Ham: Sulay' 'e' boquvmoHlaHmeH 'ej notlhchoHbe'meH 'Ipraj, qatlh
lIra' 'e' vIloychu' jIH. qaStaHvIS Hu'meyvam bong belwIj vIjegh;
meq vIyajbe' je. jIHaghqangbe'law'; jIreHqangbe'law'; 'ej 'u'
qo''a'vam je qelDI' maw'wI' vImojlaw'pu'bogh, Dalbogh
ghe''orHey'e' tu'. Dung'a'maj pov'e', SuS'e', nuDechbogh moQ'a'
'IH'e' yItu'. toH chalvetlh jenDaq HuS meQbogh Hovmey wov ---
wejpuH, jIHvaD He'So'bogh SIptlhoQ ngIm rur. toH, chovnatlh Doj
ghaH tlhIngan'e'. valqu' meqlaHDaj. HoSqu' porghlaHDaj.
chentaHvIS 'ej vIHtaHvIS po' 'ej le'. Dol'a' jub rur SuvtaHvIS.
QI'tu' moch rur QubtaHvIS. 'IHchu'bogh qo''a'Daq pupchu' mutvam
'IH. 'a jIHvaD ramlaw' chenmeH porghmeyvam lam'e' tlholHa'moHbogh
'u'. mubelmoHbe' loD --- be''e' je, 'ach SuHaghmo' jaS boQublaw'.

roS: joHwI', yabwIjDaq 'oHpu'be' qech tlhaQ'e'.

Ham: qatlh bIHagh, vIjatlhDI' "mubelmoHbe' loD..."

roS: nIbelmoHbe'chugh loD, vaj DawI'pu' DabejDI', Human
tejpu'Hey DaqIHlaw'. chaH DIjuS naDev maqughtaHvIS. toH, naDev
nItIvmoHmeH chol chaH.

Ham: batlh paw ta'qoq. ghaH vIvanchu' jIH. SuvmeH vaj yoH, 'etlh
yoD je lo'jaj. jachDI' muSHa'wI', lI'chu'jaj HughDaj. SoQ naQ
rInmoHchu'jaj nongwI'. taghDu''e' reH luchu'beHlu'bogh jormoHjaj
HaghmoHwI'. bom mu'tlhegh pabjaj be''a', pagh ghaH lupab bIH,
jatlhtaHvIS. DawI'ghomvam nuq?

roS: vengvo' lot ja'wI''e', reH DatIvqangbogh ben DabejtaHvIS.

Ham: nuqmo' DaH lengtaH? juHvengchajDaq chepchu' batlhchaj
malja'chaj je.

roS: Qapla'chaj lutunglaw' noywI' chu'.

Ham: ben, DaHjaj je rap'a' naD luHevbogh? DaH lunaDlu''a'?

roS: ghobe'.

Ham: chay' qaS? ragh'a'?

roS: ghobe', chaHvaD laH po' polmoH qeqchaj. 'ach nIS puqtlhoQ
chu''e', Qa'Hompu''e'. DataHvIS SoQchaj chuS lachmo', chaH naDqu'
je bejwI' Seyqu'. DaH noychoHpu' 'ej Qoplaw'bogh DawI'yaHmeyqoq
tIchqu'mo', ghItlhtaj vaQ law', 'etlh vaQ puS 'ej 'elvIp 'etlh
qengwI'.

Ham: toH puq chaH'a'? Qorgh 'Iv? je' 'Iv? bomlaHbe'DI' ghoghchaj
notlhchoH'a' Qu'chaj? nem beprup'a', DawI' qan mojDI' (ghaytan
qaS wanI'vam, jaS malja' ghajlaHbe'chugh), chaH nuS'eghmoH
ghItlhwI'chaj, DawI' qan cho'nISbogh naDHa'qu'mo'.

roS: QI'yaH pIj Qay'qu' cha' jaghHeyvam. SoltaH DawI'pu' 'e'
lutungHa'mo' rewbe', Qu'chaj lunaDtaH. qaStaHvIS benvam, lut
ghItlh'e' reH DIlQo' muchwI' Hoch, lutDaq DawI' veSmo' tonSaw'
luqaSmoHbe'chugh je ghItlhwI' DawI' je.

Ham: qarqu''a'?

ghIl: va yabtonSaw'na' luqaSmoHqu'bejtaH cha'.

Ham: Qapla' lunge''a' QupwI'?

roS: toH, HIja' jay' --- qo'qengwI' tepDaj je lunge' je.

Ham: net pIHbej. ta' ghaH vavloDnI'wI''e', 'ej DaH DeghDaj DIlmeH
cha'maH, loSmaH, vaghmaH, wa'vatlh ghap DeQ nobqang ben ghaH
luvanHa'qu'bogh ghotpu''e', yIntaHvIS vavwI'. Qu'vatlh, ghu'vam
motlh law', 'u'pab motlh puS; ghu' QIjjaj QeD.

[chuS DawI'pu' maqmeH QoQ]

ghIl: paw DawI'pu'.

Ham: batlh *tlhIn*Daq Supawpu'. DeS tIlo', pevan. vanwI'vaD tay
quv ra' lurDech tIgh je. SavanmeH jIjatlh, pagh DawI'pu'vaD
(jaqnISba'bogh) vanwIj jaq law', tlhIHvaD van jaq puS. batlh
Supawpu'. 'ach vavqoqwI' SoSHeywI' je toj ghu'.

ghIl: ghu' nuq, joHwI'?

Ham: 000 DoD 2 QuvDaq jImaw'. choHDI' lurghvetlh pIm toQDuj
to'baj je, 'e' vIghovlaH.

['el *polonyuS*]

pol: Saghom, loDpu'.

Ham: HI'Ij, *ghIlDeSten* --- SoH je --- cha' qoghDaq cha'
QoywI''e'. ghuSutHom tuQ, wej 'e' mev loDqoqvetlh.

roS: chaq cha'logh 'oH tuQ. puq chaHqa' loD qan'e', rut net joS.

Ham: paw DawI', muja' 'e' nabba'. yItu' --- toH bIlugh. Hoghjaj
wa' qaS. lughqu' mu'.

pol: joHwI', De' qaja'.

Ham: joHwI', De' qaja' jIH. rIymuS luDanchoHDI' romuluSngan...

pol: paw DawI'pu', joHwI'.

Ham: not mev peghmeyHey!

pol: baQa' qavIt.

Ham:      'ej targhDaj lIgh DawI'pu' Hoch.

pol: laHchaj Doj law', laH Hoch Doj puS; lotlut, tlhaQbogh lut,
qunlut, noybogh lut tlhaQ, tlhaQbogh lut noy, qunlut noy,
qunlotlut, tlhaQbogh qunlotlut noy, 'ay' wavbe'lu'bogh, bom tlhab
joq ja'meH DataHvIS. "morab qeylIS je" ja'meH 'IQqu'be' qoj
"verengan'a' Qagh" ja'meH Quchqu'be'. DataHvIS, lurDechvaD
pablaHchu' pagh bIvlaHchu' chaH.

Ham:      bo'DIj pIn'a', toH *ghaw'ron* qan!
tev'a' Daghajbejpu'!

pol: tev'a' nuq ghaj ghaH?

Ham: toH,
     'ej ghaHvaD wa' puqbe' neH tu'lu'.
     puqvetlh muSHa'taH ghaH 'ej Qan.

pol: [pegh'egh] puqbe'wI' buStaH.

Ham: lugh qar'a' mu'wIj, *ghaw'ron*oy?

pol: chopongmeH *ghaw'ron* Dajatlhchugh, vaj wa' puqbe'
vImuSHa'taHbogh 'ej vIQanbogh vIghajbej.

Ham: ghobe', qarbe'.

pol: vaj qar nuq?

Ham: toH,
     ra'taHvIS San, Dach Sun.
'ej qaS wanI''e' DaSovbogh:
     vaj ghaHvaD qaSpu' qun wanI'.
SoHvaD ghu' naQ Del bomvam mu'tlheghmey wa'DIch'e'. toH, ghoS
mevmoHwI'wI'.

['el DawI' puS]

Ham: batlh naDev Supawpu', pInpu', batlh Savan. naDev tlhIHmo'
jIlop. Savan, juppu' QaQ. --- toH, jupwI' nI', ben qaleghbogh,
DaH jIbvam chu' Suqba'pu' qab. qab laHlIj 'e' chotemmeH naDev
Qo'noSDaq SoH'a'. --- toH, be'oywI', bang je. Hu'tegh, chalDaq
SaltaH nachlIj; DaH qajuvmeH, DaSpu' vIchel. ghuy'cha' bombogh
HoS lIngwI' rurmo' ghoghlIj Qup, va 'oH Sorghbe'lu'jaj. --- 
pInpu', batlh Savan. romuluSngan wamwI' DIDa, HochDaq wIleghbogh
maSupqangmo'. SIbI' SoQ wIQoy. Ha', laHraj po' yItob. Ha', SoQ
nong.

D1: SoQ nuq, joHwI' QaQ?

Ham: ben SoQ chojatlh, 'ach not naQ lutDaj. naQbejchugh vaj
wa'logh neH naQ. rewbe' motlh vuD vIqaw: chaH belmoHbe' lut.
to'baj 'uSDu' SopQo', qaSbe'taHvIS QI'lop. 'ach QaQqu' lut, 'e'
vInoH jIH, vuD nIv ghajwI'pu' je. pov lut; 'ay'meyDaj buvchu';
'ej mu'mey 'ongmoHqu', lachbe'taHvIS qonwI'. mu'tlhegh
wIbHa'moHbe' HaQchorHey, net joS; 'ej mu'Daq qech ngeb
chellaw'pu' net pumlaHbe'. 'ach yuDHa'chu' net maq;
belmoHbejtaHvIS pov, 'ej reH mIybe'law'taHvIS Doj. lutvo' wa'
SoQ'e' vIparHa'chu': *DI'Do'*vaD SoQ'e' jatlhbogh *'enyaS*. Hegh
*pIray'am* 'e' qelDI' SoQ vIparHa'qu'. qawbogh yablIjDaq
yIntaHchugh vaj mu'tlheghvamvo' yIruch: toH jIQub, jIQub ---
     rughtlhoQ rurlaw' pob qIj *pay'ruS* ---
qarbe'. SoQ tagh *pay'ruS* mu'tlhegh.
     ramjep rurlaw' pob qIj *pay'ruS*
     DeSDu' Dugh, HoH 'e' Hechmo',
     Sanchaj SomDaq QojrupmeH QottaHvIS.
     pe'vIl porghDaj qIjqu'Daq qu'Daq
     DuQwI' DeghHey'e' DaH ngoHpu' ngotlhwI'.
     qabDaq qamDu'Daq je Doqchu' DevwI'.
     ghaHDaq ghomHa'pu' qorDu' quppu' je
     'Iw'e' 'uybogh 'ej QIt QaDmoHbogh 
     qechmey qul'a'. vaj che'wI'chaj chotrupwI'vaD
     HeSrupbogh HoSDo' QIbHey Qobqu'
     qemlaw' qul'a'vetlh. meQmo' 'ej muSmo'
     DaSpu'DajDaq DuD'egh Hommey HuH je.
     puyjaq pImbe' mInDu'Daj maw'.
     pay' *pIray'am*, qup'a' qan
     noDmeH nejtaH pejqangbogh *pay'ruS*,
     ghe''or ghungwI'.

vaj yItaH.

pol: Hu'tegh, joHwI', bIjatlhchu', 'ej ghogh DalISchu', 'ej mu' DanongmoH.

D1:  tugh ghaH tu'.
     mangpu' mupHa' gholvetlh. ghopDaj
     lobHa'mo' letbogh betleHDaj, buDlaw'
     pumDI' 'oH. poQqu' tlhaptaHwI'Daj 'e' tlhIvlaw'.
     HIghbejmeH HI', Hay'choH *pIray'am* *pay'ruS* je.
     mayHa' may'chaj. HIv HurghwI'.
     QeHmo', QapHa' 'etlhDaj. 'ach 'aw'mo'
     naSbogh nuHDaj SuSHey Sey,
     vulchoH vavnI''a' Doy'. Dej je
     vanglaHbe'bogh veng, DungDaj DechtaHvIS
     qorqanglaw'bogh qul. ghatlh ghaH 'e' ghovlaw' 'oH.
     chuSqu'mo' chenHa'taHvIS, tojwI' teSDu'
     vonglaw' veng. vaj peplu'DI' pumlaw'Qo'
     nurnuv nach chISDaq chungbeHbogh
     tochDaj taj'a'Daj. HI' Hotlhlu'bogh
     rurchoH rojQo'wI'. QeHDaj Qu'Daj je
     vangbe'choH vIHbe'wI'.
     'ach rut ralpa' muD, morgh 'e' mevlaw'
     chal. chuSQo' Sachbogh SuSmey.
     'ughlaw' 'engmey. peghlaw' je puH,
     HeghvIplaw'mo'. 'a HatlhDaq tIHmeyDaj'e' tugh
     mupmoH muD. jaS ja'be'lu'.
     yevpu'DI' je yovwI', ghaH vumqa'moH vembogh
     bortaS. baSDaq qIptaHvIS qeylIS
     yovwI' yayyoD chenmoHbogh chamwI'pu''e',
     vaQbej. 'a vIDchu' 'Iwmey 'etlhDaj,
     *pIray'am*Daq pumDI'.
     Sorghqang neH San! laHmeyDaj lIqjaj
     qa''a'pu' qep. gho'a'Daj gho'wI'mey
     naQmey je notlhmoHjaj. QI'tu' QuQvo'
     botlhDaj bachjaj. laghlu'DI', luchvetlh
     ghupjaj ghe''or!

pol: tIqqu' SoQ.

Ham: vaj chIpwI'Daq rollIj tlhej. SuH, yItaH. chaq DaH ghaHvaD qaq SoQ
tlhaQ, lut Qut joq. jaS yonbe'. yIjatlhtaH. *He'quba* yIqelchoH.

D1:  bortaS be'nal'e', Huy''a'Du' *He'quba*'e' ---

Ham: Huy''a'Du' *He'quba*?

pol: QaQbej mu'vetlh. QaQbej "Huy''a'Du' *He'quba*".

D1:  tu''a' toDlaHwI'? DachtaHvIS DaSmey,
     qevpobDajvo' qulmey boch buQlaw'
     leghwI' laHDaj mISmoHbogh mInbIQ'e'.
     Dat DughtaH. nachDajDaq narghpu'
     qutmey qogh. DaHjaj 'oH Dech
     qatwI' qutlh. mopDaj mechpu' je.
     boghmeH batlhvaj law' QeyHa'lI'bogh 'ej Qopbogh
     chorDaj chIS'e' ma'nIS mep'ay' neH.
     ghumtaHvIS ghong, vubvam vupnISlu'.
     be'nalvetlh bejchoHchugh vay', vaj vaQnIS.
     'urmang 'oghpu' SotmoHbogh San, 'e'
     maqnIS meqwI'vetlh, SuQtaHvIS SoQDaj.
     bIjmeH, ghaH bejchugh qa''a' qep ---
     QujmeH QutwI', loDnalDaj lommey
     puy *pIray'uS* 'etlh 'e' 'olDI' ghaH ---
     vaj vItmo' vI'bogh ghoghDaj ghum'a',
     qa''a'pu' qImmoHlaHchugh jubbe'wI' jIp,
     vaj vangrup je veSmey joH'a', 'ej jeDnIS
     meQbogh muDmIn'a'.

pol: toH, yItu': choHbej qabDaj, qoj nIjbeHbej mInDaj. va,
taHbe'jaj.

Ham: pItlh, maj. tugh SoQ naQ Daja', 'e' vIchaw'. --- joHwI' QaQ,
DawI'pu' Dama'meH yIHeQ. yaj'a'? Dotlhchaj yIqel. bovmaj ta
qengwI', qun qawwI' je chaH. HeghlIjvaD SonchIy Hat qaq law',
yInlIjvaD naDHa'ghachchaj qaq puS.

pol: joHwI', 'umchugh Hochvam vIma'chu'.

Ham: ghuy'cha', qaH, majQa'. 'umbe'chugh tIma' je. Hochma' muHlu'
vaj net bot. Dama'meH ra'jaj batlhlIj nurlIj je neH. reH
'umbe'chugh, vI'bej tevlIj.

pol: Ha', qaHpu'.

Ham: yItlha', juppu'. wa'leS lut wIbej.

[mej *polonyuS* DawI'pu' je, ratlhtaHvIS wa'DIch]

Ham: choQoylaH'a', jup. "*ghonja'gho* Hegh"'e' boja'meH
SuDalaH'a'.

D1: lu', joHwI'.

Ham: wa'leS ram 'oH wIbej. wa'maH cha' jav joq mu'tlhegh'e'
vI'oghbogh 'ej vIchelbogh, chIch DaHaDlaH, qar'a'?

D1: lu', joHwI'.

Ham: majQa'. qaHvetlh yItlha', 'ej yIvaqbejQo'. [mej DawI'
wa'DIch] juppu'wI' QaQ, DaHjaj ram Saghomqa'. batlh *tlhIn*Daq
Supawpu'.

roS: maj.

Ham: vaj taHjaj wo'. [mej *roSenQatlh* *ghIlDeSten* je]
DaH jImob.
baQa', Qovpatlh, toy'wI''a' qal je jIH!
nonglaw' 'e' najpu'mo' neH, wa' lutmo' neH,
qechlaHDaj qu'vaD qa'Daj raD DawI'vam.
webmoH, qar'a'? 'oH raDDI', chISchoH qabDaj.
yIQ mInDu'Daj. qImHa''egh DataHvIS.
ghor ghoghDaj. chenlI'mo' porghlaHmeyDaj,
qechDaj luDelchu' bIH. 'ej paghvaD qaS jay'.
*He'quba*vaD neH!
qatlh *He'quba*mo' SaQmeH wIchvetlh SaH ghaH?
nongchu'meH meq, tungHa'wI' je vIghajbogh
ghajchugh ghaH, vaj nuq vangrup ghaH? nuq ta'?
DawI' yaH SoDnISlaw' mInbIQDaj ngeng.
ghom'a' teSDu''e' DuQnIS ghIjbogh QIchDaj.
DIvwI'pu' maw'nISmoH. chunwI'pu' 'ItmoH.
HeS Sovbe'wI'pu' mISnISmoH. mInDu',
teSDu' je laHmey yay'nISmoHbej ghaH.
'ach jIH?
lam DataHbogh toDSaH neH qetlhqu' jIH.
najbogh vulqangan neH vIrur, jItammo'.
Qu'wIjvaD chav vIvangmeH jIyatlhQo'.
'ej pagh vIjatlhlaH. ta'vaD pagh vIjatlh je,
'ej ta'vetlh mIpmey, yInDaj quvqu' je
QIHlu'chu'pu'! va nuch jIH'a'? "taHqeq SoH"
jatlh 'Iv? va nachwIj qIpmeH ngIlqang 'Iv?
rolwIjvo' jotlh 'ej qabDaq pob vo' 'Iv?
va ghIchwIj bochmoH 'Iv? "HughDaq bInep"
taghwIjDaq pumvam yuvmeH je jatlh 'Iv?
Hu'tegh! vISIQnISba' jIH. *be'tatlheD*ngan
HuHqoq vIghaj; muwIblaHbe'law' HI'tuy,
pujqu'mo' HuHwIj. chaq puSbe'chugh 'oH,
vaj Hu' chal Qa'mey Hoch vIrornISmoH,
bIHvaD toDSaH chor'ochDu''e' vIje'mo'.
ngaghHa'bogh chotqangbogh taHqeq! quvHa'bogh
payQo'bogh qurbogh 'ongchu'bogh taHqeq!
bortaS!
toH targh vIDalaw'. wejpuH yoHlaw' ghu'.
vav vImuSHa'bogh chotlu'. DaH bortaSvaD
puqloDDaj jIHbogh ra' ruv QeH je Hoch.
'a nuq vIvang? tera'ngan neH vIDa,
mu'meyDaq tIqwIj vI'ughHa'moHlaw'mo'.
'ej mu'qaD vIjawHa'mo', chom vIDa.
tach toy'wI''a'! 
Hu'tegh! wejpuH! Ha' yabwIj. ngoD vIQoypu':
DawI' lut qImmeH ba'taHvIS DIvwI',
po'mo' neH lut muchwI'pu', qa'Daj'e'
pIj qIpchu' lut. SIbI' vaj HeSDaj maq.
jatDu' ghajbe' chotwI' Dotlh. teH. 'a jatlhmeH
porgh laH Hoch lo'rupmo', vaj HochvaD mer.
qImtaHvIS vavloDnI'wI' ror, vavwI' HoH
rurlaw'bogh lutHom'e' lumuch DawI'vam,
'e' vIqaSmoH. 'ej qabDaj Dotlh vItu'.
vIDaj wej 'oy'taHvIS. bong bItlaw'chugh,
vaj He vISov. chaq ghe''orvo' nucholta'
lomqa' vIleghbogh. chenDI' belmoHmeH
laH ghaj veqlargh. jIpujmo' 'ej jI'Itmo',
muqIchmeH rIntaH chaq mughongpu'. DuH,
ghaH HoSmoHlaw' 'Iw 'It net Sovmo'. toH,
'olmeH, ngoD meq qaq law', qa' QIch qaq puS.
ta' ghob vIchu'meH DawI' lut vIghuS.

[mej]

lut 'ay' wej
lut 'ay'Hom wa'
ta'qach pa'.

['el ta', ta'be', *polonyuS*, *'ovelya*, *roSenQatlh*, *ghIlDeSten* je]

t: 'ej qatlh mISwI' Da 'e' boghojlaHbe',
Suja'chuq 'e' boSeHtaHvIS, qar'a'?
DaH maw'mo', Qobmo', ngojmo', jaj jot Hoch
Sujchu' ghaH jay'!

roS:                 teH. bItlaw' ghaH 'e' DIS.
'a bItmoH nuq, reH 'e' QIjQo' ghaH, joH.

gh: ghaH yu'lu'DI' jIjQo' ghaH 'e' wItu' je.
'ach 'ongmo' maw'taHvIS, maHvaD jangQo',
yabDaj Dotlhna' nuDISmeH pIj wInIDDI'.

tb: qej'a' lIleghDI'?

roS:                    toH, SuvwI' quv Dabej.

gh: 'ach DameH raD'eghqu'.

roS:                         nuyu'qangbe'.
'ach ghaH wIyu'DI', maHvaD jatlhruptaH.

tb: yupma' vay' jeSmeH botungHa'pu''a'?

roS: joH: lut DawI' DIjuS malengtaHvIS.
ghaHvaD DIDel, 'ej QoyDI' QuchchoHlaw'.
ta'qachDaq chaH. DaHjaj ram ghaHvaD DameH,
chaH ra'pu' ghaH.

pol:              qar. "lut yIleghneS, joH"
SatlhobmeH jIH muqoy'pu'.

t: vIleghqangbej, 'ej ghu'vetlh neHlaw'mo'
jIbelqu'bej. qaH QaQ, yIneHqu'moH.
'ej belvam tIvchoHmeH ghaH yItungHa'.

roS: luq, joH.

[mej *roSenQatlh* *ghIlDeSten* je]

t:           SuH, *ghertlhuD* 'IH, ghomej je SoH.
jIH neH mughommeH *Hamlet* DaH jIra'pu'.
vaj bong naDev *'ovelya* ghomlaw' ghaH.
maSo''eghmo' jIH vavDaj je --- ghoqwI' mub,
mabejtaHvIS maH nubejbe'taHvIS,
chay' ghomchuq 'e' wIchovmeH vaj maqarlaH.
'ej chay' tugh Da ghaH 'e' wIqelchu'mo',
wIwuq: muSHa'ghachDaj 'oy'mo' bech'a'?
pagh, meq latlhmo' bech'a'?

tb:                         qalobrupbej.
*'ovelya*, Hujlaw' *Hamlet*; Do' 'e' qaSmoH
qa'lIj QaQ neH, bI'IHba'mo', vIneH.
vaj DotlhDaj motlhDaq ghaH DacheghmoHlaH
bI'Ilmo' 'e' vItul. 'ej tugh Suquvjaj.

'ov: joHwI', vIqaSmoHjaj.

[mej ta'be']

pol:                       *'ovelya*, 'eH:
naDev yIyIt. joH quv, maSo''eghneS.
[*'ovelya*vaD jatlh] paqvam yIlaD. bImobmeH meqHey 'anglaH
lalDanlIj Qu'Heyvetlh, DuleghDI' *Hamlet*.
ghuy'cha', lalDan vuvwI' DIDataHvIS,
'ej tay DItaghtaHvIS, veqlargh wIjun je.
pIj pIchvam'e' wIghaj; net tobqu'.

t:                                 teHlaw'.
[pegh'egh] va, ghobwIj HIvchu' SoQvam 'oy'naQ jay'!
ngaghwI' qevpobDaq bochmoHwI'qoq ngoHDI',
qevpob moH law', taS boch moH puS. vIrur je.
ta'wIj moH law', SoQwIj vI'IHmoHbogh
moH puS. baQa', tep 'ugh!

pol: chol 'e' vIQoy. maSo''eghneS, joH quv.

[mej ta' *polonyuS* je]

['el *Hamlet*]

Ham: taH pagh taHbe'. DaH mu'tlheghvam vIqelnIS.
quv'a', yabDaq San vaQ cha, pu' je SIQDI'?
pagh, Seng bIQ'a'Hey SuvmeH nuHmey SuqDI',
'ej, Suvmo', rInmoHDI'? Hegh. Qong --- Qong neH ---
'ej QongDI', tIq 'oy', wa'SanID Daw''e' je
cho'nISbogh porghDaj rInmoHlaH net Har.
yIn mevbogh mIwvam'e' wIruchqangbej.
Hegh. Qong. QongDI' chaq naj. toH, waQlaw' ghu'vam!
HeghDaq maQongtaHvIS, tugh nuq wInajlaH,
volchaHmajvo' jubbe'wI' bep wIwoDDI';
'e' wIqelDI', maHeDnIS. Qugh DISIQnIS,
SIQmoHmo' qechvam. Qugh yIn nI'moH 'oH.
reH vaq 'ej qIpqu' bov; mayHa'taH HI';
Dochchu' HemwI'; ruv mImlu'; tIchrup patlh;
'oy'moH muSHa'ghach 'Il vuvHa'lu'bogh;
quvwI'pu' tuv quvHa'moH quvHa'wI'pu';
qatlh Hochvam lajqang vay'? wa' taj neH lo'DI',
Qu'Daj Qatlh qIllaH ghaH! tep qengqang 'Iv?
Doy'moHmo' yInDaj, bepmeH bechqang 'Iv,
mISbe'chugh neHtaHghach, ghaH ghIjmo' DuHvam:
Hegh tlha' vay': Hegh tlha' qo''e' tu'bogh pagh.
not chegh lengwI'ma', qo'vetlh veHmey 'elDI'.
vaj Seng DIghajbogh, lajtaHmeH qaq law';
latlh DISovbe'bogh, ghoSchoHmeH qaq puS.
vaj nuch DIDa 'e' raDlaw' ghobmaj, qelDI'.
'ej, pIvmo', wovqu'taHvIS wuqbogh qab,
'oH ropmoH rIntaH Sotbogh qech ghom Hurgh.
'ej Qu'mey potlh DItulbogh qIl je qechvam.
vIDHa'choH nab. baQa'! *'ovelya* 'IH!
toH be', qa''a'pu'vaD bItlhobtaHvIS,
jIyempu' 'e' yIQIjchoH je.

'ov:                       joH QaQ,
qaStaHvIS Hu'vam chay' bIpIvneS SoH?

Ham: qatlho'; choquvmoHbej. jIchep, jIchep.

'ov: SoHvo' qaqawmeH nobmey law' vISuqta'.
qaStaHvIS jajmey, vIHevHa' vIneH.
qatlhobneS, joH. tItlhap.

Ham:                     ghobe'. nobbe'.
pagh'e' qanobta'.

'ov: Danobta' 'e' DaSovbejneS, joH quv.
bIH tlhejmeH, 'IHqu'mo' bang QIch DatlhuHbogh
vaj waghqu'choH. 'a DaH Dajbe'choH pIwchaj.
vaj tItlhapqa'. yab quvvaD qutlh nob wagh,
SuqwI' maghDI' nobwI'. vaj boq vIlagh.
tItlhapneS, joH.

Ham: wejpuH! wejpuH! be'batlh Daghaj'a'?

'ov: nuqjatlhneS?

Ham: bI'IH'a'?

'ov: nuq jatlhmeH bIHech, joH?

Ham: be'batlh Daghajchugh 'ej bI'IHchugh, vaj be'batlhvaD tamnIS DotlhlIj 'IH.

'ov: joHwI', be'batlh van tamlaH'a' Dotlh 'IH?

Ham: HIja', teH. batlh rurwI' moj 'IHwI' 'e' qaSmoHpa' batlh HoS, DotlhDaj 
ngo' lon batlh 'ej ngaghwI' quvHa' moj batlh 'e' qaSmoHbej 'IHwI'. 
ben Hujpu' mu'tlheghvetlh. 'ach DaH 'oH tob bov. qamuSHa'pu'.

'ov: HISlaH, joH, Hu' 'e' vIHar 'e' DaqaSmoH.

Ham: choHarbe'nISpu'. ropmaj ngo' ngejHa'moHlaHbe' batlhqoq. reH He'So'taH 
ropvetlh. not qamuSHa'.

'ov: vaj vItojlu'bej.

Ham: Ha'! ngaghQo'wI' nawlogh yImuv. qatlh yemwI'pu' DaboghqangchoHmoH?
machbe'bogh quv vIghaj. 'a HeS Dunmo' jIpum'eghlaHmo', vaj qaq, not 
muboghmoHchugh SoSwI'. jIHemqu'. jInoDqang. jItlhIv. HeSmey vIta'qangbogh law' 
law', HeSvetlh vInabmeH qech'e' vIQublaHbogh law' puS; HeSvetlh vIchenmoHmeH 
'oghwI' laHmeywIj law' puS; HeSvetlh vIta'meH 'ebmey law' puS. yav chal je 
jojDaq yIttaHvIS mururbogh petaQpu', nuq wIvangnIS? taHqeq maH Hoch'e'. 
paghma' yIvoq. tugh ngaghQo'wI' nawlogh yImuv. nuqDaq vavlI'?

'ov: juHDajDaq ghaH, joHwI'.

Ham: ghaHvaD SoQjaj lojmItmey. vaj juHDajDaq, pagh latlhDaq je qoH Dajaj.
qamej.

'ov: va, yIboQ, qa'pu' quv!

Ham: bInaychugh, vaj tlhogh nob tammeH, maQmIghvam qanob. chuch Darurchugh je 
bIngaghHa'Qo'mo', peDwI' Darurchugh je bIquvmo', vaj Dapumlu' 'e' DabotlaHbe'.
ngaghQo'wI' nawlogh yImuv. Ha', qamej. pagh, bInaynISchugh, vaj qoH yInay.
Qovpatlh moj loDnalra' chay' 'e' boqaSmoH 'e' luSov valwI'. ngaghQo'wI' 
nawlogh'e' nom yImuv. qamej.

'ov: qeylIS HoS, ghaH yIQaw'Ha'!

Ham: chay' SuchoH'eghmeH taS Doq bolo' 'e' vIQoybej je. 'u'vo' wa' qab boghaj,
'a tlhIHvaD latlh bochenmoH. SuyItHa' 'ej SureHHa' 'ej SujawHa'. 'u' DolmeyvaD
Saj pongoyqoq bonob. SuDaHa' 'e' boQIjmeH, SujIv 'e' boqap. yIDoH, vISIQQo'.
mumaw'moHpu'. not tlhogh wIqelqa'. wa'leS yInlaw'taH tlhogh jeSbogh Hoch'e'.
yInbe' wa'chaj neH. choHbe' latlh Hoch Dotlh. ngaghQo'wI' nawlogh yImuv.

[mej *Hamlet*]

'ov: baQa' DaH Sab yab quv! tej, vaj, gharwI' je
'etlh, jat, mIn je! wo' Do' ro', nembatlhna' je!
ghaH Dapu' 'ej ghaH rurqangpu' vaj Hoch.
ghaH tu'qangpu' tu'wI' Hoch. va, DaH Sabchu'.
'IpDaj QoQ yuch vISoppu'. DaH jIH'e'
'It 'ej Do'Ha' law', be' Hoch latlh 'It puS.
DaH che'pu'bogh meqlaHvetlh quv yIqIm.
chuS'ugh mupHa'lu'bogh rur: tlhov 'ej taQ.
Dotlh Qupqu' 'oSbogh chenchu'wI''e' Qaw'pu'
meqHa'ghach QIH. Do'Ha'! Qugh 'ongvaD jeghtaH.
wIgh naQ vIleghpu' 'ej maQmIgh vIleghtaH!

['elqa' ta' *polonyuS* je]

t: muSHa''a'? 'e' 'angbe'ba' neHtaHghachDaj.
maw' 'e' tobbe' je QIchDaj ja'pu'bogh,
chenHa'taHvIS je. qa'Daj nuQtaH vay'.
'ej vay'vam retlhDaq 'avmeH ba' Dotlh 'It.
chaq Qob 'avwI' Qu', Qubmo' ghaH 'ej nabmo';
'e' vIpIH. Qob vIbotmeH nom jIwuqDI',
vIra': tugh vanmaj luqImHa'pu'bogh
poQmeH tera'Daq ghoSnIS ghaH. vaj Do',
pImmo' yuQ logh je, Dechbogh Dochmey je,
Do' tIqDajvo' qech buStaHbogh lughIm.
reH yabDaj mupmo' qechvetlh, DotlhDaj motlh'e'
QIt HopchoH ghaH. SuH, chay' choqeSneS SoH?

pol: Qaplaw'. muSHa'ghachDaj qImHa'lu'mo'
chenlaw'pu' 'IQtaHghachDaj mung taghwI' je,
toH, wej 'e' vIHarQo'. nuqneH, *'ovelya*.
nuq jatlh joH *Hamlet* DaH juja'nISbe'.
QIch Hoch wI'Ijpu'. nab yIwIvneS, joH.
'ach latlh yIchaw' je. 'IQ ghaH; rInDI' lut,
SoSvaD 'e' 'angmeH ghaH, nIteb ghaH tlhobjaj
SoS'e', ta'be''e'. ghaHvaD qu'jaj qunDI'.
ja'chuq chaH 'e' vIDaqneSmeH jIlan'egh.
ghu'Daj tu'be'chugh SoS, vaj nom tera'Daq
bIghHa'Daq ghap yIngeH. Daq lugh yIwIv,
bIvalbejmo'.

t:           Ha'. DaH SIbI' vIruch.
maw'DI' ghot potlh, tugh QoblaH 'e' wItuch.

[mej chaH]

lut 'ay' wej.
lut 'ay'Hom cha'.
ta'qach'a' vaS.

['el *Hamlet*, wej DawI' je]

Ham: SoQ'e' DajatlhtaHvIS, HIrur --- jat yISupmoH. DawI' motlh
mIw Dalo'chugh je, vaj chetvI'vo' mu'meywIj baH DIvI'may'Duj 'e'
vImaS. muD yISIjlaw'Qo', ghop DajoqmoHtaHvIS, 'ach Hoch yISeH.
SIStaHvIS, jevtaHvIS, 'ej (chaq vIDellaH) jorlaw'taHvIS
QeHHeylIj, vIt rurlaw'meH SoQ Dajatlhbogh QeH jot yIchenmoH. va,
SoQ SangDI' mIybogh toDSaH ral, SoQ Qaw'DI', qa'wI' tIch. yavDaq
bejwI' teSDu' neH DuQlu'bogh belmoH, lut tam luQIjbe'lu'bogh,
QIch chuS je neH yajlaHmo'. chIch veqlargh DameH lachchugh DawI',
vaj vImuHrup. *molor* rurmeH, ghaH 'um law'; *molor* 'um puS.
yIbot.

D1: qaHeQneS.

Ham: 'a yIjotqu'Qo' je; bIDachu'meH Duj yIvoqtaH. mu' DalISmeH
yIvangchu' 'ej bIvangmeH mu' tIlISchu'. ngeHbej vIt yIwemQo' 'ej
wa' qech'e' yIqelchu': DawI' Qu' ta'Ha'qu' lachbogh 'ej wembogh
DawI'; ben DaHjaj je, 'u'vaD qabna'Daj 'angmeH, quvvaD
batlhna'Daj 'angmeH, quvHa'ghachvaD porghDaj moH 'angmeH, chay'
chenpu' 'ej chay' tlhetlhtaH bov ro, lupDaj je, chaHvaD 'e'
cha'chu'meH Qu''e' ghaj DawI'. bIlachchugh pagh bIyapbe'chugh,
vaj bejwI' motlh DaHaghmoH 'ach noHchu'wI' DabepmoH neH.
bIqeltaHvIS, SoHvaD wa' noHchu'wI' yoj potlh law', qach naQDaq
latlhpu' yoj potlh puS. va, rut lachmo' DawI''e' vIbejbogh 'ej
naDqu'bogh latlhpu', vaj QI'yaH. tlhInganna' rurHa'qu' jatlhDI';
'ej tlhInganna', novna' ghap, yaghna' ghap rurHa'qu' jay' vIHDI'.
'ej Soy'chu'taHmo' 'ej chuSchu'taHmo' chaH, chenmeH chaH lam
lutlholHa'moHlaw'pu' yo' qIj jonwI' ghojwI'pu'. (lalDan
vItIchQo', 'ach) 'e' vIHarqang, ghotna' DaHa'qu'mo', DataHvIS
chaH.

D1: malIS'eghlaw'pu'neS.

Ham: toH, pelIS'eghchu' jay'. 'ej chIch ghItlh neH lupabnIS
HaghmoHbogh DawI'ra'. toH HaghmoHmeH HaghmoHwI', Hagh ghaH neH,
'ej lururmeH bejwI' Dogh, Hagh je chaH. 'ach HaghtaHvIS Hoch, lut
potlhmey'e' wej lumuchlu'bogh mIm. Hat 'ej tlhetlhHa'ghach neH
Hech Dupqoqvam lo'bogh qoH'e'. 'eH peDarupchoH.

[mej DawI'pu']

['el *polonyuS* *roSenQatlh* *ghIlDeSten* je]

toH jay', qaH, lutvam Qoyrup'a' ta'?

pol: ta'be' je --- SIbI'!

Ham: moDmeH DawI' tIra'. [mej polonyuS] moDmoHmeH, SuH, yItlhej
tlhIH.

cha': luq, joH.

[mej cha']

Ham: *Horey'So*! SuH!

['el *Horey'So*]

Hor: naDev jIH, joH. qatoy'rup.

Ham: *Horey'So*, SoH quv law', jIjatlhtaHmeH
ghot Hoch vIqIHpu'bogh quv puS.

Hor:                            toH, joH ---

Ham: qatoj 'e' yIHarQo'. chochepmoHlaH,
chay' 'e' vIHarlaH jIH? Soj, SutmeylIj je
Daje'laHmeH yapbe'ba' mIp Daghajbogh,
yabDotlhlIj QaQ qelbe'lu'chugh. *Horey'So*,
qatlh mIpbe'wI' vItojqang? va, patlh Dogh neH
roSnIS HaQchorHey jat. 'ej chep'eghmoHmeH
mIpqangbogh qIvDaj SIHmoH neH yuDwI'.
vaj naDDI', numchoHlu' 'e' tul. 'Ij'a'?
wIvlaHmeH ra''eghchoHDI' qa'wI' quv,
'ej ghotpu'vo' QaQwI'na' ngu'laHDI',
DuwuvmeH vaj DuDoQ, Dutu'taHmo'.
bIbechlaw'be', Hochmo' bIbechtaHvIS je.
DutIchDI' 'ej DunaDDI' San, ghu' Hoch
DaSIQmeH nIbtaH tlho'lIj. Do'bej ghot,
ghotvamDaq 'IwDaj, qelbogh laHDaj je
DuDlu'chu'chugh. QoQ vay''e' maSbogh lIngmeH,
lu'uymeH San nItlhDu', vaj, San chuS'ugh
DaQo' batlhghotvam. ghotvam'e' HI'ang.
'ej DotlhDaj nong toy'wI''a' puj DaQo'chugh,
vaj tIqwIj botlhDaq, tIq tIqna'wIjDaq
ghotvam vIqeng. HIja'. vaj SoH qaqeng.
'a pItlh. DaHjaj ram ta'vaD lutHom muchlu'.
vavwI' Hegh ghu' qaja'bogh Dellaw' 'ay'Daj.
qatlhob, jup. 'ay'vam muchlu' 'e' DabejDI',
QaptaHvIS tu'bogh qa'lI' laHmey Hoch,
ta'ma' yIqIm. wa' SoQ lumuchtaHvIS,
'ejyo'waw'vo' narghQo'chugh DujDaj DIv
reH So'taHbogh, vaj qa' quvHa' wIleghpu',
'ej tlhIvmo' qechmey Hoch vI'oghpu'bogh,
*bajor* mangghom lurur neH. ghaH yIqImchu'.
'ej qabDajDaq mInDu'wIj tIH vIpuS je.
'ej rInDI' ghu', chay' Dapu' 'e' wIchovmeH,
cha' yojmeymaj DIchelchu'.

Hor:                       lu', joHwI'.
lut muchlu'DI', batlhDotlhHey nIHchugh ghaH,
ghaH tu'lu'pa', vaj lojbogh Hoch vIDIlrup.

Ham: lutDaq chollI' chaH. pagh vIbuSlaw' 'e' vI'angnIS.
yIlan'egh.

[chuS yItmeH Qo'noS QoQ. chuS maqmeH QoQ. 'el ta', ta'be'
*polonyuS*, *'ovelya*, *roSenQatlh*, *ghIlDeSten*, latlhpu' je]

t: pIv'a' qorDu' ghotma', *Hamlet*?

Ham: pIv, pov. ghew vIDa, muDDaq ngoSpu'bogh 'Ipmey'e' vISopmo'.
to'baj nay' tamlaHbe'.

t: mu'wIj Daqelbe'law', *Hamlet*. mu'wIj jangpu'be' mu'lIj.

Ham: jangbe''egh je bIH. [*polonyuS*vaD] toH, ben DuSaQ'a'Daq
DawI' SoH, qar'a'?

pol: HISlaH, 'ej vIqellu'DI' DawI' QaQqu' jIH net noH.

Ham: 'Iv DaDa?

pol: *yulyuS* *qaySar* vIDa. monDaq jIHegh. muHeghmoH *beru'tuS*.

Ham: Sor rur ghaH, QamtaHvIS. yol yoSDaq qay' Sor. vaj val
HeghmoHwI'Daj. --- Darup'a' DawI'pu'?

roS: HISlaH, joHwI'. DaQoyqangchoH 'e' luloS.

tb: Ha' naDev, *Hamlet*oy, jIba'taHvIS HItlhej.

Ham: Qo', SoSoy QaQ, pa' jIghoS. muSIgh peQvetlh 'IHqu'.

pol: [ta'vaD pegh] toH Hu'tegh, yItu' jay'!

Ham: be'oy, 'uSDu'lIjDaq jIQot 'e' Dachaw''a'?

'ov: Qo', joHwI'.

Ham: 'a 'uSDu'lIjDaq nachwIj'e' vIQotmoH 'e' vIHech neH.

'ov: lu', joHwI'.

[*'ovelya* qamDu'Daq Qot]

Ham: ngaghlu' 'e' vIHech 'e' DaQub'a'?

'ov: pagh vIQub, qaH.

Ham: be' uSDu'Daq QotmeH QaQba' qechvam.

'ov: qech nuq, qaH?

Ham: 0 DaHub.

'ov: bItlhaQ, qaH.

Ham: 'Iv? jIH?

'ov: HIja'.

Ham: baQa', tagh QommoHwI''a'lI' jIH. Qombe'chugh taghDu', vaj
chay' jaS vanglaH porgh. toH, Quchqu'bej SoSwI' 'e' yItu', 'ach
Heghpu'DI' vavwI', qaS cha' rep neH.

'ov: ghobe', qaS loS jarmey, joH.

Ham: qaS'a'? Qo' jay', San Quch choS veqlargh. choS SutwIj
vItuQHa'. QI'yaH, Heghpu' Hu' ta', 'ej qaS cha' jar neH, wej ghaH
lIjlu'taHvIS. Heghpu'DI' DunwI', chaq batlh ghaH qawlu'taH,
qaStaHvIS DIS bID'e' net tul je. 'ach Hu'tegh, yuQmey pongnIS.
pongbe'chugh, vaj qawbe'lu' 'e' SIQ, 'ej qolotlh San ghaj. ghaH
qaw bom mu'vam'e' neH: "toH va, toH va, qolotlh pong gho'
*Serman*."

[chuS QoQ; 'el DawI' tam]

['el ta'qoq ta'be'qoq je. muSHa'chuqlaw' 'e' luDa. DeSDaq
QIDchuqmeH pachDu'chaj lo'. ta' qIvDu' jojDaq HIvmeH tor ta'be'.
ta'be' Hu'moH 'ej mong chop ta'. ta' woH 'ej yavDaq pummoH
ta'be'. belpu'mo' Qonglaw' ta' 'e' leghDI' mej ta'be'. tugh 'el
loD latlh. ta' mIv teq 'ej roS. ta' qoghDaq tar chagh 'ej mej.
chegh ta'be'. Heghpu' ta' 'e' leghmo' pe'vIl SaQ. 'elqa' chotwI'
tlhejwI' puS je. luvuplaw'. vIHbe'bogh ta' lomHey lunge'. ta'be'
bang moj 'e' nID chotwI'. nayqangmoHmeH nobmey Hev ta'be'.
lajqangbe', 'ach tugh latlh muSHa' ghaH 'ej bang DalI'bogh
chotwI''e' laj.]

[mej]

'ov: qaSpu' nuq jay', joH.

Ham: va, HeS'a' 'ong'e'. qaSbeH lot 'e' 'ang 'oH.

'ov: chay' lut'a' lumuch ghaytan 'e' QIj lutHomvam.

['el bomwI' ghom]

Ham: 'e' luQIjbej nuvvam'e'. peghlaHbe' DawI'pu'. Hoch luchID.

'ov: De''e' luja'meH nIDbogh DawI'vetlh luQIjqang'a'?

Ham: HISlaH, De' law' luja'mo', QIDtaHvIS chaH. bIQIDqangchugh
vaj bIghoj. QIDmeH 'ay'Du'lIj jej ghov QIjwI' 'ej ghojmoH.

'ov: bIQut, bIQut! DawI' lut'e' vIbej.

['el DawI' loS, lIHwI' DataHvIS]

lIHwI': DaH lutmaj 'It wIjeSqu'nIS.
checherghchoHmeH matortaHvIS,
gho'Ij. petuv. 'ej wej ghonIS.

[mej]

Ham: lIHbogh SoQ 'oH'a' QIchvam'e'? Degh mu'tlheghHom 'oH'a' neH?

'ov: nI'be', joH.

Ham: vaj be' muSHa'ghach rur.

['el ta'qoq ta'be'qoq je]

D1: wejmaHlogh bIQ SoD wIb, yuQ moQ je bavpu'
pemHov Duj; wejvatlh javmaHlogh DIS wavpu'
maSwovDaj ngIpbogh maS, rInpu'DI' ghu':
tIq muv tIq, bang DIDamo'. Qap je Qu':
matay'taH, tlhoghvaD muvchuqmo' ghopDu'maj.

D2: pIj maS pemHov je leng DItoghqa'pu'jaj,
rInpa' muSHa'ghachmaj! 'ach DaH bIropmo'
qaStaHvIS Hu', 'ej Dotlh ngo'vo' bIHopmo',
pay' bI'IQtaHvIS, QI'yaH! Qugh vIpIH.
toH, joH, jIpIHchugh jIH, vaj not DuQIH,
SaHqu'mo' be'nal, loD muSHa'taHvIS je.
muSHa'DI' be', 'ej SaHDI', rap. reH Dach cha',
pagh (qamuSHa'qu' 'e' Datu') reH lach cha'.
ngojDI' muSHa'wI', ngojnIS je SaHwI'.
muSHa'chugh nuv, vaj HajnIS HonchoHDI'.
'ach Hajqu'chugh ghaH, vaj muSHa'rupchu'.

D1: bangwI', va, tugh qalonnIS. puj 'ej ru'
porghlaHmeywIj. qo' 'IHDaq leS bImob.
bIquv. 'ej Do' DuSaw ---

D2:                      not latlh vIlob!
not tIqwIjDaq 'urmangvetlh web vIlaj.
loDnalqoq cha'mo' jIquvHa'nIS. vaj,
loD cha'DIch nay neH be' --- loD wa'DIch HoHDI'!

Ham: [pegh'egh] maQmIgh! maQmIgh!

D2: muSHa'be' be', tlhogh cha'DIch ruchmeH boHDI'.
'ej chepmeH neH quvHa''eghmoH. jImatlh!
loDnal vIHoHqa', wuSwIj chopDI' latlh.

D1: DaH vuD Daja' DaQubmo'. 'e' vIHar.
'ach nuQbogh nabmaj qIlmeH pIj maghar.
leS qawtaHghachmaj wuv DaH nabbogh Duj.
vIDqang 'oH boghDI', 'a wIDajDI' luj.
DaH naH Qup rur 'oH. SorDaq HuS, qar'a'?
'ach qanDI' pum 'oH, Sorchaj yuvlu'pa'.
Qu'maj DIlay'pu'bogh DIlIjnISlaw'.
chavvetlh, wIchuppu'bogh manongDI', Qaw'
SaHQo'ghachmaj, manongqu' 'e' wImevmo'.
Sorgh'egh Dotlh Quch, Dotlh 'IQ joq ral, QIt jevmo'.
lopchugh QuchwI', vaj SaQnIS je 'IQwI';
butlhmo' neH 'IQ yonwI' 'ej Quch 'ItwI'.
ru'nIS ngeHbejmaj. vaj Hujbe' wanI':
choH mamuSHa'ghach, choHDI' je San nI'.
wej ngoD wIwuq: muSHa'ghach wuv'a' San?
pagh, San wuv'a' muSHa'ghachvetlh? ghaytan
quvHa'DI' potlh, Haw' bangDaj. jup moj ghol
'e' SIgh mIpbe'pu'wI', ghaH DuvDI' yol.
San toy' muSHa'ghach. vay'vaD chaq 'utbe'DI'
reH SaHqang jup. jupqoq buDqu'ghach nge'DI'
vay', ghaHvaD tlhobmo', tugh jupna'vo' cheH.
'ach taghbogh DaqDaq SoQ vIrInmoHmeH:
Sanmaj DonHa'moH neHtaHghachmeymaj.
reH nabmeymaj Hoch ngeplu'. qech DIghaj
'ach qechvam ghochmey DIghajbe'. toH mub:
loD cha'DIch DanayQo' DaH 'e' yIQub.
'ach HeghnIS vuDvam HeghDI' je loD wa'.

D2: yavvo' Soj vISuqbe'jaj; Hurghjaj qa';
reH jIHvo' Quj leSpoH je nge'jaj moch;
jIvoqtaH 'ej jItul 'e' mevjaj ngoch;
bIghHa' Saj'uQ vIpIHjaj; qaqbogh ghu'
ghomjaj 'ej Qaw'jaj qab Quch ghol Hoch qu';
Dat naDev je mutlha'jaj nI'bogh Seng ---
be'nal vImojqa'chugh jIH. 'Ip vIqeng!

Ham: DaH 'Ip pabHa'jaj!

D1: bI'Ipchu'ta'. 'ach bang, DaH loQ HImej.
Doy'choHtaH qa'wI'. Qatlhmo' pem, jIDej.
vaj DaH jIQong.

[Qong]

D2:             bIQongDI', jotjaj yablIj.
lot vay'mo' qabwIjvo' Hopbe'jaj qablIj.

[mej]

Ham: joH, DubelmoH'a' lutvam?

tb: wejpuH Hoch 'Iprup be'.

Ham: 'ach 'Ip quvmoHbej ghaH.

t: lut DaSov'a'? luja'taHvIS HeS'a'?

Ham: ghobe' jay'! SaghHa' HeS neH. SaghHa' tar. HeSbe'chu'.

t: lutvam pong nuq?

Ham: "ghew jonwI'". toH, qatlh? wejpuH, lutDaj Del pongDaj.
romuluSDaq HoHwanI' rur lutvam. *ghonja'gho* ghaH
ta'qorDu'loD'e'; *batlhISta* ghaH be'nalDaj'e'. tugh Dabej.
HeSwI' ghu' luDel. 'a maSaHbe'ba'. ta', qa' chun polwI' je
ghob'e' muplaHbe'. chut DIlobbogh maH'e' nujoy'laHbe' pe'vIl nov
DIv DISmoHbogh tuQDoq'e'. ['el *luqyanuS*] *luqyanuS* ghaH.
ta'qorDu'loD ghaH je.

'ov: lut DaQIjmeH SoH val law', QIjbogh DawI' val puS.

Ham: SoH bangHeylI' je jojDaq Quj vIQIjmeH jIval je, taj'e'
vItu'laHchugh.

'ov: bIjej, jawwI', bIjej.

Ham: tajwIj DajejHa'qangmoHchugh bIboghnISmoH.

'ov: Dub 'ej Sab QIch.

Ham: nayqangmeH be' Dup SapmoH QIch. --- yIchot yIruch SoH.
Qu'vatlh, Ha'DIbaH qablIj tIlon 'ej yIruch. Ha', bortaS QaQ
jablu'DI' reH bIrqu' nay'.

D3: qech qIj, ghop po', tar 'um, poH lugh: Samuv.
boq jeS 'eb poH. 'ej DaH mulegh pagh nuv.
ramjep tI boSlu'mo' bIchen, molDargh.
wejlogh Dungej 'ej DunaDHa' veqlargh.
pay' pIvbogh yInDaj lurIHHa'meH jIj je
wIchlaHlIj motlh, ghIjbogh toDujHeylIj je.

[ta' qoghDu'Daq tar chaghmoH]

Ham: patlhDaj nIHmeH, ngemHomDaq QottaHvIS ghaHDaq tar chagh;
*ghonja'gho* 'oH pongDaj'e'. noy lut 'ej romuluSngan Hol pov lo'
qonwI'. ta'be' muSHa'ghach SuqmeH mIw'e' tugh Dalegh.

'ov: Qam ta'.

Ham: nuq? yay'moH ghum muj?

tb: joHwI' Dotlh nuq?

pol: lut rInmoH.

t: wov! tlheD!

Hoch: wov! wov! wov!

[mej Hoch, ratlhtaHvIS *Hamlet* *Horey'So* je]

Ham:	vaj rIQDI' Haw'jaj to'baj jay',
	'ej reHjaj pIvbogh Qa'.
	reH yepnIS vay'; reH QongnIS vay';
	reH ghu'vetlh ngo' wIma'.
chavvammo', Qa'pobngemmo' je vISuqbogh --- jIcho'meH SanHeywIj'e'
wa'leS Sorghchugh SermanyuQngan 'ej mInwIj nIjmoHlaHchugh Haq ---
vaj DawI'tlhoQDaq ghuv jIHlaH qar'a'.

Hor: ghuv bID SoH.

Ham: naQ jIH.
	loDnI', yISov: chIch wo'vamvo'
	qeylIS lunge'pu' chaH.
	povpu' voDleH, 'a DaH ghaH cho'
	'ej DaH wo' che' --- pujwI'.

Hor: bommu'tlhegh DarInmoHlaHchu'pu'.

Ham: majQa', *Horey'So*, lom qa' 'Ip quv law', may'vaD SuvtaHbogh
wa'SanID 'utlh quv puS. Datu''a'?

Hor: vItu'chu', joHwI'.

Ham: tar mIw vIDelDI'.

Hor: ghaH vItu'chu'qu'.

Ham: Hu'tegh! Ha' QoQ! Ha' chuS'ughmey.
     toH, lutmaj parchugh ta',
     ghaytan vaj --- par, baQa'!
Ha' QoQ.

['elqa' *roSenQatlh*, *ghIlDeSten* je]

ghIl: qaH, mapeghchuqjaj.

Ham: vaj gharwI' SoQ naQ vI'Ijqang je.

ghIl: toH ta' ---

Ham: ghaHvaD qaS nuq jay'?

ghIl: pa'DajDaq ghaH ngejqu'lu'law'.

Ham: chaq ngej ghew.

ghIl: ghobe', joH; QeH.

Ham: bIval 'e' DatobmeH, QelvaD bIja'nIS. toH, ghew QeHvo' ghaH
vIvormeH jInIDchugh jIH, vaj ghaytan ngejtaHbogh ghew puq
vISepmoHqu'. lumej bIH 'ej tugh chegh, tlhejtaHvIS porghDaj
yIvqangtaHbogh ghew negh'e'.

ghIl: joHwI' QaQ, meqDaq SoQlIj yIlan, 'ej pay' Qu'wIj yIjunQo'.

Ham: jIjotneS. yIjatlh.

ghIl: ta'be'vaD, SoSlI'vaD nuQlu'mo' 'ej qay'lu'mo', SoHDaq
mungeHta' ghaH.

Ham: majQa'.

ghIl: ghobe', DaH jInaD 'e' vIHechbe'. 'ach chojangqangchu'chugh
vaj SoSlI' vIloblaH. bIjangchu'Qo'chugh vaj rInmeH mIwvam
bIchaw'jaj 'ej jImejjaj.

Ham: qaSlaHbe'.

roS: nuq'e', joHwI'?

Ham: jIjanglaHchu'be'. pIvHa' yabwIj. 'ach jIjanglaHmeH
jInIDqu'qangmo' chaq cho'Ij, pagh mu'Ij SoSwI''e' (pongHeyDaj'e'
Dalo'pu'bogh). 'a yap. vaj yIjatlhqa'. Dajatlh, SoSlI'vaD nuQlu'
---

roS: jatlh ghaH: nuq Da *Hamlet*? Damo' muyay'moHpu' 'ej
muSIvmoHpu'.

Ham: puqloD yaymo' SIvnISbe' SoS. 'ach DaH SoSwI'vaD nuq qaSmoH
yay'moHlaw'pu'bogh wanI'wIj'e'? yIja'.

roS: pa'DajDaq Suja'chuq neH ghaH, bIQongchoHpa'.

Ham: 'e' vIlobchu', wa'maHlogh SoSwI''e' (pongvetlh Dalo')
ghaHchugh. latlh tujatlhnIS'a'.

roS: joHwI', ben choparHa'.

Ham: DaH qaparHa'taHmeH je jagh HuH lungaS ghopwIj.

roS: pIvHa'moHwI'lIj nuq? Dotlh pIvDaq lojmIt DawaQ, juplI'vo'
qay'wI'meylIj Dapeghchugh je.

Ham: qaH, qaSHa' cho'wIj.

roS: 'a qItbe' ghu'vam, Qo'noSDaq bIcho'meH ta' woQna' 'oHmo'
woQlIj'e'.

Ham: HIja', qaH, 'ach "yaptaHvIS loSpev" --- mu'tlheghvam noy
DaSovbej.

['el chuS'ughmey qengbogh DawI'pu''e']

toH chuS'ugh! wa' HInob. 'a qapegh: nIteb jIjuntaHvIS, qatlh
choyu'meH bIjonqang?

ghIl: baQa', qaqeSmeH chaq jIvaQ, vaQmo' je parHa'ghachwIj neH.

Ham: 'e' vIyajchu'be'. chuS'ughvam Damup'a'?

ghIl: joHwI', laH vIghajbe'.

Ham: yImupneS.

ghIl: laH vIghajbe' jay'.

Ham: qara'neS.

ghIl: vImupmeH mIw vISovbe'.

Ham: mupmeH mIw ngeD law', nepmeH mIw ngeD puS. naQvam DaQoDmeH
nItlh tIlo'. tlheghmeyvam DabommoHmeH naQ yIlo'. vaj QoQ 'IH
lIng. SuH, QoQSeHlaw 'oH Dochvam'e'.

ghIl: 'ach 'IHmeH QoQ vIQoDlaHbe'. vImupmeH jIpo'qu'be'.

Ham: vaj chorammoH. jIH choqelDI' chuS'ugh neH Datu''a'? jIH'e'
chomupqang; tlheghmeywIj DachuSqangmoHlaw'; SengwIj ghogh
DabomqangmoH; Se'wIj DalISmeH jIH choQoDqang; ghogh
'IHqu' lInglaH chuSwI'vam mach, 'ach 'oH DajatlhmoHlaHbe'.
Qu'vatlh, jIH chomupmeH mIw ngeD law', chuS'ugh DamupmeH mIw ngeD
puS, 'e' DaHar'a'? chuS'ugh vIrur 'e' DaqaSmoH --- jISaHbe';
Se'wIj DalISmeH SeHlaw'e' Daghaj 'ach choSeHlaw' 'e' vIchaw'Qo'.
['el *polonyuS*] pIghov, qaH.

pol: joHwI', Dujatlh neH ta'be'. SIbI'!

Ham: loQ Qogh rurbogh 'engvetlh Dalegh'a'?

pol: Hu'tegh, Qogh rurbej 'oH.

Ham: 'er'e' rur 'e' vItu'.

pol: 'er Dub ghaj.

Ham: ghargh ghap rur.

pol: ghargh rurbej.

Ham: vaj tugh SoSwI' vIghoS. [pegh'egh] muDoghmoHlaw'mo'
jIpuQqu'. --- tugh vIghoS.

pol: vIja'.

Ham: ngeD "tugh" jatlhmeH Qu'. HImej, juppu'wI'.

[mej Hoch, ratlhtaHvIS *Hamlet*]

Ham: DaH qaS wIchHoSmey rep. DaH Hoblaw' molmey.
DaH qo'Daq ngejmeH tlhIchDaj tlhuchlaw' ghe''or.
DaH 'aD 'Iw tuj vItlhutlhlaH. 'ej jIwemchu'
DaH 'e' vIvanglaHmo', vaj HajnIS pem,
'oH leghchugh neH. SoSwI' pa'Daq jIjaHnIS.
'eH, tIqwIj, matlhbogh laHlIj yIchIlQo'.
not rowIj letDaq 'eljaj *molor* qa'.
jInaSjaj, 'ach HeS'a''e' vIta'Qo'jaj.
tajmey vIjatlhnIS, 'ach pagh taj vIlo'nIS.
Qu'vaD mIyjaj neH jatwIj, qa'wI' je.
mu'wIjmo' tuHjaj ghaH. 'ach mu'wIj tob
ta'wIj'e' --- qa'wI', 'eH, not 'e' yIlob.

[mej]

lut 'ay' wej.
lut 'ay'Hom wej.
ta'qach'a' pa'.

['el ta', *roSenQatlh*, *ghIlDeSten* je]

t: mubItmoH ghaH. 'ej jIHvaD QIHtaH ghu',
wej DotlhDaj maw' vIweghtaHvIS. vaj SuH:
tugh Qu'ghItlhraj vIqeqta', 'ej tera'Daq
lItlhejnIS ghaH. Huy'Du'Dajvo' chen Qob,
qaSDI' rep Hoch. 'ej jIH muSumqu' Qobvetlh
'e' SIQlaHbe'bej ta'Dotlh.

gh:                        Qu' wIQorghchu'.
je'meH 'ej yIntaHmeH, nIwuv ghot law'qu'.
Qobvo' DIleHneSmeH, lalDanvaD potlhqu'
'ej quvqu' Qu'.

roS: reH lotvo' leH'eghmeH, yab yoD, HoS Hoch je
lo' wa' yInwI' neH ram. vaj lo'nISba'
qa' Dunqu' --- cheptaH ghaH reH 'e' luwuvmo'
yIn law', 'ej Do' ghaHmo' chaHvo' Hop QIH.
rInDI' ta' poH, nIteb Heghbe'ba' ta'Dotlh.
luSpet Da. Sumchugh vay', vaj Hochchaj tlha'moH.
gho'a' 'ugh rur ghaH. 'ej HuD jenqu' DungDaq
'oH lanlu'law'. ghonaQmey tInqu'Daq
muvchuq 'ej HuStaH wa'netlh Dochmey ram.
vaj pumDI' gho, pe'vIl QIH chuS lutlhej 
chachmey mach Hoch, tlha'wI'pu' ramqu' Hoch je.
vaj not nIteb vIng ta'. DaH 'ItDI' potlh,
tugh bepnIS je mangghom, 'ej jegh vaj rotlh.

t: tera'Daq nom SulengmeH, 'eH, peghuHchoH.
DaH tlhabqu' Qob qamDu'Hey. DaH Dat yIt.
'a tugh qamDu'Daq mIr wIlan.

roS, gh je:                  mamoDlI'.

[mej *roSenQatlh* *ghIlDeSten* je]

['el *polonyuS*]

pol: joH, SoSDaj pa'Hom ghoS. wanI' vI'IjmeH
tugh HaSta'a'DajDaq jISo''eghneS.
ghaH qunqu'bej ta'be'. 'ej vuD Daja'pu',
'ej valqu' vuDlIj: ja'chuqtaHvIS chaH,
QIchchaj 'Ijbe'nIS SoSDaj neH, qar'a';
SoS SIghtaHmo' qorDu'. 'ej boQbogh DaqDaq
Hoch DaqnIS vay'. vaj qamej, ta' quv.
qaSuch, QongDaq DaghoSpa'. 'ej qaSuchDI'
SoHvaD De' Hoch vIQum.

t:                     qatlho', jawwI'.

[mej *polonyuS*]

t: He'So'ba' HeSwIj. va, QI'tu'Daq He' je.
naDHa'ghach wa'DIch ngo'mo' bechmoH 'oH.
loDnI' vIchot! qa''a'pu'vaD jItlhob
vIneHqu'bej vIHechDI', 'ach jIluj.
vIHechmeH HoSwIj jey jIDIvmeH HoS.
'ej cha' malja'vaD vumnISwI' vIrur:
Qu' wa'DIch 'oH nuq'e' QIt 'e' vIqelDI',
jIyev, 'ej tugh cha' Qu'vetlh vIqImHa'nIS.
loDnI'wI' 'Iwmo' jeD quvHa'bogh ghopvam
net tu'chugh je, vaj ram, qar'a'? chal quvDaq
SISbeHba' bIQ; peDwI' chIS rurmeH ghopwIj,
Say'moHmeH yap, qar'a', tugh SISbogh bIQ.
HeS qabHey puSmeH 'oH, qar'a', pung tu'lu'.
'ej cha' Qu' ta'meH, qa''a'vaD tlhob Hoch,
qar'a'? wIbotlu'meH, mapumruppa',
pagh, wInoDHa'lu'meH, mapumpu'DI'.
vaj chal vIbejjaj. pIch vIqIlbej rIntaH.
'ach DotlhwIj ngo' vIleHmeH, chay' jItlhoblaH?
"jIchotmeH jIquvHa' 'e' yInoDQo'."
DuHbe'. mIp law' vIghajchoHmeH jIchotpu'.
'ej mIpvetlh Hoch vIghajtaH: ta'DotlhwIj,
Hoch'e' vItulbogh je, ta'be'nalwI' je.
chay'? toH, wej HeSDaj pop ghajQo'chugh vay',
vaj ghaH noDHa'laH'a' ruvpIn? vIchID:
pIj qo'vam mIwmey qalDaq, ruv lujotlhlaH
DIlbogh HeSwI' DeQghopqoq. 'ach veqlarghvaD
moSlaHlaw' pagh. pa' tojlaH pagh 'oghwI'.
pa' ta'meymaj Dotlhna''e' leghlaH Hoch.
'ej pIchmeymaj Ho' QuchHey je DIbej
net ra'taHvIS, mapum'eghchu' net raD.
tlha' nuq? ratlh nuq? toH, vay' vIchavlaHchugh
jIpayDI', vaj vInIDjaj. SuH, vInID!
Hoch vanglaHlaw' paywI' jay'! 'ach nuq vanglaH
paylaHbe'wI'? baQa', Dotlh 'It! baQa',
Hegh rurbogh tIqwIj qIjqu''e'! baQa',
qa'wI''e' jonlu'law'bogh! bItlhabqa'meH
bInoghDI', vaj Dubaghqu'choH jonwI' jan!
HIQaH, boQqa'pu'! SuH, jInIDqu'jaj!
peSIH, qIvDu'wIj mul! baS tlhogh Daghajlaw', 
tIqwIj. yItun, 'ej ghu Somraw yIrur.
tugh QaQjaj Hoch.

['o'Daq jaH 'ej tor]

['el *Hamlet*]

Ham: DaH jIHvaD ngeDqu' Qu'. DaH tlhobtaH ghaH.
vaj DaH vIta': yo' qIjDaq Suvjaj ghaH.
chay'! mIwvammo' bortaSwIj vIchav'a'?
vIqelqu'nIS. vavwI''e' HoH taHqeq.
puq latlh ghajbe' vav. HoHpu'mo' taHqeqvetlh, 
yo' qIjDaq ghaH vIngeH.
vaj ghaHvaD boQ vIDIllaw'! luj bortaS jay'!
vavwI''e' chotmeH merDI', pI' vavwI',
'ej Suvrupbe'. HeS yembogh payta'meH
'eb SuqlaHbe'. 'ej lomDaq jach pagh vaj.
chay' ghaH lulajpu' yo' qIj negh, pa' pawDI',
vaj 'e' luSovlaw' chaH, pagh latlh je. 'ach,
ghob nuq wIHar 'ej chay' yo' qIj wIloy
net qelchugh, vaj DaH ghaHvaD 'ughlaw' ghu'.
'ach DaH bortaS vISuqmeH, vIHoH'a',
qa'qoqDaj Say'moHtaHvIS? vIHoH'a',
yo' qIjDaq tlheDmeH ghuHDI' ghaH 'ej 'umDI'?
Qo'.
Ha', 'etlh, qaroQ. Qu' naSvaD tugh qalel.
chechDI', pagh, QongDI', vupDI', pagh, QongDaqDaq
qorDu' ngaghwI' HeSbelmey tIvtaHvIS;
SuDtaHvIS, ghartaHvIS; ta' vay''e' vangDI',
ghe''orvo' qa'Daj pollaHbe'chugh ta'vam.
'ej qaSDI' ta'vam 'eb, SIbI' yImagh. 
DaqIpDI', chalDaq pupqu'jaj qamDu'Daj. 
vaj webmo' 'ej He'So'mo' qa'Daj non,
ghe''or'e' rurbej, ghe''or ghoStaHvIS.
muloStaH SoS. qa'lI'vaD, wej bIlImmeH
ghobHergh Danoblaw'. 'ach bIHegh 'e' mIm neH.

[mej]

t: [Hu'] puv mu'meywIj, 'ach bIngDaq ratlhtaH yab.
mu'mey DorQo'DI' yab, QI'tu'vo' ngab.

[mej]

lut 'ay' wej.
lut 'ay'Hom loS.
ta'be' pa'Hom.

['el ta'be' *polonyuS* je]

pol: naDev tugh chol. SuH, ghaH yIqunqu'neS.
yIja'neS: "tlhIvqu'pu'mo' QujlIj taQ,
luSIQlu'Qo'. 'ej SoH, QeHtuj je botlhDaq
jIQampu' 'ej qayoDpu', yoD DaraDmo'."
naDev jItam'eghmoH. qatlhob, joHwI':
ghaHvaD yIvaQ, bIjatlhDI'.

Ham: ['o'vo'] SoS! SoS! SoS!

tb:                        DIch yIghaj.
'ej HIHonQo' --- yISo''egh. chollI' ghaH.

[HaStaDaq So''egh *polonyuS*]

['el *Hamlet*]

Ham: toH, SoS, qay' nuq?

tb: *Hamlet*, vavlI' Damawqu'bejpu' SoH.

Ham: SoS, vavna'wI' Damawqu'pu'neS SoH.

tb: Ha', Ha'. bIjangDI' Doghlaw' jatlIj jay'.

Ham: va, va. bIyu'DI' mIghlaw' jatlIj jay'.

tb: toH, *Hamlet*! chay'!

Ham:                      nuqneH?

tb:                               cholIjlaw''a'?

Ham: Qu'vatlh! ghobe'. qalIjta'be', joHwI'.
ta'be' SoH. loDnallI' loDnI'qoq be'nal.
SoSwI'Hey SoHlaw' je. Do'Ha'.

tb:                           baQa',
nIvuvmoH lobmoHwI' tugh 'e' vIpoQ.

Ham: yIba'. Ha'. naDevvo' bIvIHchoHbe'.
'ej bItlheDbe', HotlhwI' vIchenmoHpa'.
HotlhwI'vetlhDaq tIqlIj Somraw DaleghlaH.

tb: QI'yaH! DaH nuq Davangqang? chochot'a'?
QaH! QaH! 'eH!

pol: ['o'vo']  QI'yaH! QaH!

Ham:                        ['etlhDaj lel] chay'? jach'a' 'er? 
DaH Hegh ghaH! 'e' vISuDmeH DeQ vInobrup!

[HaSta bIngDaq DuQ *Hamlet*]

pol: ['o'vo'] Hu'tegh! muHoHpu'! [pum 'ej Hegh]

tb:                                 QI'yaH! nuq Data'?

Ham: Sovbe'. va, ta' ghaH'a'?

tb: chav boH, chav ralqu' je Data'!

Ham:                                chav ral.
'ej mIghmo' chavwIj, HeSlIj rurlaw' 'oH.
ta' HoHlu', 'ej loDnI'Daj naylu' je.

tb: ta' HoHlu'!

Ham:            mu'tlheghvetlh vIjatlhbejneS.

[HaSta teq, 'ej *polonyuS* tu']

qoH puj, qoH boHqu', nISbogh qoH, Qapla'!
mochlI' SoH 'e' vIHar qaleghchu'pa'.
SanlIj yIlaj. De' pegh DaSovqangDI',
vaj chaq Do'Ha' DaH 'e' Datu'. yImev.
ghopDu' DaqIptaHmo' tIQopmoHQo'.
yIba'. DaH tIqlIj'e' vIQopmoHnIS.
vIQopmoHbej, Somraw Hap ghajchugh 'oH,
'ej pay 'oH wej 'e' nISqu'chugh 'ej botchugh
Dotlh motlh quvHa'qu', tIqlIj letmoHpu'mo'.

tb: HeS nuq vIta'pu'mo', mupummeH rIntaH
chuS jatlIj tlhIvqu' 'e' DangIl?

Ham:                             ta' mIghqu'.
quvmoH 'ej tuHlaH batlhmaj 'e' ghItlhHa' 'oH.
ngeb matlhwI' Hoch 'e' maq. bang Quch chun 'IHvo'
Hommey ghegh teqDI', tam naDHa'ghach Degh.
tlhogh 'Ipmey nepmoHmo', SuDwI' 'Ip rurchoH.
baQa'! paywI' tay'a' porghvo' qa''e'
yaHmoHbej ta'vetlh. 'ej verengan ghItlh neH
moj je lalDanmaj quv. wew chal je, tuHmo'.
va, ta'vetlh qelDI', Haj je yuQmaj Sub.
'IQmo' tlhoQ'a'vetlh mIn, San bIjHey pIHlaw'.

tb: va, lIH'eghtaHvIS chuS 'ej buQ ta' nuq?

Ham: naDev, 'eH, Deghvam, Deghvetlh je yIlegh.
DeghmeyDaq cha' loDnI'pu' HotlhmeH 'oghlu'.
Huy'vamDaq ba' batlhna', 'eH, 'e' yIlegh.
qeylIS Quch. *ghorqon* jIb. ra'meH 'ej buQmeH
veSmey joH'a' mIn. Qumbogh qa''a' 'uS,
chal yuvbogh HuDDaq ghoSmeH moDta'DI'.
chenchu'mo' ghaH, 'ej joDaj DuDlu'chu'mo',
loDna' ghaH, qo'vaD 'e' lu'olmeH woQ
lunoblaw' qa'pu'. loDnallI''e' ghaHpu'.
tlha'wI' yIqIm. DaH loDnallI''e' ghaHtaH
chovnatlhvetlh'e'. loDnI'Daj pIvqu' ngejmeH,
pomrop tIr'etlh Da. mIn Daghajbe''a'?
HuDHeyvam 'IH DalonDI', Debvetlh moHDaq
bIrorchoH'a' 'ej pa' bISopqang'a'?
Ha'! mIn Daghajbe''a'? bImuSHa''a'?
net HarQo'. DotlhlIj qan'e' SIchlu'DI',
jot 'ej HemHa'nIS reHpu'bogh 'Iw tuj,
'ej chay' noH yab 'e' lob. 'ach ghotvamvo'
ghotvetlhDaq gho'ta'meH qatlh noHqang yab?
bIQublaHba'. bIQublaHbe'chugh, vaj
bIvIHlaHbe' je. 'ach bIQubmeH laH
roSHa'moHlu'law'. Qaghchugh je maw'wI',
'ej vay' yab che'chugh je valHa'ghach jay',
vaj pIm ghotpu'vam tugh net ghovba' je,
wej lojchu'mo' wIvmeH laH Hoch. Dutojpu'
veqlarghHey 'Iv, "leghbe'bogh wIv" DaQujDI'?
QIpqu'meH mISlaHbe' HotQo'bogh mIn,
bejQo'bogh nItlh joq, cha' teSDu''e' joq
ngaqQo'bogh mIn nItlhDu' joq, wa' ghIch'e' joq
ngaqQo'bogh Hoch, nochDu'lIj 'ay'Hom rop joq.
qatlh bIDoqQo', Dotlh tuH?
lotlhtaHbogh ghe''or, chuQunbe' HomDu'
DaqIQmoHchugh, vaj meQlI'bogh Dotlh QupvaD
weQ rurjaj batlh. 'ej qulDajDaq neH tetjaj.
vaj petuHQo', lIraDDI' 'IwlIj tujqu';
ngaghqangmeH meQtaHmo' je SISbogh chuchHey;
ngaghwI'Du' toy'taH neH meqlaH ---

tb:                                'eH, Hamlet,
yIjatlhlI'be'. qa'wI' lutu'taH mInwIj
DaraDmo'. ghItlhmey qIjqu' Sub vIlegh.
bIH Say'moHlaH qoj teqlaH pagh.

Ham:                            QongDaq
ghIHqu' porghbIQ He'So'Daq yInlu' neH.
naDHa'ghach'a'Daq yIQlu'. targh puchpa'Daq
yachchuq 'ej chopchuq ---

tb:                       jIHvaD yIjatlhQo'.
teSDu'wIj 'elDI' mu'vam, taSmey Da.
yImev neH, *Hamlet* 'IH.

Ham:                     chotwI', mIghwI' je.
toy'wI''a' neH ghaH. wa'ben loDnallI' Dun
bID bID vatlhvI' ghaHbe' je. qoH voDleH ghaH.
chIch wo'vaD qumvaD je nIHwI''a' Da:
beQwI'vo' ta'mIv wagh'e' nIHpu'DI',
yopwaHDajDaq 'oH So'!

tb:                   yImev!

Ham:                         tera'
voDleHqoq Da neH ---

['el lomqa']

HIboQ, 'ej DungwIjDaq telDu' tIpuvmoH,
chal'a' 'avwI'pu'! nuq DaneHneS, joH?

tb: QI'yaH, DaH maw'.

Ham: moDHa'bogh puq DaqunmeH DaH bIchol,
qar'a'? loSqu'mo' 'ebwIj, DotlhwIj nong je,
HajmoHbogh Qu'wIj pav Dara'pu'bogh
vImIm neH. Ha', yIja'!

lom: Qu' yIlIjQo'. jejHa'choH neHtaHghachlIj.
vIjejqa'moHmeH neH qaSuch. yIqIm!
SoSlI'Daq Danqu' yay'meH Dotlh. yIHu'.
Suv'eghbogh qa'Daj 'It yInIS. porgh pujDaq
HoSqu' qech Qobqu'. ghaHvaD, 'eH, yIjatlh.

Ham: nuqneH, joHwI'?

tb:                  baQa', nuqneH, Do'Ha'wI'?
logh chImDaq neH mInDu' DaQeqlaw'taH,
'ej pagh porgh ghajbogh muDvaD neH bIjatlh!
mInDu'lIjDaq jotHa'qu' bejbogh qa'lI'.
'ej Qongbogh negh, pay' ghumDI', Dalaw' jIblIj.
QottaHvIS, yInchoHlaw' porgh'ay'vetlh buD:
yay'law' 'ej QamchoH 'oH. yIjot, puqwI' quv.
tujlI' 'ej meQlI' QeHlIj. DaH meQHa'meH
QeHlIjDaq tuvbogh bIQHey yIghomHa'moH.
nuq'e' Dabej?

Ham: ghaH'e'! ghaH'e'! yIqIm neH. chIS 'ej qej.
muvchuqmo' porghDaj, Qu''e' Hechbogh je,
vaj naghmey ra'DI' je, lujangqangbej. ---
'eH, HIbejQo'. Qu' Sagh vIHechtaHbogh
DachoHlaH, vupmoHlaHmo' Dotlh DaDabogh.
jIvupDI', loj jIvangnISmeH qab qu'.
'ej pumnIStaHvIS 'Iw, chaq pum mInbIQ.

tb: 'IvvaD QIchvam Dajatlh?

Ham:                        pagh Dalegh'a'?

tb: paghna'. 'ej Doch Hoch tu'lu'bogh vIlegh.

Ham: pagh DaQoy'a' je?

tb:                     maH vIQoylaH neH.

Ham: Ha', pa' yIqIm! Ha' So''eghtaHvIS mej!
yIntaHvIS Sutmey tuQbogh tuQ vavwI'!
yIqIm! DaH mej ghaH! DaH lojmItDaq mej!

[mej lomqa']

tb: wanI'vam 'oghbejpu' yabqechlIj neH. 
HoSDo'Hey chenmoHmeH reH po' Dotlh maw'.

Ham: maw''a'?
tIqlIj rur tIqwIj, Se'Daj moDmoHbe'mo',
'ej pIvmo' QoQDaj. maw'pu'be'neS QIchwIj.
HIngong! 'ej ghu' vIja'meH mu' vIjatlhqa',
mu'vetlh pabbe'nIStaHvIS Dotlhqoq maw'.
SoS, quv yIquvmoH. SoHvaD jatlh Dotlh maw',
'ej jatlhbe' HeSlIj, qa'lI'Daq 'e' maqmeH
DunaDbogh Herghvetlh yIngoHQo'. Daq ragh'e'
So' neH 'ej yoD 'oH, porghlIj ngejtaHvIS
rolIj QanHa'lI'bogh quvHa'ghach yuD'e',
'oH leghlu'be'taHvIS. chalvaD yIDIS.
qaSpu'bogh ta' tIpay. qaSbeHbogh ta'
tIjunchoH je. 'ej webqu'meH nov tI
bIHDaq chorDI latlh yIlanQo'. toH, SoS,
jIquvqanglaw' 'e' yIbIjQo'. baQa'!
bIjQo'meH, HeSvaD tlhobnISlaw' je batlh, 
reH pI'taHvIS tlhuHHa'bogh bovvam! vannIS!
'ej HeS vor batlh, net chaw'meH naDnIS je!

tb: va, *Hamlet*, jIHvaD bIDDaq tIq Dachevta'.

Ham: Ha', bIDDaj qab yIwoD. bID latlh Dapolmo',
bIquvtaHmeH yIyIn. Qapla'. 'ach SoS,
vavloDnI'wI' QongDaqDaq yIjaHQo'.
wej quvvam'e' Daghajchugh, vaj yISuq.
mIwmeymaj motlhmoHmeH veqlarghHey Da,
'ej qay' 'e' tlhojbogh laHmaj Sopchu'lI'
tIgh buD. 'ach Qu'vamvaD QI'tu'ngan Da 'oH:
QaQbogh 'ej quvbogh ta' DIvangtaHmeH
HIp mop joq nob je. tuQmeH ngeDqu' bIH.
DaHjaj ram yIngaghQo'. bIngaghqa'Qo'meH
'eb latlhlIj ngeDmoH ghu'. tugh ngeD 'eb Hoch.
Duj'e' ben ghItlhbogh Sanmaj choHlaHlaw'
ghu' motlh. vaj veqlargh'e' Do' SevlaH 'oH,
pagh, ghImmeH rIntaH, merqu' HoSDaj. toH,
Qapla'. DunaDchoH bortaSqa' DaneHDI',
chonaDqa' 'e' vItlhob. jaw HoHvam'e' ---

[*polonyuS* 'ang]

vIpay. 'ach SanvaD belmoHlaw' wanI'vam.
SanvaD vIbIjlaw' 'ej mubIjlaw' lomvam.
vaj SanvaD 'oy'naQ 'oy''utlh je vIDa.
lomvam vIlan. 'ej ghaHvaD Hegh vInobmo',
jIbechnIS. pItlh. qaboQmeH neH qabuQ.
DaH qaSnIS Qugh, 'ach Do' lot latlhvaD SuQ.
'ach wa' mu' latlh vIja'neS.

tb:                          nuq vIvangnIS?

Ham: not Qu' vIDelchoHbogh tIvangbej. 'eH:
QongDaqDajDaq Dutlhu'qa'moH ta' ror.
bIngaghqangmeH qevpoblIj qIp. "ghghgh" jatlh.
'ej wuSlIj chopmeH ghIHDI', monglIj'e'
yachmeH ghaH, nItlhDaj webqu' lo'taHvIS,
ghaHvaD ghu' naQ DayajmoHlaH 'e' pon:
maw'be'taH DotlhwIj, 'ach jImaw'law'meH
jI'ong. maj! ghaHvaD 'e' yISovchoHmoH.
chIch yIntaghvo', targhna'vo' ghu'vetlh potlh
qelnISbogh peghba'Qo' ta'be'nal 'IH,
ta'be'nal quv, ta'be'nal valqu' je.
not peghba'. yab peghDuj je yIlobQo'.
qach DungDaq mo' yIpoSmoH. Haw'meH puvjaj
chalHa'DIbaHmey. 'ej qoH noy yIDa.
bIngongmeH, mo' yI'el. 'ej ghorjaj monglIj,
bIpuvchoH 'e' DanIDDI'.

tb: tlhuHmeymo' chenmo' QIchmaj, 'ej yInmo'
chenmo' je tlhuHmeymaj, vaj DIch yIghaj:
QIchlIj choja'pu'bogh vIja'qa'meH
yInlaH pagh tlhuHwIj.

Ham: tera' vIghoSnIS. DaSov'a'?

tb:                             va, QI'yaH,
vIlIjpu'. wuqlu'.

Ham:              SoQtaH pum peghghItlh.
'ej ghItlh luqeng cha' DuSaQjupqoqwI'.
vIvoqchugh, vaj verengan'e' vIvoqrup.
HewIj luHuvmoHlI' 'ej tojbogh nabvaD
muDevlI' chaH. toH ruchjaj. tlhaQbej ghu',
ngattej luSangchu'DI' jorwI'mey lanbogh.
'ej chIch jorwI'meyHeychaj bIngDaq 'och
vIchenmoHbe'chugh, 'ej, ngat latlh vIyongDI',
maSDaq chaH vIjorbe'chugh, vaj jItlhIb.
Do' vaj, wa' Qu'vaD muvchuqDI' 'och nIb.
mumoDnISmoHlaw' ghotvam.
retlh pa'HomDaq chorDu' vIteq. Qapla', SoS.
DaH tam 'ej Sagh 'ej peghqanglaw' qeSla'.
'ach yIntaHvIS, jawbogh Qovpatlh Dogh Da.
Ha', jaw. DaH rInjaj ja'chuqghachmaj nI'.
Qapla', SoS.

[nIteb mej chaH, pa'Daq *polonyuS* lom teqtaHvIS *Hamlet*]

lut 'ay' loS.
lut 'ay'Hom wa'.
ta'qach'a' pa'.

['el ta', ta'be', *roSenQatlh*, *ghIlDeSten* je]

t: vay' Qumbej tlhutlhmeylIj Datlhovqu'bogh.
tImugh. vIyajnIS. nuqDaq ghaH puqlI''e'?

tb: loQ maHvaD Daq yIjegh.

[mej *roSenQatlh* *ghIlDeSten* je]

tb:                        ghuy'cha', joHwI',
DaHjaj maQmIgh vIleghpu'!

t:                        toH, nuq, *ghertlhuD*?
chay' *Hamlet*vaD tlhetlh ghu'?

tb:                              SuS, ngeng joq Da,
'Iv HoS law' 'Iv HoS puS, pay' 'e' lughoHDI'.
maw'qu' ghaH. chut lobHa'taHvIS yab Sab,
HaStawIj bIngDaq vIHchoH vay' 'e' 'IjDI',
pay' 'etlhDaj lel. pay' jachchoH "ghew! vIH ghew!"
'ej qechvam mulqu' najtaHvIS, qup QaQ'e'
wej leghbogh HoH.

t:                HeS'a'! 'ej jIHvaD qaS je,
jISaHchugh neH. Hochma' nubuQtaH tlhabDaj.
SoH, jIH je, Hoch je buQlI' ghaH. baQa'! 
chay' 'Iwvam chav vIQIj? tugh jIH vIpumlu'.
QupwI'vetlh maw' vISeHmeH 'ej vIvuSmeH,
Hochvo' vIweghlI'meH leSSov vIghajnIS.
'ach vIparHa'qu'mo', chay' ghaH vIvornIS
'e' vIyajQo'. rop web SIQwI' vIDapu'.
Sovbe'meH latlh, chIch ropvaD yInwIj 'Iw
vIje' je, reH vIpeghtaHvIS. DaH nuqDaq?

tb: lom HoHbogh rIntaH lellI'. tlhIlHey ramDaq
baS SuD'e' rur ghaH, 'ang'eghchu'mo' batlhDaj,
maw'taHvIS je ghaH. paymo' SaQtaH ghaH.

t: va, *ghertlhuD*, Ha'. mamej.
HuD HotchoHDI' pemHov, nom naDevvo'
vIngeHnIS. 'ej HeSchavvam mIgh vIngoy'meH,
'ej 'oH vIQIjmeH, ta' Dun po' vIDanIS.
'eH, *ghIlDeSten*!

['elqa' *roSenQatlh* *ghIlDeSten* je]

                   juppu', boQwI' tImuvmoH.
*polonyuS* HoHpu' *Hamlet* maw'taHvIS.
'ej SoSDaj pa'vo' lomDaj jotlhpu' ghaH.
Ha', ghaH yInej. peghar. 'ej chIrghHomDaq
lomDaj yIqeng. Satlhob: SIbI' pemoD.

[mej *roSenQatlh* *ghIlDeSten* je]

*ghertlhuD*, juppu'ma' valqu' Hoch wISuch.
'ej qaSpu' nuq Do'Ha', 'ej nuq vIHech,
tugh chaHvaD 'e' vISovrupmoH. tar vo'laH
pum'a', pum tlhuplu'DI' je, yuQ bIngvo'
'oH QeqDI' je. 'ej qarmo' baHtaHvIS,
voDleH puSwI''a' Da. DaH pongwIj'e'
Do' tu'laHbe'jaj pum, 'ej muD neH mupjaj,
'oH rIQmoHbe'ba'mo'. Ha', bang. yIyIt.
jotHa'qu' qa'wI' Doy'. lotmo' jI'It.

[mej]

lut 'ay' loS.
lut 'ay'Hom cha.
ta'qach'a' pa' latlh.

['el *Hamlet*]

Ham: vIpegh, vIpol.

roS, ghIl: *Hamlet*! joH *Hamlet*!

Ham: 'eH jay'! chuSlu'! *Hamlet* jach 'Iv? toH, mughoSlI'.

['el *roSenQatlh*, *ghIlDeSten* je]

roS: lom'e', joHwI', nuqDaq Datlhappu'?

Ham: lam mojqa', vIchenHa'moHmo'; wutlhDaq DornIS no'.

roS: naDevvo' wItlhapmeH 'ej chIrghHomDaq wIlupmeH, DaqDaj
yIpeghHa'.

Ham: 'e' yIHarQo'.

roS: nuq HarQo'?

Ham: Satey' jItey''eghlaHbe'taHvIS, Qo'. 'ach wem je ghu'vam:
yu'DI' HerghwI', chay' jangnIS ta'puqloD'e'?

roS: choqelDI' HerghwI''e' Datu''a', joHwI'?

Ham: HISlaH, qaH, ta' DIb, HoS, woQ je Qay 'oH'e'. 'a reH ta'
lutoy'chu' 'utlhpu'vam'e'. nuj HeHDaq chaH pol, Sopbogh mughato'
rurtaHvIS: DaH vup, 'a nem ghup. De' DaQay 'e' poQDI', Du'uy neH
'ej, HerghwI', bIQaDqa'.

roS: qayajbe', joHwI'.

Ham: vaj jIQuch: qoH qoghDaq Qong QIch 'ong.

roS: lom Daq ghopeghHa' 'ej ta'Daq ghotlhej.

Ham: ta' tlhej lom 'a lom tlhejta'be'. ta' qa' 'oH---

ghIl: ta', joHwI'?

Ham: 'oH Doch'e'. 'oHDaq HIqem. Dejpu'bogh Hov rur qablIj!

[mej]

lut 'ay' loS.
lut 'ay'Hom wej.
ta'qach'a' pa' latlh.

['el ta', toy'wI'pu'Daj je]

t: ghaH, lom je Samta'meH, toy'wI' vIngeHta'.
Qu'vatlh! reH Qobqu', ghotvam weghlu'pa'.
'ach ghaHvaD chut HoS Hoch vIlo'laHbe'.
ghaH luparHa' matlhbe'taHbogh ghom'a',
wIvbe'mo' yojchaj. wIvlaH mInchaj neH.
'ej wIvDI' chaH, HeSwI''e' bIjlu'chugh,
vaj bIj lunoH, 'ej HeSDaj lunoHQo'.
pay' ghaH vIghImnIS. 'a vIta'taHvIS,
wo'Daq jIrojmeH 'ej jImaylaw'meH,
vIqelchu' jImoDbe'taHvIS --- net HarnIS.
ghurqu'DI' rop, 'ej SuQDI', vorlu'meH
SuQnIS je Hergh. SuQbe'chugh, vaj not vor.

['el *roSenQatlh*]

t: nuqneH. qaS nuq? 

roS:                joH, nuqDaq lomvetlh So'pu',
wej ghaHvo' 'e' wISovlaH.

t:                        nuqDaq ghaH?

roS: HurDaq ghaH, joH. ghaH 'avlu'. chay' jura'neS?

t: 'eH, jIHDaq ghaH yIqem.

roS: SuH, *ghIlDeSten*! naDev joH quv yIqem.

'el *Hamlet* *ghIlDeSten* je [tlhejwI'pu' je]

t: SuH *Hamlet*, nuqDaq ghaHtaH *polonyuS*'e'.

Ham: 'uQDaq.

t: 'uQDaq? nuqDaq?

Ham: pa' Sopbe' ghaH 'a ghaH Soplu'. ghaH DantaH wutlhwo'
ngIvbogh ghewQaS'e'. wo' pIvDaq ghatlhlaH ghew ruv neH. mapI'meH
Ha'DIbaH Hoch wIpI'moHtaH maH, 'ej maHmo' pI'taH ghewmey. Soj Sar
bIH ta' pI''e', qoH lang'e' je --- cha' nay' chaH, qaStaHvIS wa'
'uQ neH. ghu' Qav 'oH.

t: va, va.

Ham: chaq ta' Soppu'bogh ghew'e' lo' wamwI'. chaq ghew Soppu'bogh
to'baj'e' jon wamwI' 'ej Sop ghaH.

t: nuq choyajmoHmeH bIHech.

Ham: paghHey, 'a chay' petaQ burghDaq DuvlI' ta', chaq 'e' qa'ang
neH.

t: nuqDaq ghaHtaH *polonyuS*'e'?

Ham: QI'tu'Daq. pa' SammeH vay' yIngeH. pa' Sambe'chugh nejwI'
vaj latlhDaq DaSammeH yIngeH'egh SoH. 'ach qaStaHvIS jarvam
DaSambe'chugh, tlhonlIj mupbej ghaH, 'ochDaq bIyItDI' 'ej vaSHom
Da'elDI'.

t: [toy'wI'pu' puSvaD] pa' yInejlI'.

Ham: Supawpa' mejbe'.

[mej toy'wI'pu']

t: 'eH, *Hamlet*: Qob DaSIQchoHbe'taHmeH ---
'ej DaSIQbe'taH 'e' vIQorghqangbej,
HeSchavlIjmo' jI'IQqu'taHvIS je ---
DaH naDevvo' Dunge'nISmoHbej HeSlIj.
'ej tugh bItlheDtaHvIS, qul Do DaleHnIS.
vaj DaH yIghuHchoH. jaHbeH DujHomlIj.
ma'beH pIvghor. nIloSlI' je tlhejwI'lI'.
tera'Daq ghuS.


Ham:           tera'Daq?

t:                       HIja'.

Ham:                            maj!

t: toH, "maj" Dajatlhqang, nabwIj DaSovchugh.

Ham: lubejbogh lInDab naw'wI' vIbej. 'a Ha', tera'Daq. qamej, SoSoy.

t: DuparHa'bogh vavlI''e' jIH, *Hamlet*.

Ham: SoSwI'! loDnal be'nal je chaH vav'e' SoS'e' je; tay' loDnal
be'nal je porgh; vaj SoSwI''e' SoH. Ha' tera'Daq.

[mej]

Ham:           tera'Daq?

t:                       HIja'.

Ham:                            maj!

t: toH, "maj" Dajatlhqang, nabwIj DaSovchugh.

[mej]

lut 'ay' loS.
lut 'ay'Hom vagh.
Qo'noS ta'qach'a' pa'.

['el ta'be'nal, qaH je]

tb: Qo'. ghaHvaD jIjatlhQo'.

qaH: tlhobqu' ghaH. mISchoH je. 'ej yabDaj Dotlh
vuplu'bejneS.

tb:           jIHvo' nuq'e' neH ghaH?

qaH: reH vavDaj buS ghaH, jatlhtaHvIS. reH jatlh
"qo'vamDaq tojlu' 'e' vItu'". "toH" jatlh.
'ej tIqDaj qIptaH. pe'vIl Quj jeSQo'.
jatlhDI', chay' Hech QumHa'bogh mu'meyDaj
net wuqlaHbe'. Dap jatlh. 'ach tlholmo' Dapvetlh,
vaj yajchoHlaw' 'IjwI'pu', chaHvaD motlhDI'.
QIchDaj luQeq, 'ej qechmeychaj Qochbe'meH,
mu'Daj ngongHa'. 'ej mu'Daj tlhejtaHmo'
nach, mIn je, porgh je mIwDaj, vaj qech Hoch
luQubmoHlaH. DIch lughajbe'bej qechvetlh,
'ach pIch lughaj, 'ej pIchvaD Soy' 'ej QIHlaH.

Hor: ghaHvaD bIjatlhnIS. QuSmey Sepbogh yabvaD
loyHa'moHlaH. loyHa'DI', maHvaD QoblaH.

tb: 'eljaj.

[mej *Horey'So*]

va reH yemwI'vaD qaStaH. qa'wI' 'oy'vaD
lot Doj lununglaw' ghu' Hoch ram. 'ej joy' qaD.
DIvDI' ghot, pIHqu' ghaH. HeS ghItlhDaq Hotlh'egh.
'ej QotlhvIplu'taHmo' ghot DIv, tugh Qotlh'egh.

['elqa' *Horey'So*. ghaH tlha' *'ovelya*]

'ov: SuH, nuqDaq 'IHbogh rIntaH Qo'noS be''a'?

tb: nuqneH, *'ovelya*.

'ov: [bom]
	leS chay' bangna' vIngu'?
	chay' latlh vIDoH?
	lengmIv, baSDaS je tuQ.
	naQ'a' tIq woH.

tb: QI'yaH, be' quv, nuq HechlI' bom Daja'bogh?
	
'o: nuqjatlh? Qo', Qo', yIqImneS.
	Heghpu' 'ej lojpu', joH.
	Heghpu' 'ej loj.
	DaH porghDajvo' Haw' qa'.
	yo' qIjDaq Qoj.
ghuy'cha'!

tb:        'a SuH, *'ovelya* ---

'ov:                               Qo'. yIqIm. [bom]
	lomSut chIS law', peDwI' chIS puS.

['el ta']

tb: QI'yaH, naDev yIbej.

'ov:	luDech SuvwI'na' Degh.
	'a molDaj retlhDaq jach pagh wuS,
	ghaH mupDI' rIntaH Hegh.

t: nuqneH, be' 'IH.
	
'ov: toH, Duvanjaj qeylIS. pIpyuS moj yonmang puqbe' net ja'.
DaHjaj Dotlhmaj DISov 'a leS Dotlhmaj DISovbe'. Dunumjaj qeylIS.

t: vav buSba'.

'ov: qechvam qelqa'lu'neSQo'jaj; 'a nuq Hech, lutlhobDI', yIja' neH:

	DaHjaj 'oH bangjaj'e'. nuqneH!
	SuH, 'eqDI' po, qaghoS.
	'ej batlh tugh mamuSHa'chuqmeH
	lojmItlIjDaq jIloS.
	
	vaj Hu'DI' loD, lojmItDaq joD.
	vay' tuQpa', poSmoHpu'.
	'el be'. bel be'. 'ej be'batlh woD.
	tugh be' lon loD net tu'.

t: *'ovelya* 'IH!

'ov: Su', qatIchqangbe', 'a vIrInmoHbej.

	ghay'cha' chomaghpu'. qatlh choHup?
	ghay'cha' yItuH! yISaH!
	ngaghmeH loD Qup, pIj tojqu'rup.
	'ej pIch lughajbej chaH.
	
	jatlh be': qanay not 'e' DanIS;
	chongaghpa' 'e' cho'ol.
jang:
	qar, 'a vIDIS: vIlay'taHvIS,
	qangaghmeH wej chochol.

t: ghorgh qaSchoH Dotlhvam?
     
'ov: QapmeH ghu' QaQ vItul. matuvnIS. 'ach wutlh bIrDaq lulan 'e'
vIqelDI' jISaQ, 'ej jaS jIvanglaHbe'. SovchoHbej loDnI'wI'.
vaj Satlho', batlh tuqeSpu'mo'. Ha' tlhejwI'wI'. revan, be'pu',
revan, be'oypu', revan, revan.

[mej]

t: yItlha' yISum! yI'avchu' 'e' Satlhob.

[mej *Horey'So*]

t: Dotlh 'IQqu' tar wISIQ. va, vavDaj HeghDaq
Hal ghaj ghu' naQ. 'ej QI'yaH! *ghertlhuD*, *ghertlhuD*,
nucholDI' lot, nIteb ghoqwI' DaQo' bIH.
nawloghDaq ghomlaw' jay'! wa': vavDaj HoHlu'.
cha': tlheD puqlI'. ruvna'vaD ghaH vIghIm,
pe'vIl 'e' raDmoH ghaH. wej: jorrup wo'.
jeDlaw' 'ej roplaw' QubtaHvIS 'ej joSDI',
Heghpu' *polonyuS* QaQqu' 'e' lubuSmo'.
'ej ghaH wImolDI', mapo'Ha'bejpu',
Qu'vetlh wIpeghmo' 'ej wImoDmoHmo'.
Do'Ha' je: yabDajvo' *'ovelya* wavlu'.
meqlaHDajvo' ghaH wav je. yaHDI' laHvetlh,
Ha'DIbaH neH, Dep Hotlhlu'bogh ghap maH.
ghu' Qav'e' ram law'be' latlh ram puSbe':
romuluSvo' chegh loDnI'Daj, pegh'eghtaHvIS.
ghaH je' Dotlh yay'qu'. 'engmey SepDaq pol'egh.	
'ej chay' Hegh vavDaj qan 'e' Delbogh SoQmey
luja'lI' teSDaj ngejbogh petaQ'e'.
ngoDna' ghajbe'mo' chaH, vaj 'utDI' ghu',
qoghmeyDaq jIH mupummeH Hoch lu'oghqang,
tlhIvqu'taHvIS chaH. Hu'tegh, *ghertlhuD*, bang,
DIHom ghorwI' rur ghu'vam. 'ay'wIj law'Daq
jIHeghqu'meH mumuptaH.

['o'Daq chuSlu']

tb:                    va! chuS nuq?

['el qaH]

t: nuqDaq 'avwI'pu'wIj? lojmIt lu'avjaj.

['el qaH latlh]

qaS nuq?

qaH:     yItoD'egh, joH. veHHeHDaj juSDI'
vupQo' bIQ'a', 'ej puHmey SoDmeH moDbej.
'utlhpu'lI' SoDqu' je *layerteS* Qup,
Daw'meH DuHIvDI'! "joH" lujachtaHvIS,
lupong ghom'a'. 'ej chaHvaD chu'law' 'u':
bov tIQ lulIjlaw'. tIghmey luSovbe'law'.
SoQ Hoch 'olwI' ngaqwI' je Hoch lujuS.
'ej jach: "mawIvjaj maH. ta' moj *layerteS*."
'ej 'engmey SovmoH mIvmey, ghop je, jat je.
"ta' moj *layerteS*. mojjaj qaH *layerteS*."

tb: jachlI' chaH, Quchmo', HeS larghHa'taHvIS!
va, SuwamHa'bej, maghbogh Qo'noS targhmey!

t: lojmIt lughormoHlu'.

['o'vo' chuSlu']

['el *layerteS*, nuH qengtaHvIS. lutlha' Qo'noSngan]

la: 'eH, nuqDaq ta'qoqvetlh? --- HurDaq peratlh, qaH.

Qo'noSnganpu': Qo', joH. ma'eljaj.

la:                                 'eb HIchaw', juppu'.

Qo'noSnganpu': luq, luq.

[lojmIt HurDaq tlheD chaH]

la: Satlho'. lojmIt yI'av. --- 'eH, ta'qoq mIghqu',
vavwI' HInob.

tb:           yIjot, *layerteS* QaQ.

la: va, jotchugh 'IwwIj 'ay'Hom neH, vaj maq 'oH:
"ben bIboghHa'. vavwI''e' toj SoSwI'."
tlhIvbe'bejbogh SoSwI' Quch chunqu' quvDaq
ngaghHa'wI' DeghHey lan 'oH.

t:                           qatlh, *layerteS*,
tengchaH rur Daw'lIj, Dojqu'mo'? 'eH, *ghertlhuD*,
ghaH yInISbe', 'ej jIHvaD yIyepQo'.
ta' yoDbej San. 'ej yoDDI' San, bejHa' neH
'urmang, 'ej Qu''e' Hechbogh chavlaHbe' 'oH.
yIja', *layerteS*, qatlh bIQeHqu'taH?
*ghertlhuD*, ghaH yInISbe'. yIjatlhchoH, qaH.

la: nuqDaq vavwI''e'?

t:                    Heghpu'.

tb:                            'ach HoHbe' ghaH.

t: yu'lI'jaj ghaH.

la: qatlh Heghpu'? Hu'tegh, jIH vItojlu'Qo'!
matlhjaj veqlargh neH! 'Ipmey ngaSjaj ghe''or!
ghob, chut je ghupjaj rIntaH wa' luSpet jay'!
yo' qIj bIj Hoch vISIQrup. pavmo' Qu'wIj,
ghe''or, QI'tu' je vIqImHa'. vaj jIHvaD
qaSjaj Hoch jay'. 'ach DaH vavwI' Heghmo'
bortaS vISuqbej.

t:               toH, Dubotrup 'Iv?

la: mubotlaH neHtaHghachwIj. botlaHbe'
qo' naQ HoS jay'.
'ej SupmeywIj vIvu'chu'mo', vaj Qapqu',
puStaHvIS je bIH.

t:                SuH, *layerteS* QaQ,
vavlI' Hegh vIt DaSov DaneHqu'chugh,
vaj jupDaj, jaghDaj je DayotlhnIS'a'?
QapwI', lujwI' je Hoch DabechnISmoH,
DaH SoHvaD 'e' poQ'a' bortaS?

la:                           ghobe',
'ach jaghDaj neH.

t:                'ej jupDaj Daghov'a'?

la: HIja'. juppu'DajvaD DeSDu' vIpoSmoH.
'ej qeylIS SoS vIDarup. chaH vIje'meH,
'IwwIj vInobrup je.

t:                  toH, DaH vajna' SoH.
puq quv DaDabej. HeghtaHvIS vavlI' qan,
jIchun. 'ej Heghmo' ghaH jIQoSqu'bej.
yojlIjDaq baHDI' vItmeyvam, vaj mInvaD
jajlo' luDalaw'.

['etDaq jatlh Qo'noSnganpu']

Qo'noSnganpu':   'eljaj. yIbotQo'.

la: chay'? chuStaH nuq?

['el *'ovelya*. Sut taQ, tI beQ QaD, tIpuqmey je tuQ]

la: Ha' QeDjaj yabwIj! Sochlogh mInbIQqutmey,
mInDu'wIj HoS, noch laH je Hoch yImeQjaj!
bImaw'taH tugh net DIl. 'ej DIllu' rIntaH,
Huch DIlbogh 'ughDI' law' SoH 'ughDI' puS.
Qu'vatlh! SuH wo'maj naDmoHbogh Degh'e'! 
be' 'IH! be'nI'wI' matlh! *'ovelya* quv!
ghuy'cha'! DuH'a' wanI'? DuQaw'pu''a'?
Heghpu'DI' loD qan yIn, SIbI' Hegh'a' je
be'Hom Qup yab? muSHa'taHvIS nong puq.
'ej nongDI', Dol muSHa'bogh tlhejtaHmeH,
wa' 'ay'Daj waghqu' ngeH.

'ov:	[bom] molghomDaq porghDaj tlhol luqeng;
	QI'yaH QI'yaH QI'yaH.
	'ej molDaq SaQlu'mo', chen ngeng.

bIpIvjaj, Qa'oy.

la: wej Sabchugh yablIj, 'ej bortaS chora'chugh,
vaj SoH chopon DaH law', yab pIv pon puS.

'ov: "baQa' baQa'" yIbom. 'ej "yIra' ghuy'cha'" yIbom SoH. toH,
QoQ 'IHmoHchu' je QuQ. HoD puqbe' tlhu'moH qalmoHbogh je lagh'e'.

la: DapHeyvam yajmoH law', SoQ yajmoH puS.

'ov: Dargh qanob. DIch 'oS. DIch yIghajneS, bang. Dom qanob je.
yoj 'oS.

la: maw'taHvIS ghaH maghojqu'laH. tlhejchuqchu' 'IQmoHbogh
qechDaj, qawmoHbogh qechDaj je.

'ov: SoHvaD noSvagh, ngat je vInob. 'Iw qanob, 'ej 'IwHom jInob'egh
je. chaq QI'lop vaj nIn wIpong. 'IwlIj DatuQtaHvIS DapImnISmoH. Qab
vInob. toplIn qanobqangpu' je 'ach ngoS 'oH HeghDI' vavwI'. batlh rInta'
ghaH net jatlh---

	muQuchqu'moHmo' qoreQ 'IH, ---

la: 'It ghaH 'ej roptaH. bech, 'ej ghe''or SIQ.
'a ghaHvaD bel, 'IHwI' je mojlaw' Hochvetlh.

'ov:	naDev not cholqa''a'?
	naDev not cholqa''a'?
	ghobe'. Hu' Hegh.
	SIbI' yIjegh.
	naDev not cholqa'ba'.
	
	peDwI' rur rolDaj chIS.
	ram qIj rur patlhDaj ngup.
	DaH yaH. DaH yaH.
	maSaQnIStaH.
	QI'tu' Da'eljaj, qup!

'ej SuvwI' Hoch Hugh vIlo'taHvIS, qeylIS vItlhob. qeylIS
boghomjaj.

[mej]

la: QI'yaH! Daleghpu''a'? 

t: bI'IQtaHvIS, *layerteS*, DaH qatlhejjaj.
'ej DIbvam HIbotQo'. 'a loQ yIDoH neH.
juppu'lI' Hoch val vay' DawIvpu'DI',
tugh ghu'maj lut lu'Ijjaj 'ej lunoHjaj.
'ej DuQmoHmo' pagh DuQmo', ghIHtaH ghopwIj,
chaq 'e' lutu'chugh, yonchu'meH bortaSlIj,
vaj wo'wIj, ta'mIvwIj je, yInwIj je,
Hoch je vIghajpu'bogh qanobrupneS.
'a ghIH 'e' lutu'be'chugh, vaj yIloS,
bItultaH jIHvaD 'e' DavangtaHvIS.
'ej yonmeH rIntaH qa'lI', batlh jIyeqrup.

la: qaSjaj. 'a morghmeH chalDaq yuQDaq je
jach HeghDaj meq, 'ej jachqu' nolDaj moD ---
HomDu'Daj DungDaq Dach nagh, 'etlh je, ghItlh je;
Dach je noltay, 'ej Dach SuvwI'na' van ---
'ej Hochvam QIjlu' 'e' vIpoQ.

t:                            bIlugh.
'ej HeSta'bogh petaQDaq pumjaj taj.
HItlhej; qatlhob.

[mej chaH]

lut 'ay' loS.
lut 'ay'Hom jav.
ta'qach'a' pa' latlh.

['el *Horey'So*, toy'wI' je]

Hor: toH, jIHvaD jatlhqang 'Iv?

toy':                           yo' negh, jawwI'.
lujatlh: "jabbI'IDmey DIghajlI'."

Hor:                             'eljaj.

[mej toy'wI']

Hor: yuQDaq 'Ivvo' van ghItlh vISuq, labbe'chugh
joH *Hamlet*'e'? 'oH labba'pu' pagh latlh.

['el mangpu']

mang: DuHoSmoHjaj qeylIS qa'.

Hor: DuHoSmoHjaj je ghaH.

mang: muHoSmoHbej, qaH, taHvIS neH wo'. DarI'lu' --- lab tera'Daq
Hechpu'bogh Duy'a' --- SoH Dungu'chugh *Horey'So* pong'e',
qapongmeH vISovmoHlu'bogh.

[*Hamlet* jabbI'ID laD]

Ham: *Horey'So*, SoQvam Daqelta'DI', ta' luSammeH ghotpu'vam He
yIngeDmoH. ghaHvaD jabbI'ID ghajlI' chaH. loghDaq qaSpu'DI' cha'
jajHom nutlha'choH nuH vIDqu' lo'bogh HeS mech Duj. maHaw'meH
yapbe'mo' chuyDaHmaj pe'vIl mavaQchoH. HotDI' HIchDalmaj nIteb
vItIj. Dujmaj cholHa'choHDI' Dujchaj, vaj qama'chaj vImoj jIH,
pagh latlh je. gharqoqvaD vangtaHvIS lotlhwI' yuDHa' Da chaH, 'a
gharwI' 'ong Da je SutlhtaHvIS: vaj chaHvaD DIb vInobnIS. ta'vaD
jabbI'ID vIlabpu'bogh je yIngeH, 'ej jIHDaq bIchIj'eghmeH yo' qIj
la'Duj pIvlob'e' yIchu'. teSDu'lIj DuQbej mu'mey vIja'rupbogh, 'a
De'wIj nIch baHmeH 'umchu'be' moy'bI'vam. QIvwIjDaq nIqem
ghotpu'vam QaQ. tera'Daq He polba' je *roSenQatlh* *ghIlDeSten*
je. chaH qelbogh De' law''e' qaja'nIS. pItlh.

Hor: Ha', jup. jabbI''IDlIjvaD He vI'ang.
'ej nom yIHev. jabbI'IDvam labwI'vo'
De'vam qaqengmo', Do' tugh ghaH choSammoH.

[mej chaH]

lut 'ay' loS.
lut 'ay'Hom Soch.
ta'qach'a' pa' latlh.

['el ta', *layerteS* je]

t: jIchunqu' DaH 'e' 'olbej ghoblIj pov;
'ej jup vIDamo', tIqlIjDaq cholannIS ---
Hu' yInwIj wampu' je vavlI' HoHwI',
DaH 'e' Da'Ijmo', valbejtaHvIS teSlIj.

la: net QochlaHbe'. 'ach jIHvaD ghu' yIQIj:
chavvam DabIjmeH qatlh bIvangpu'be'?
HeS webqu' bIH, 'ej Hegh 'oH bIjchaj'e'.
bInurmeH 'ej bIche'meH 'ej bIvalmeH
bInoDqangqu'bej.

t:               toH, cha' meqmey potlhmo'.
chaq SoHvaD pujqu'law', 'ach jIHvaD HoS bIH.
yInmeH, *Hamlet* mInDu' neH wuvlaw' SoSDaj,
'ej jIHvaD --- batlh, QIH ghap 'oH ghu'vam'e';
ram wIv --- toH yInvaD, qa'wI'vaD je 'ut ghaH.
bavtaHvIS, ghoDajvo' Haw'be'ba' yuQ;
ghaHvo' jIHaw'laHbe' je jIH. meq cha'DIch:
meqba'Daq peghlu'be'bogh vIngeHbe'nIS,
ghaH luparHa'qu'ba'taHmo' ghom'a' Qut.
parHa'ghachchajDaq ngoSmo' Duy'meyDaj,
Hap choHmoHwI' luDa. qammIr lurIHDI',
chenchoH batlhDeghHey. vaj ghaH puSDI' pu'wIj,
ghom'a' ghoghHoS luSpetDaq pujqu' tIH.
'ej pu'HIchwIjDaq chegh tIH, lujmo' vI'wIj.

la: vaj jIHvaD loj vav quv. 'Itqu' be'nI'wI'
net ral. 'ej qun potlhwI' wInaDqa'DI' je,
vaj bov potlhwI' Hoch qaDlaHchu' be'nI'wI',
po'pu'mo' ghaH. 'a tugh bortaS vIchav.

t: bortaS DanablI'meH bIQongHa'Qo'.
pujmo' 'ej buDmo' HapwIj, vaj jItIvlaH,
rolwIjvaD Qoblu'DI' --- 'e' yIHarQo'.
toH, tugh De' chu' Da'Ij. vavlI' vIvuvpu';
jIvuv'egh je. Do' ghu'vammo' qaponbej: ---
nuqneH. De' nuq?

['el QumwI']

Q:                *Hamlet* jabbI'ID, joH.
SuH, SoHvaD ghItlhvam, 'ej ta'be'vaD ghItlhvetlh.

t: chay'? *Hamlet*vo'! qem 'Iv?

Q: yo'mang, net jatlhneS. chaH vIleghpu'be'.
bIH HevDI', bIH munobpu' *tlhaw'DIyo*.

t: yI'Ij, *layerteS*. --- DoH.

[mej QumwI']

[laD] SuH, patlh woQ je, wo'lIjDaq nuH vIghajbe' jIlengtaHvIS.
wa'leS chuQunqablIj 'etDaq jISaHmeH qatlhob, 'ej qatlhIjpu'DI',
pay' jIcheghmeH wanI''e' DuHmoHta'bogh San Do' qaQIj. *Hamlet*

nuq Hech ghaH ghItlhDI'? cheghpu''a' Hoch latlh?
chaq mutoj'a' neH? chaq qaSbe''a' Hochvam?

la: ghItlhmIwvetlh Daghov'a'?

t:                            nav ghItlhbej *Hamlet*.
"nuH vIghajbe'". ghItlh'o'Daq chel: "jImob".
jIHvaD DaQIjlaH'a'?

la: mumISmoHbejneS, joH. 'a choljaj neH.
pay' tIqwIj ropHey vor wanI'vam Do':
jIHeghpa' Ho'Du'DajvaD pum vIjatlh:
"HeSvetlh Dachavta'".

t:                    teHchugh ghu', *layerteS* ---
toH teHlaH'a'? 'a ngeblaHbe'ba' je ---
vaj chIch cholobqang'a'?

la:                      HIja', joH quv,
ghaHvaD jIrojmeH chora'be'chugh neH.

t: Qo'. SoHvaD rojbej yab, bortaS Dachavmo'.
cheghpu'chugh --- lengDaj Qu'vo' Haw'law'mo',
'ej DaH 'oH HechlI'Qo' --- vaj San mIqta'Daq
vIghuSmoHlI'bogh, tugh ghaH'e' vIqIch.
mIqta'mo' pumnISbej. jaS wIvlaHbe' ghaH.
'ej HeghDaj pIch lutlhutlhlaHbe' ghogh vay'.
'a nabmaj 'ongqu' pIHlaHbe' je SoSDaj,
'ej "bong qaS" jatlhqang.

la:                       luq, joHwI'. qalobrup.
qalobrupqu' je, nab chavwI' vIDameH
Da'oghlI'neSchugh.

t:                 jIHvaD lI'bej. maj.
bIlengtaHvIS, nIbuStaH naD joSwI' ---
'ej Qoy je *Hamlet* --- Dojqu'mo' wa' laHlIj.
po' 'oH net jatlh. 'oH, tIqDaj qeHmoH law',
laHmeylIj Hoch, ghaH qeHmoH puS. 'a teH:
ramba' neH laHvetlh.

la:                  laHwIj nuq, joH quv?

t: SuvwI' Qup mIvDaq naDbogh DeghHom neH.
'ach 'ut je 'oH. mop paH je ghajnIS qup,
'ej chep 'ej Sagh ghaH 'e' lu'ang, 'ej 'um.
'ach reHmeH Sutmey tISqu' ghaj vaj Qup,
net pIH, 'ej 'um je bIH. DaH rIn cha' jar,
nuSuchpu'DI' wa' rIymuS qaH. jItu'pu',
'ej romuluS vIQojpu': lIghchu' chaH.
'a lIghDI', qa'pu' SeHlaw' qaHvam yoH.
porgh'ay'Daj mojlaw' quS. lupDujHom'e'
SeHchu'mo', jo'vetlh vIDqu' QuQHey mojpu'.
laH'e' vIpIHbogh juSmo' rIntaH ghaH,
vaj QoD 'ej jun ghaH 'e' vIDelchu'meH
Human vImojchugh je, vaj lujbej Qu'wIj.

la: toH, rIymuSngan ghaH'a'?

t:                           rIymuSngan'e'.

la: baQa'! *lamoD* ghaH.

t:                       ghaHbej.

la:                               ghaH vISovchu'.
wo' Degh joqwI' je ghaH.

t: toH, maHvaD laHlIj chID ghaH.
bIHub'eghmeH bIpo'qu' 'ej bIqeqchu',
'e' naDDI', 'ej 'etlhvI'lIj naDqu'DI',
tugh jach: "chaq vI'Daj rapchugh neH vay' vI',
vaj Dunbej 'etlhchaj Quj. DaHay'moHchugh,
vaj HIvmeH chaH, pagh HubmeH chaH, pagh tu'meH,
Soy' wo'Daj 'etlhvaj Hoch, ghaH qellu'DI'."
'ej naDDaj 'IjDI' *Hamlet*, tarHey tlhutlhlaw',
qeHqu'mo' ghaH. 'ej SoHvaD vI'Daj tobmeH,
SIbI' bIchegh 'e' loS 'ej neHqu' ghaH.
toH. ghu'vammo' ---

la:                  ghu'vammo' qaSneS nuq?

t: *layerteS*, vavlI''e' DamuSHa''a'?
pagh, lotHey Hotlhlu'bogh neH DaDa'a'?
SaHba' qab QeHqu'. 'ach SaH'a' tIqna'?

la: Ha'! nuq DaghojmeH mu'tlheghvam Dajatlh?

t: vavlI' DamuSHa'be', 'e' vIghojbe'meH;
muSHa'ghach taghtaH poH --- 'ach 'e' vISov.
'ej qulDaj, HatDaj je qIl rIntaH poH --- 
tobtaHmo' ghu'mey, vaj reH 'e' vItu'.
muSHa'ghach qulDaq weQ wa' tlheghHom tu'lu'.
meQlI', pagh, meQpu' tlhegh. vaj qul HoSHa'moH.
'ej DotlhDaj QaQqu' leHlaH pagh QaQwI'.
lach'eghDI' Dotlhvam --- SoD'eghmo', leS Hegh.
toH, Qu' wIneHDI', Qu' wIchavnISbej:
choHlaHtaHmo' "wIneH"vetlh. mogh 'ej mIm 'oH,
'oH SevtaHmo' jatDu', ghopDu' je, ghu' je.
vaj tlhuHmey buDqu' DanISchoH "wIchavnIS":
leSmoHDI', QIH 'oH. 'ach Daq potlh vIDuQjaj:
DaH cheghlI' *Hamlet*. vaj, vavlI' puqna' SoH,
batlh 'e' DatobmeH, SoQmey yIlo'Qo'.
'ach ta' yIlo'. vaj ta'na' nuq Dachavqang?

la: chIrghDaq HughDaj vIpe'qang.

t:                               toH, bIlugh.
chotwI' Qanbe'nIS qech neH. bortaS'e'
vuSbe'nIS Hoch. 'ach pa'lIjDaq yIratlhtaH,
*layerteS* QaQ. bIcheghpu', 'e' Sov *Hamlet*,
cheghDI' je ghaH. bIpo'qu' 'e' vInaDmoH.
batlh'e' Dunobbogh romuluSnganlI'
lughurmoH. vaj tugh SoH ghaH je SaghommoH.
'ovmeH SuHay'DI', yaylIjvaD jISuD.
pIHQo'mo', quvmo', 'ej tojQo'mo' ghaH,
Quj'etlhmey nuDchu'be'. vaj bIH DatammeH
loQ ghaH Datojpu'DI', pagh 'eqDI' wIvlIj,
'etlh jej DawIvlaH. 'ej SuQujlaw'taHvIS,
vavlI'vaD ghaH DanoD.

la:                    maj, Qu' vIta'rup.
'ej Qu'vaD 'etlh vIngoH je. Qelqoqvo'
wa' tar vIje'pu'. HeghmoHqu'bej 'oH.
vaj taj vIchaghmoHDI', 'ej jaghwI'vo'
'IwHom vIlelDI' 'aw'mo' tajwIj neH,
Heghbe'meH ghaH yapbe' Hergh qubqu' vay' ---
maSwovDaq tI Hochvo' wIboSlaHbogh
chenchugh je Hergh. HoHtaSvamDaq 'etlhDungwIj
vIchaghmoH. vaj vIqotlhmeH neH vIDuQDI',
Hegh rIntaH.

t:           maj. vaj nab wIQublI'jaj.
nabvaD maDa, chay' 'e' lungeDmoHlaH
poH, 'eb je, 'e' wIqeljaj. lujchugh Qu',
'ej nuq wInab net leghchugh mata'Ha'mo',
vaj qaqbej wInIDbe'chugh. vaj nab chach,
nab cha' joq tu'nISlu'. 'ej jorchugh wa'DIch
wIDajtaHvIS, vaj ratlhlaH latlh. jIQubnIS.
SuHay'DI', yaylIjvaD jISuD. vImaqqu'.
tu'!
SuSuvtaHvIS SutujchoH 'ej SuQaDchoH.
'ej qaSmeH ghu'vam, ralqu'nIStaH 'etlhlIj.
toH, tlhutlhmeH tlhobDI', may'qoqraj vIlopmeH
HIvje''a' Dun vIqeqta'. tlhutlhchoHDI' neH,
bong tarlIjvo' DaDuQbogh narghpu'chugh,
vaj tarwIjmo' Qap nab. 'ach SuH, chuS nuq?

['el ta'be']

t: nuqneH, ta'be'?

tb: wa' lot qam 'o' gho' lot latlh qam. baQa'!
moDqu'lI' lot. *layerteS*, Hegh be'nI'lI'.

la: Hegh'a'? nuqDaq?

tb: bIQtIqHom DungDaq banglojwI'Sor tu'lu'.
pa' baSHey bIQDaq tIHomDaj qIj 'ang 'oH.
pa' Sor tItlheghmey taQqu' chenmoH ghaH.
Qa'tIvo', DuStIvo', tI jejqu'vo',
nI'wI'mey Doqvo' je bIH chenmoHtaH.
nI'wI' lupongmeH Doch wIjwI'pu' mu',
ngIlmo' chaH jatlhDI'. pongmeH chuQunbe'pu',
"lomnItlh" lujatlh. pa' Dung SorDeSmeyDaq
mIvHey tItlheghDaj HuSmoHmeH ghaH toSDI',
ghor DeSHom mIgh. 'ej SaQtaHbogh bIQHalDaq
pum tImey popDaj, ghaH je. beQchoH SutDaj.
'ej qaStaHvIS poH mach, DungDaq luratlhmoH.
vaj wIch ngengqa' rur. QoQ qan DImey bomtaH,
'ej SengDaj yajlaHbe'law'; qoj, bIQyInvaD
ghaH 'ummoHlaw'pu' DujDaj, porghDaj je.
'ach tugh 'ugh SutDaj, tlhuHqu'pu'mo' bIH.
'ej qaSnIS: bel bomvo' bIQlammey HeghDaq
Qugh ghot luyaHmoH.

la:                 QI'yaH! vaj Hegh'a'?

tb: Hegh ghaH. Hegh rIntaH.

la: SoHvaD law'qu'pu' bIQ, *'ovelya* quv.
jISaQ vaj 'e' vIbot. 'a ghotvaD motlh 'oH.
tIghDaj leH tIqwIj Duj. vaj DaH jISaQnIS,
'ej ram, jItuHchugh. yaHpu'DI' mInbIQvetlh,
yaHbej je pujbogh tIqwIj. joH, Qapla'.
qul SoQ vIghaj. 'ej meQqang 'oH. 'ach QI'yaH!
SoQvetlh luSoD mInDu' Dogh.

[mej ghaH]

t:                           Ha', wItlha'nIS.
QeHqu' ghaH 'e' vIqIlmeH, Qatlhpu' Qu'wIj!
QeHqa' 'e' taghlaH ghu'vam chu'. Do'Ha'.
vaj *ghertlhuD*, ghaH wItlha'.

[mej chaH]

lut 'ay' vagh.
lut 'ay'Hom wa'.
molghom.

['el cha' HaghmoHwI'; molmeH luch luqeng]

molwI': quv'a' nol mIw, yo' qIj 'elmeH qIghqoq nejpu'chugh je.

latlh: HISlaH, qaja'. vaj yImolchu'. Matlh ghu' qelpu' 'ej nol
quv ra' *Heghutlh*'a'.

molwI': nuqmo' NuH, HuM'eghmeH SoN'eghMe'chugh.

latlh: toH, NuHmoHlu'Mej.

molwI': *In Self Offense* qaSMejpu'. jaS qaSlaHMe'pu'. toH qar
meqvam'e': chIch taghNu'wIj vISoNchugh, vaj mIw vIta'. wej Qu'
ghaj mIw --- Hechghach, vangghach, chavghach je ghaj.
*tlherevore* chIch SoN'eghpu'.

latlh: 'a ghoMe', HInISMe', molneSwI'.

molwI': MIjatlh 'e' yImev. naNev MIQ tu'lu', maj. naNev ghot
tu'lu', maj. SoN'eghmeH MIQvam lo'chugh, HechMe'taHvIS
HechghachNaj, loj --- 'e' yItu'. 'ach chIch ghaH SoNchugh MIQ'e'
vaj SoN'eghqu'Me'. *tlherevore* yInpoH rInmoHMe' HoH'eghMe'wI'.

latlh: 'ach 'e' ra''a' ruv?

molwI': HISlaH, vIt. ruvvam'e' Matlh wuq *Heghutlh*'a'.

latlh: vItna' NanuSHa'qang'a'? yaS ghaHMe'chugh vaj nolNaj
quvMe'nISmoHlu'.

molwI': toH, MIvItMa'. 'ej SoN'eghchu'meH pagh voQ'eghchu'meH
NIM ghajMogh yaS muM law', NIM ghajMogh latlhpu' tlhIvHa' muM
puS. Ha' molluchwIj. ben negh chaH pochwI', lamwI', molwI' je
neH. Qu' naMpu'Mogh qeng lutaH.

latlh: muvmoH'a' qeng.

molwI': wo'mangghom'a' wa'NIch muvmoH 'ej qeqmoHqu'. SevNI' jagh,
Haw' 'ej ghatlhqa' yo' tuH.

latlh: 'a SevvaN tuHMe'Ma'.

molwI': nuqjatlh? vajMatlh NanuS'a'? chay' vajMatlhHeylIj NapaM.
vajMatlh paMlu'meH, 'ut tuH'e', Sevmo' jagh. tlhoMMogh mu'tlhegh
cha'NIch qaQoymoH 'ej qoghlIjNaq Nap rarchugh, vaj Hov ghajMe'
ram.

latlh: vIwovrupmoH.

molwI': 'Iv lo'laH law', latlhvam lo'laH puS: jonwI', QumpIn,
chamwI' joq?

latlh: yIH je'wI''e'. yIH roghvaH vu' 'e' lo'laH ghaH'e'.

molwI': MI'ong 'e' vInuSHa', majQa'. yIH je'wI''e' vInuSHa'. 'a
nuqmo' vInuSHa'. yIH ghung je'. Nol Naje'laHMe'chugh, nol Natu'.
'a Soj NamechmeH yIH Nalo'laHMe'. *tlherevore* yIH roghvaH
tInmo' MIMechjaj. yIjangqa', Ha'.

latlh: 'Iv lo'laH law', latlhvam lo'laH puS: jonwI', QumpIn,
chamwI' joq?

molwI': HISlaH, HIjangpu' 'ej yIvergh.

latlh: Hu'tegh, NaH jIjanglaH.

molwI': Ha'.

latlh: MaQa', jIjanglaHMe'.

['el *Hamlet* *Horey'So* je, HoptaHvIS]

molwI': yaMlIj yIngepMe', qoq MuN NaraNmeH je MuQ HIch net
lo'laHMe'mo'. tlhoMMogh tlheghvam NatlhoMlu'meH NaQoyqa'moHlu'NI'
"molwI''e'" yIjatlh. San puyjaq SIQ juH chenmoHMogh. ruch,
yavnganNaq yIjaH. jIHvaN ghargh 'Iw puMmeH yIra'.

[mej latlh; mol HaghmoHwI' 'ej bom]
	
	jIQuptaHvIS muSoN
	Melna', vay' vImuSHa'NI'.
	jIchepmeH --- Ha' --- poH --- Hu'tegh --- vItoN,
	'e' poQlaw' pagh, ghoM ra'NI'.

Ham: malja' Qu' ta'taHvIS QorghHa'qu'law''a' ghotvam'e', bommo'
moltaHvIS.

Hor: Qorghchu'meH ghopDaj ruQHa'moHlaH molbogh DujDaj'e'.

Ham: qarbej. Qu' Qorghqu'nIS laH Soy''e' tambogh Duj.

molwI': [bom]
	'ach ro'NajNaq mujonpu'
	Mov qu'. mujonNI' MIvlaw'.
	yav MIrqu'Naq mulonpu',
	'ej Men jIQup 'e' jIvlaw'.

Ham: jat ngaSpu' Homvetlh, 'ej ben bomlaH. va Dochqu' petaQ, Doch
pummoHDI', *molor*Hey pIgh pumlaw'taHvIS. yabvaH'e' ghajpu'bogh
HeSwI''a' chaq DaH Sev je Qovpatlhvam. chaq yejquv junqang qar'a'
HeSwI''a'vetlh.

Hor: chaq HIja', joHwI'.

Ham: chaq 'oH ghajpu' boQ: jatlhlaHpu', "qavan, joH webHa'.
pIvtaHghach 'oH nuq'e', joH quv?" chaq joHwI' pong vay' ghaH, 'ej
joHDaj pong vay' Qogh'e' naDqu', Qochbogh vuD QubtaHvIS je, chaq
qar'a'?

Hor: HISlaH, joHwI'.

Ham: toH qarba'! 'a DaH Su', ghaH yIvqang ghew yo' 'aj, Dej woS,
'ej lamDaq nachmey pIgh DuD molwI' luch. naDev jaS Qeq San pu'
net tu', bortaS QaQqu' jabtaHbogh San nuH'e' DItu'laHchugh.
HomDu' DaH QujmeH neH, ben tlholHa'choHpu''a' bIH? vIqeltaHvIS
'oy'qu' HomDu'wIj'e'.

molwI': [bom]
	wa' lamnge'wI', wa' naghghorwI',
	lomSut je MIH jan'e'.
	'ej lamNaq NIS vIchenmoHNI',
	vaj yonnIS mol ngan'e'.

[nach Hom woD]
	
Ham: toH latlh. chaq bo'DIj meqwI' nach Hom 'oH qar'a'? DaHjaj
nuqDaq bIH pojbogh 'ej ponbogh mu'Daj'e', yojDaj'e', chaw'Daj'e',
meqDaj'e' je. DaH pIpDegh qIptaH lamluch qatlh 'e' SIQ ghaH,
qIpmeH meq mub QIjbe'taHvIS vIDwI'. va, qaStaHvIS yInbovDaj chaq
malja' gharwI''a' ghaH, ngIpHa'moHbogh 'ej nojHa'moHbogh woQ,
vu'meH, qummeH, 'ej loHmeH chaw' je ghajtaHvIS. naDev ngIpmoHbogh
'ej nojmoHbogh woQ nej, lamDaq nujvo' nIj 'e' najmo'. HuqtaHghach
vu' 'e' chaw'lu'meH 'um ghaH DaH 'e' lu'olQo''a' 'ummoHwI'Daj'e',
'ummoHbogh cha'rIp'e' je, jochlaHbe'mo' chopDI' pe'vIl Sutlhbogh
'ej tlhongbogh mu'meyDaj. yoS malja' ta ngaSlaHbe'mo' DISvam, vaj
je'wI' QavvaD chuvbe'nIS yoSDaj naQ, Ha' qar'a'?

Hor: yoSDaq chuvbe' je wa' naghHom, joHwI'.

Ham: malja' Huqlu'meH tera'ngan De'wI' lulo'lu' qar'a'?

Hor: HISlaH, joHwI', verengan De'wI' je.

Ham: tera'nganbatlh verenganbatlh je ghaj De'wI' luvoqbogh
nuv'e'. ghotvamvaD jIjatlh.--- molvam ghaj 'Iv, qaHHom?

molwI': vIghaj, qaH.
	'ej lamNaq NIS vIchenmoHNI',
	vaj yonnIS mol ngan'e'.

Ham: Daghajbej, SoHvaD lulIghHom 'oHmo'.

molwI': ghoMe', NIS 'oH neH. lulIghlaHMe' Hom. vIghaj 'ach 'oHNaq
jIMa'Me'.

Ham: chonISbej, Duma' 'e' DaDISQo'mo'. pa' bIQamlaHbe'. vaj
bIpum.

molwI': QamMe' pumlIj. chojun 'a MIchunMe'.

Ham: loD 'IvvaD DamollI'?

molwI': loNvaN vImolMe'.

Ham: toH, be' 'IvvaD?

molwI': Me'vaN vImolMe' je.

Ham: pa' 'Iv Damol?

molwI': Me' ghaHpu', qaH. 'a qeylIS ghomjaj, Heghmo'.

Ham: reH mu' Donqu' Qovpatlh, yajtaHvIS. machIjnISchu', QIch
wIQoDtaHvIS. jaS Deghmeymaj Qotlh DuDchuqlaw'taHbogh rI'Se'
ngoqmaj. qeng HoS, *Horey'So*, qaStaHvIS wej benvam vItu'taH:
'Itlhqu'mo' nugh, chuQun toy'wI' quvDaq Sumqu'mo' tlha'bogh
rewbe' motlh, qam'o'Daq yaDbutlh ngoH.--- ghorgh molwI'
Damoj?

molwI': NIS jajmey Hochvo', vImoj *vortIMraS* jeyNI' che'pu'Mogh
ta' *Hamlet*ma'.

Ham: ghorgh qaS wanI'vetlh?

molwI': 'e' NajanglaHMe''a'? 'e' janglaH qoH Hoch. quq wanI'vetlh
wanI'vam je: Mogh *Hamlet* Qup --- NaHjaj maw'moHlu'pu'Mogh 'ej
tera'Naq ngeHlu'pu'Mogh.

Ham: HISlaH, vIt, qatlh tera'Daq ghaH ngeHlu'?

molwI': maw'mo'. pa' mISNaj SuqHa'qa'. SuqHa'Me'chugh pa' ram
ghu'.

Ham: qatlh?

molwI': pa' ghaHNaq mIS lutu'Me', mISmo' je Sung.

Ham: maw'moH nuq?

molwI': Hujqu' maw'moHwI'Naj net joS.

Ham: chay' Huj?

molwI': Su', yaHlaw' yaM.

Ham: meq nuq?

molwI': Su', naNev Qo'noSNaq molghomvam Meq jIH neH. wejmaH NIS
mol vIQan, jIqanNI' 'ej jIQupNI'.

Ham: qaStaHvIS DIS 'ar wutlhDaq QottaH lom, wej nontaHvIS.

molwI': Heghpa' nonMe'chugh --- toH, law'qu' roplom'e'
NItlhapnISMogh --- wej non, qaStaHvIS chorgh Hut ghap NIS.
qaStaHvIS Hutna' wej non SurghwI'.

Ham: qatlh poHDaj nI' law', latlh poH nI' puS?

molwI': toH, malja' Qu'Najmo' letchu'mo' NIrNaj, HurNajNaq MIQ
pol, qaStaHvIS poH nI'. reH Quch HaM lom nonmoHqu' MIQ. toH nach
Hom 'oH: wutlhNaq 'oHtaH Homvam, qaStaHvIS cha'maH wej NIS.

Ham: ghajpu' 'Iv?

molwI': ghajpu' Quch HaM ghot Nogh. ghajpu' 'Iv 'e' yIloy.

Ham: Qo', 'e' vISovbe'.

molwI': naSjaj yIntagh Nogh yIvqangMogh ghewmey. ben HIvje''a'
teMHa'meH nachwIjNaq puMtaHMogh gharghHIq chagh. nach Homvam'e'
ghajpu' *yorIq*, ta' HaghmoHwI'.

Ham: Dochvam'e'?

molwI': Nochvetlh'e'.

Ham: HItu'moH. [nach Hom tlhap] va Do'Ha' *yorIq*. yIntaHvIS
vISov, *Horey'So*. HaghmoH not 'e' mevqang. tIvmoH reH 'e' tob.
wa'SanIDlogh DubDaj vIlIgh 'ej DaH qech qIch najbogh yabwIj.
vIqawDI' poqwIj laQ. naDev HuS woS'e' pIj vIchopbogh ---
"pIj"vetlh vItoghlaHbe'. DaH nuqDaq bIH jIpHommeylIj tlhaQ'e'?
QujlIj'e', QoQlIj'e', pay' meb Hoch HaghmoHtaHbogh lutlIj
tlhaQ'e' je DaH tIvlaH 'Iv? bIHagh DaH 'e' vaq qar'a' paghna'?
Dej'a' woS? DaH be'oywI' quv pa'Daq yIjaH 'ej yIja',
bI'IH'eghmoHmeH wa'SaD Haq DaSIQchugh, rurchuq qabDu'maj 'e'
DabotlaHbe'mo'. HaghmeH yIja'. vay' HISovmoH, *Horey'So*.

Hor: nuq DaSovrup, joHwI'?

Ham: wutlhDaq pIghvam rur qeylIS pIgh 'e' DaHar'a'?

Hor: rurbej.

Ham: pIwvam rur'a' je pIwDaj. QI'yaH. [nach Hom woD]

Hor: HIja', He'So'bej.

Ham: lo'mey ramqu'Daq macheghlaH, *Horey'So*. HIq HIvje''a'
SoQmoHchu'bogh lamHom'e' qeylIS lom Dunvo' ghochlaH qar'a'
najbogh yab?

Hor: Dalach 'e' vItu', ghu'vetlh vIqelDI'.

Ham: ghobe', vIt, vIlachbe'chu'. 'a ghaH ghochmeH, San DuH
lachbe'taHvIS 'ej yojmey qItqu' neH buStaHvIS, vaj qaS: Hegh
qeylIS, wutlh ghoS qeylIS, tlholqa' qeylIS Hap, lam 'oH Hap
tlhol'e', SoQmeH HIvje''a' lam lo'lu', 'ej HIq polmeH chom,
lam'e' (bong mojpu'bogh qeylIS) lo', chaq qar'a'.

	lom mojDI' qeylIS, lam moj je voDleH.
	SuS waQmeH, pa'Dop DISHom ghoDlaH neH.
	nunuQ bov bIr 'e' botmeH vaj nuboQ
	'e' laj ben qo'maj HajmoHbogh lamtlhoQ.

'a tam! 'eH, tam! yInech. DaH chollI' ta'.

['el lalDan'utlhpu' latlh je, SaghmeH yIttaHvIS. tlha' *'ovelya* lom, 
*layerteS*, nolwI'pu' je. tlha' ta', ta'be', toy'wI'pu' je]

Ham: ta'be'! toy'wI'pu' je! 'Iv tlha'lI' Hoch?
'ej tayDaj nupqu'lu'. vaj pIHmoH ghu'vam:
quvHa'law' lomvetlh ghop lutlha'lI'bogh,
yInDaj polHa'mo', Heghvetlh raDpa' batlh.
'ej chuQunghotHey ghaHpu'. loQ maba'jaj.
naDev maqImlI'jaj.

['o'Daq ghoS *Hamlet* *Horey'So* je]

la: DaH tlha' tay nuq?

Ham:                   *layerteS* ghaH. loD quvqu'.
yIqIm.

la: DaH tlha' tay nuq?

lalDan'utlh 1: nolDaj wInI'moHmeH, chaw'maj wIpabta'.
nub HeghDaj'e'. 'ej lalDantIgh ngepbe'chugh
nura'pu'bogh DunwI', vaj yav quvHa'Daq
QotnISbej porgh, ghIpDIjpa' ghe''orpIn.
ghaHDaq vanbommey DIjachbe'nISpu'.
'ej naghmey, DI je, veQ je baHnISlu'.
'a ghaHvaD nuH luqenglu' DaH net chaw';
'ej ghItlh wIlanpu'; 'ej tlhogh Qav wIqaSmoH;
'ej jaq chuS'ugh, noltay je.

la:                           chay'? Hat'a' latlh?

lalDan'utlh 1: Hatjaj jay'! lommey tay wIwebmoHbej,
mInDu'DajDaq majachchugh, 'ej yo' qIjDaq
pe'vIl Heghbogh vajpu''e' tlha'chugh ghaH.

la: yavDaq yIlan. 'ej porghDaj 'IHqu' chunvo'
boghjaj DuStImey! 'utlhqoq qej, qajatlh:
yo' qIjDaq boQbogh qa''a' moj be'nI'wI',
Dujoy'taHvIS veqlargh.

Ham:                   *'ovelya*! chay'!

tb: 'IHwI'na'vaD 'IHwI'Hommey. Qapla'! [vanmeH tImey ghomHa'moH]
*Hamlet*wI' be'nal SoHchoH reH vIneH.
be' 'IH, bInayDI', tlhogh QongDaqrajDaq
tImey vIchaghrupmoH. 'a nolDaq chagh
not 'e' vIpIH.

la:            baQa'! SuH, wejlogh qIch,
wa'maHlogh wejlogh nachvetlh webDaq pumjaj
qIch, yablIj valqu' nge'mo' chavDaj mIghqu'!
loQ lam yImIm. DeSDu'wIjDaq vIvanqa'. [mol bIngDaq Sup]
SIbI' yInwI'Daq lomDaq je yav lam
yIghommoH. Daqvam beQDaq chenjaj HuD.
*peDSoS* HuD ngo'qu', qa'HuD'a' chalnach je
juSjaj 'oH jay'!

['etDaq yIt *Hamlet*]

Ham:               Ha', 'IQtaHghach lach 'Iv? 
lengtaHbogh yuQmey yay'moH 'Iv SoQ 'It?
'ej 'Iv ghogh 'IjmeH yev bIH, merDI' ghoghvetlh?
Qo'noSngan *Hamlet* jIH.

[mol bIngDaq Sup]

la:                       Dughupjaj ghe''or!

[Sol chaH]

Ham: QaQbe'law' QIch Dajatlhbogh.
'eH, HughwIjvo' nItlhDu' tIteq; qatlhob.
jIvIDqang 'ej jImoDqang 'e' vISeH.
'ach jIHDaq QoblaH vay'. vaj Hojjaj yablIj.
'eH, yaHjaj ghoplIj.

t:                   Ha' tIchev.

tb:                              SuH, *Hamlet*!
*Hamlet*!

Hoch:     joHpu'!

Hor:              joHwI' QaQ, SuH, yIjot.

[chaH chev tlhejwI'pu', 'ej molvo' DoH chaH]

Ham: baQa'! vItobmeH pe'vIl ghaH vISuvrup,
jIleghmeH vIHlaHtaHvIS mInyoDDu'wIj!

tb: va, puqoy! nuq DatobmeH?

Ham: *'ovelya* vImuSHa'. mujuSlaHbe'
loSnetlh loDnI' muSHa'ghachHom tlhoQ naQ.
'ej not mururchoH. ghaHvaD nuq Data'rup?

t: va, maw'ba' ghaH, *layerteS*.

tb: QI'yaH! 'eH, yISolQo'!

Ham: Hu'tegh! 'eH, nuq Data'rup, 'e' HI'ang.
SaQ'a'? Suv'a'? SopQo''a'? pe''egh'a'?
rughtaS tlhutlh'a'? wa' mughato' Sop'a'?
vIta'rup je. naDev bIvIngrup'a' neH?
choqaDqang'a' neH, nolDajDaq bISupmo'?
bIyIntaHvIS DatlhejchoHmeH yImollu';
qatlhejbej. HuDmey DabuS'a' bIjaw'DI'?
maHDaq wa''uy' qelI'qam woDlu'jaj.
'ej woDDI' rIntaH, Hovmey qulDaq DungDaj
meQmoHjaj Dungmaj HuD. 'ej qellu'DI',
'er ghIch neH rurjaj *SISSoS*'a'. ghuy'cha'!
mu' Doj Dalo'chugh, vaj jIjach je jIH.

tb: maw'ba'. 'ej yabDaj DantaHvIS QeHmISvam,
nI'be' neH poH. tugh Qa'be' tuvqu' rurchoH,
bogh Qa'puqmeyDaj SuD 'e' tu'DI' 'oH ---
ba'taHmo' DotlhDaj tam 'ej 'av'eghmo'.

Ham: yIja', qaH. qatlh bIDoch? reH qaparHa'pu'.
'a ram. batlh mIwmaj raDchugh je veqlargh,
vaj jaS jach Qogh, 'ej jajDaj tIvnIS targh!

[mej]

t: qatlhob, *Horey'So* QaQ. 'eH, ghaH yItlha'. [mej *Horey'So*]
[*layerteS*vaD jatlh] bItul 'e' HoSmoHjaj wa'Hu' ram SoQmaj.
SIbI' ghu' naQ wItI'. 'eH, *ghertlhuD* QaQ,
puqlI'vaD mang tI'avmoH. molvamDaq
nI'qu'jaj lom wIqawtaHmeH Hegh vanmaj.
tugh qaS rep jot. 'a qaSpa', tuljaj Sanmaj.

[mej chaH]

lut 'ay' vagh.
lut 'ay'Hom cha'.
ta'qach'a' vaS.

['el *Hamlet* *Horey'So* je]

Ham: pItlh, qaH. DaH latlh yIbej. chay' qaS wanI',
'e' naQ Daqaw, qar'a'?

Hor:                   vIqawbej, joH.

Ham: tIqwIjDaq Suvlaw' vay'. jIQong 'e' bot 'oH.
jIH bItlaw' law', qammIr qama' bIt puS.
ghu' vIqelQo'DI' --- toH, rut lI' qelQo'ghach.
vInaDbej, maHvaD QaplaHchu'mo' 'oH,
lujtaHvIS nabmaj 'ong. vaj Sovlu'jaj:
nemmaj lISbogh San'e' reH tu'lu'bej,
nemvetlh qeqHa'taHvIS je qa'ma' Soy'.

Hor: DIchna' 'oH, joH.

Ham: raQpo'pa'vo' jIHu'. ngengpaH vItuQDI',
jIqat'eghpu' neH. 'ej pa' Hurghqu'taHvIS,
chaH'e' vISammeH Dat nejHa'lI' ghopwIj.
Qap Qu'wIj. ta'nobchaj vInIH. 'ej rInDI',
pa'wIj vIghoSqa'. pa'Daq jaqmo' DujwIj,
DochHa'meH mIw vIlIj, 'ej ghItlhchaj Dun'e'
vIpoSmoHmeH jIngIlchoH. 'ej *Horey'So*,
ghItlhDaq voDleH 'urmang vItu'. pa' ra' ---
nav 'IHmoHtaHvIS meqmey Sarqu' law';
'ej chepnIS Qo'noS wo' tera' DIvI' je,
jaS 'e' lubuStaHvIS; 'ej ratlhchugh yInwIj,
vaj qaS maQmIghmey Dojqu', 'e' luDelDI' ---
ra': ghItlhvetlh bejlu'DI', mImbe'jaj lenHom.
Qo', nom QIghpej rIHbe'lu'jaj je jay'.
DaH *Hamlet*'e' yImuH.

Hor:                   chay'! DuHneS'a'?

Ham: SuH, ra'bogh ghItlh yItlhap. tugh 'oH yIlaDchu'.
'a chay' jIruchchoHpu' DaH 'e' yI'Ij.

Hor: lu'. maj.

Ham: jonmeH muDech mIghwI' mIqta'Hey 'ong.
vaj yabwIjvaD vIlIHpa', lut luDachoH.
jIba'. 'ej ra'bogh ta'ghItlh chu' vI'ogh.
vIghItlhlI'meH, pIqaDmey 'IH vIlo' ---
wa'ben, che'wI'pu' vuD vIghajtaH je:
pIqaD 'IH SovDI' vay', naDHa'nISlu',
toy'wI''a' Qu' neH 'oHmo'. chIch vIlIjqang.
'a qaH, DaH ne' matlh Qu' muchavpu' laHvetlh.
nuq Hechpu' ghItlhwIj 'e' DaSovqang'a'?

Hor: HIja', joHwI'.

Ham:                tera'vaD ra'qu' ta':
"SumatlhlI'meH, rojmab boDIltaHvIS;
'ej targh Doj rurmeH maparHa'chuqghach;
'ej, quvmeH, DeghDaj'e' wej woDmeH roj;
'ej reH jupna' ngo' maHbogh nuQmeH pagh" ---
'ej DujDaj chIDmeH "meH" latlh law'qu' pongDI':
"ghItlhvam DabejDI' 'ej DaSovpu'DI',
yIghoHchoHQo', 'ej Qu' yIchovchoHQo'.
'a ghItlh qengwI'pu''e' SIbI' yImuH;
'ej, HeSchaj DISmeH chaH, pagh poH yIchaw'."

Hor: chay' navvaD woQ DaghItlh?

Ham:                            toH, SeHlI' SanwIj.
Sengvam qay'Ha'moH je 'oH. tepwIjDaq
vavwI' woQDegh vIghaj. Qo'noS Degh'e'
Do' rapchu' 'oH, wej DeghDaj choHmo' ta'.
vaj SoQmeH navwIj, nav latlh mIw vIlo'.
vIqI'. Degh ghItlh vI'uy. DaqDaq vIlan.
'ej not choH'e' luSov. toH, qaSDI' wa'leS,
vID bIQ'a' may'maj. may'vetlh tlha'pu' nuq,
Hu' 'e' DaSovchoH.

Hor: vaj rIntaH *ghIlDeSten*, qaH *roSenQatlh* je.

Ham: va, Qu'chaj ra'meH ta', luSawqanglaw'.
tIqwIjvo' Hop chaH. QIHchaj naQ luDuHmoH,
nISqangmo'. pe'vIl Hay'DI' cha' ghol HoSqu'
'etlh QeHqu', botlhDaq gho'qangchugh Qovpatlh,
vaj ghaHvaD Qob.

Hor:             baQa', quvHa'bej ta'vam!

Ham: Qu' vIpabnIS. Qoch'a'? vavwI' quv HoHpu'.
SoSwI' ngaghHa'pu'. patlh vItulpu'bogh
nISpu', ta' chu' luwIvrupDI' yejquv.
'ej yInwIj yotlhqangpu' je, tojqu'taHvIS,
muvoqqangmoHmo'. vaj tIq Say' vIghajbej,
chIch popDaj nobpu'DI', qar'a', 'etlh ghopvam.
'ej ghurmeH mIghbogh laHDaj, qo'maj ropvetlh
vISangchu'Qo'chugh, vaj jIwem, qar'a'.

Hor: 'a tugh tera'vo' ghaHvaD pawnIS De'.
'ej chay' QapHa'pu' Qu'Daj tugh 'e' Sov.

Ham: vaj "tugh" SeH ghaH. 'ach "wej" vISeHlI' jIH.
'ej "baH" neH jachmeH yapqu' wa' ghot yIn.
'a batlhjupwI', *layerteS*vaD jIberghmo',
jIQoSqu'. Qu'wIj nach vIbejchu'DI',
tugh Qu'Daj mIv vIleghchoHlaHlaw' je.
jup ghaH vIneHqu'bej. 'a mIymo', 'ItDI',
ghurqu' je DotlhwIj nongqu'.

Hor:                         SuH. chol 'Iv?

['el toy'wI' *'oSrIq*]

'oS: Qo'noSDaq SoHqa'taHneSghach wIlopjaj.

Ham: qatlho'neS, qaH. [*Horey'So*vaD] pIpyuSvam Daghov'a'?

Hor: ghobe', joHwI' QaQ.

Ham: ghu'lIj chep law', ghu'wIj chep puS; qay'mo' ghu' ghaH
ghovlu'DI'. yoSmey tIn ghaj; lIng je bIH. Ha'DIbaHmey ghom
vu'wI''a' Dachugh je wa' Ha'DIbaH'e' neH, vaj voDleH Sojpa'Daq
yaH ghaj 'oH, tugh net chaw'. Qa' ghaH, 'ach lam tIq ghaj 'e'
vIDellaH.

'oS: joH wIbHa', leSpoH DaghajneSchugh SoH quv, ta'vo' wa' Doch
SoHDaq jIja'nIS, HIchaw'jaj.

Ham: vIHev, qaH, buSchu'rupvIS qa'wIj. mIvlIj yIlo'chu'; nachDaq
'oH DaqDaj'e'.

'oS: joH quv, qatlho'; tujqu'.

Ham: ghobe', bIrqu' 'e' yIHar. chuch Sepvo' joqmoH SuS.

'oS: loQ bIrlaw'bej, joHwI'.

Ham: 'ach vuD vIwuqmeH berghqu' 'ej tuj muDDotlhvam.

'oS: HIja'bej, joHwI'. berghqu'law' --- qaSmeH 'e' mIw
vISovchu'laHbe' jIH 'ach. joHwI', mutlhob ta' batlh, SoHneS
vItlhojmoHnIS: tonSaw'lIjmo' mIymeH SuDpu' ta'. qaH, *fact of the
matter* 'oHna' De'vam'e'---

Ham: yIqaw, qatlhob. [mIv tuQqa'meH ra' *Hamlet*]

'oS: Qo', joHwI'; pIvbejwIjvaD. qaH, Hu' puS naDev ta'juHDaq
ghaHqa' *layerteS*'e' --- HIHar, Suvchu'wI' pupqu' ghaH, Dotlhmey
quv Sar ngaS, jup'a' Da 'ej po' qIp'egh nachDu'chaj tlhIngan
SuvwI' je ghaH. HIja', nong ghaHneSvaD *critique*'a'wIj
qamuchmeH, SuvwI' mem, HIDjolevDaq joq wa'DIch ghaHchu'; toH,
batlhDotlhmey law' ghajwI'meyvaD tIqDaj 'angqu' ghaH.

Ham: Delqu'ghachDaj mu'mey DapujmoHHa'be' SoH, 'ach batlhDotlhDaj
Hochna' wIbuv 'e' wanI'qoq ta'meHchu' yapbejbe' bong vIt
junlaw'wI' naDmey qu''e', yabmIw DIngtaHmoHmo' DotlhDu'HeyDaj.
tIchHa'taHghachQIchwIj DaDI' teHna''e', ghaH vIqelchu'bej:
qa'DajDaq quvmey law' lubuvlu'laH; povmo' qoj le'mo' DujDaj'e',
naDDaj vItlu'taHvIS neH, vaj quvna'qu' wojDaj lu*tranSmI'*laH nom
qabDaj gheghvo' qetqa'bogh 'otlh neH'e'. 'ej QIb neH'e' QeqHa'
'otlhbIQtIqvamDaq lIghwI', rurnIDwI' ghap.

'oS: bIQaghHa'bejqu' SoHneS, ghaH DaDelchu'meH.

Ham: Hechghach'e', qaH? SuvwI'vam quvwojvItHey HoSghaj law'bogh,
ghaH wIDechmeH mu'peQchemmaj'e' HoSghaj puSbogh, nuqmo' wIlo'taH?

'oS: nuqjatlh?

Hor: Hol pIm DayajmeH bIQapbej'a'? yInID neH.

Ham: SuvwI'vam'e' DaqelmeH Qu' DughajmoH meq nuq?

'oS: *layerteS*'e'?

Hor: [*Hamlet*vaD] lojchu' HuchDaj. QIchDaj DIlmeH mu'DeQmeyDaj
Hoch lo'pu'.

Ham: ghaH'e', qaH.

'oS: bIghuHmeH DuSovmoHba' ngoD---

Ham: paghna' ngoD vISovba', qaH. 'ach wejpuH, 'e'
Dajatlhpu'chugh, choDelmeH, vaj choquvmoHHa'ba'. taH, qaH.

'oS: bIghuHmeH ngoD DaSov: pov *layerteS*---

Ham: 'ach povba'mo' *layerteS*, 'utbe' ghuH, ghaH vI'ovQo'mo'. 'a
gholHey pov ghovchugh, ghov'egh je povwI'.

'oS: pov ghaH nuH ruQtaHvIS 'e' vIHechpu'. 'ach batlhDaj
quvmoHbogh law'wI' qellu'DI', ghaH rurlu'chu'be'.

Ham: nuHDaj nuq?

'oS: qutluch 'etlh je.

Ham: vaj cha' nuH ruQ --- 'a ram.

'oS: qaH, ghaHvaD jav toQDuj SuD ta', 'ej ta'vaD jav romuluSngan
may'morgh veSjo' je DoQHa'qang ghaH, 'e' vIqawlaw'. bIH tlhej je
luchchajvam: pu'DaH, begh, latlh je. 'ej *I'll be damned*,
luHo'lu'meH 'umbej je wej Qanghachpat'e'; nom beq toy'beH
Qanghachpat lI'qu', 'ej mIqta' 'IHchu' bIH.

Ham: nuq DapongmeH Qanghachpat Dajatlh?

Hor: QIch notlh DayajmeH 'ut bIngghItlh. 'e' vISovchoH rInpa'
SoQDaj.

'oS: begh 'oH Qanghachpat'e'.

Ham: chaq SoQvaD qar mu', yoDSut tuQlu'chugh je. 'ach qarbe'mo'
ghu'vam, begh 'oH. 'a taH! SuDmeH, jav toQDuj 'ov jav romuluSngan
may'morgh, luchchaj, wej Qanghachpat 'IHchu' je. tlhIngan jo 'ov
romuluSngan jo 'e' luSuD. qatlh Hochvam luDoQHa'qang ---
mu'lIj vIlo'meH jIvaq.

'oS: wa'maHcha'logh SuQujchuqlI'taHvIS SoH ghaH je, wejlogh SoH
DuqIppu'chugh ghaH, vaj SoHDaq *infliction*mey chelbe' ghaH,
SuDmeH 'e' loy ta'. wa'maHcha'logh QujmeH ghaH Doq law', Hutlogh
SuDmeH ta' Doq puS, 'ej SIbI' tob qoj Daj wanI', janglIj
maghajmeH 'e' chochaw'chu'bejneSchugh.

Ham: 'ej chay' qaS, "Qo'" vIjangchugh?

'oS: joHwI', SuDwI'vaD tob qoj Daj wanI', "lu'" Dajangba'DI' 'e'
vIHechpu'.

Ham: qaH, naDev vaSDaq jIyItchu'taH. berghbe'jaj ta' quv; DaH qaS
qeqpoHwIj. toy'beHDI' nuH, SuvrupDI' SuvwI', 'ej reH may'
tungbe'chugh ta', vaj ghaHvaD jIQap, laH vIghajchugh;
vIghajbe'chugh vaj jISaHbe', 'ach jItuHchoHmeH 'ej loQ jIrIQmeH
jIQap.

'oS: De'lIjvam vIQaynIS'a'?

Ham: loQ yIQay, qaH --- 'IHmoHlaw'pu'DI' QIchlIj.

'oS: reH jIvum jItoy' je, joHwI' quv vIHeQmeH.

Ham: lu', lu'. [mej *'oSrIq*] vummeH HeQDI', po' ghaH. jaS
ghaHvaD HeQ pagh.

Hor: Haw' mughato' moH, nachDaq Soy'taHvIS QuchyoD.

Ham: SoS je'wI'Du' vanchu' ghaH, choppa'. vaj reH mu' Hach lIS
neH ghaH, latlhpu''e' je QatmoHtaHbogh bov qal. nughDaq
QoD'eghtaHvIS, potlhpu' vuDmey 'etDaq mu'tlheghmeyDaj bagh, 'ej
SIghmeH luHlaH; 'a chIch tlheghmeyDaj lupochHa'lu'DI' HuSHa'.

['el jaw]

jaw: joHwI', vaSDaq ta' loStaH *Hamlet*, ja' *'oSrIq* Qup'e'
batlh ngeHpu'bogh ta'. DaH *layerteS* DaQujqang'a' pagh
Quj DamImqang'a' 'e' SovchoHmeH ngeHqa'neS ta'.

Ham: choHbe' mIw vIHechbogh; ta'vaD matlhtaH. mughomrupDI',
jeywIj ra' jeyDaj, qaSDI' tupvam tupvetlh joq, laH vIghajtaHvIS
neH.

jaw: tugh paw ta' ta'be' Hoch je.

Ham: Do', maj.

jaw: batlh *layerteS* Davanchu', Quj botaghpa', neH ta'be'.

Ham: nu'oDchu' ghaH.

[mej jaw]

Hor: Qujvam Daluj, joHwI'.

Ham: 'e' vItem. romuluSDaq tlheDpu'DI' reH jIqeqtaH; muQaHmo' Quj
pab wuqpu'bogh jIQap. jotHa'qu' tIqwIj ghu' 'e' DajuvlaHbe', 'ach
ram.

Hor: ghobe', joHwI' QaQ---

Ham: Doghlu', 'ach chaq qoH ghIjlaH Qobqoqvam'e'.

Hor: Duj yIvoqtaH. naDev paw 'e' vImev 'ej chaHvaD ropqoqlIj
vIQIj.

Ham: va Qo' jay', maQmIgh vIqImQo'. leHlI' San, pumDI' je Qa'.
DaH qaSchugh, leS qaSbe'; leS qaSbe'chugh, DaH qaS; DaH
qaSbe'chugh, leS qaS. reH Suvrup SuvwI'. leSmey'e' lonlu'bogh
Sovmo' pagh nuv, qatlh ramHa' lonlu'meH wanI'? taHQo'.

['el ta', ta'be', *layerteS*, jawpu', *'oSrIq*, toy'wI'pu' je,
'etlhmey latlh je qengtaHvIS]

t: Ha', *Hamlet*. Ha'. jIHvo' ghop'e' yItlhap.

[*Hamlet* ghopDaq *layerteS* ghop lan ta']

Ham: bortaS yIqIlneS, qaH. qaQIH jIH rIntaH.
'ach QIH yIlIj, SuvwI' DaDarupmo'.
ghu'vam luSov yejquv. Da'Ijlaw'pu' je:
muSengtaH DotlhwIj maw''e'. pe'vIl qa'lI',
batlhlIj je, noDqangghach je vemmoHbogh
Hoch'e' vIvangbogh qaSmoH rIntaH DotlhwIj
maw''e'. SuH, 'e' vImaq.
*layerteS* QIHlaH'a' yaS *Hamlet*? not.
*Hamlet*vo' yaHchugh *Hamlet*, 'ej *layerteS*
QIHchugh ghaH, *Hamlet*na' ghaHbe'taHvIS,
vaj QIH vangbe'pu' *Hamlet*. tembej *Hamlet*.
toH vangpu' 'Iv? Dotlh maw''e'. teHchugh ngoDvam,
bortaS SuqwI'ghom'e' vaj jeS je *Hamlet*.
*Hamlet* Do'Ha'vaD jegh Da DotlhDaj maw''e'.
qaH, SaHtaHvIS yejquv,
chIch chavvam mIgh vIvangpu' 'e' vItemmo',
pung 'angbogh yablIjvaD jIchunqu'jaj.
vaj juHDaj DungDaq pu' baHHa'chugh vay',
'ej bong loDnI'Daj rIQmoHchugh ghaH, vaj 
ghaH DIvjaj law', jIH DIvjaj puS.

la:                                yon tIqwIj.
'ej jIHvaD ghu'vammo' bortaS tungHa'nIS
tIq Duj. 'ach batlhwIj Dotlh vIqelnISmo',
SoHvo' jIHopnIS. boqlIj vIjeSQo' je ---
lambe'meH pongwIj batlh, wej jIHvaD vuDchaj, 
rojmab nubwI'na' joq lunobtaHvIS 
quppu'. 'ej qupvam batlh Honbe'nIS Hoch.
wej qaSDI' poHvetlh, batlh muSHa'ghach 'oHmeH,
muSHa'ghachlIj vIlaj, 'ej vInoDQo'.

Ham: vIneHqu': neHtaHghachlIj'e' vInaD.
'ej jIyuDHa'qang, jup HuchQujvam'e'
wIruchtaHvIS. Ha', maHvaD 'etlh tInob.
Ha', 'etlhmey.

la:             'etlh vItobnIS. wa' HInob.

Ham: chojeymeH, 'etlhlIj jey qa'ang, *layerteS*.
jItlhIbmo', tugh ramna' Hov wov rur laHlIj:
povmo' tugh bochbej 'oH.

la:                      chovaqlaw', qaH.

Ham: ghobe', qaH. ghop vI'IpmoH.

t: 'eH, *oSrIq*, chaHvaD 'etlhHommey tInob.
qorDu'ghot *Hamlet*, SoHvaD jo vISuDpu'.
jo DaSov'a'?

Ham:         HIja', vISovchu'neS.
lujwI' DangaqmeH jo DaSuDlaw'neS.

t: jIQoch. ben Suvbogh cha'ra' laH vIbejpu'.
'a Dubpu' ghaH. vaj SoHvaD Quj vImaSmoH.

la: Qo'. 'ughqu' 'etlhvam. jIHvaD latlh yI'ang.

Ham: mubelmoH 'etlhvam. tIqmeH rapchuq'a'? [QujmeH qeq chaH]

'oS: HIja', joH QaQ.

t: yaHvetlhDaq HIq HIvje' tIlan. peqIm:
Qapla' wa', cha' ghap Suqchugh *Hamlet*, qIpDI';
pagh wejDIch Suqchugh, jeyDaj cha'DIch noDDI' ---
vaj bachjaj may'morgh Hoch. 'ej *Hamlet* vanmeH,
HIqvam tlhutlh ta'. HIvje'Daq qut vIchaghmoH.
tlho'qut tIn law'qu', qut Hoch'e' ben ngaSbogh
loS Qo'noS ta'pu' Qav patlhmIv tIn puS.
HIvje' tInob. chuS'ughvaD jachjaj DIr.
bachwI'vaD jachjaj je chuS'ugh. 'ej chalvaD
jachjaj je pu'beH. yuQvaD jachjaj chal:
"DaH *Hamlet* vanmeH tlhutlhlI' ta'". peruch.
Ha'. 'ej noHwI'pu', HojlI'jaj mInDu'raj.

Ham: Ha', qaH.

la:            Ha', joH. [Quj chaH]

Ham:                     Qap!

la:                           Qo'!

Ham:                               noH!

'oS:                                    maj. ghaH mupta'.
ghaH mupbejta'.

la:             toH. SuH, maHay'qa'jaj.

t: wej. HIq HInob. SuH, *Hamlet*, qutlIj 'oH.
Qapla' yIghaj. ghaHvaD HIvje' yInob.

[chuS chuS'ugh. 'o'Daq bachlu']

Ham: Qo', joH. 'ay' cha' vIrInmoHqang, jItlhutlhpa'.
loSjaj. Ha'. [Qujqa' chaH] Qap! qamupqa'. nuq DaHar?

la: choqIp. choqIp. vIchID.

t: tugh Qap puqma'.

tb:                  va, ror 'ej tlhovchoH ghaH.
*Hamlet*, SutDI yItlhap. SuH, Huy' yIQaDmoH.
bIDo'meH tlhutlhlI' je ta'be'nal, *Hamlet*.

Ham: majQa', joH.

t:                *ghertlhuD*, yItlhutlhQo'.

tb: jItlhutlh, joHwI'. Do' jIHvaD yInoDQo'.

t: [pegh'egh] tarwIj HIvje' 'oH. QI'yaH. paSbej Hoch.

Ham: jItlhutlhmeH jIngIlQo', joH. tugh vItlhutlh.

tb: Ha', qab qaQaDmoHjaj.

la: joH, tugh vIqIpbej rIntaH.

t:                             'e' vIHon.

la: [pegh'egh] 'a ghobwIj SujchoHlaw' wanI' wInabbogh.

Ham: *layerteS*, Ha'! may' wej wIruchjaj jay'!
bIHoblaw' neH. bIHIvtaHvIS yIralchoH.
choHay'taHvIS, puq tlhIb jIH 'e' DaHarlaw'.

la: qar'a'? Ha'. [Quj chaH]

'oS: Qapbe' cha' ghol.

la: DaH ruv vISuq!

[*Hamlet* rIQmoH *layerteS*. SoltaHvIS, 'etlh mech chaH. *layerteS* rIQmoH
*Hamlet*]

t:                 tIwav! tIwav! DaH QeHchoH.

Ham: Qo'! HIvqa'!

'oS:              mev! 'eH, pa' ta'be' yIQorgh!

Hor: cha' DopmeyDaq chagh 'Iw. chay' SoH, joH QaQ?

'oS: chay' SoH, *layerteS*?

la: qoHQa' vIDa, 'ej bong jIjon'eghpu'.
muHoH 'urmangwIj may.

Ham: ta'be' Dotlh nuq?

t:                     vulchoHba', rIQmo' chaH.

tb: Qo'. Qo'. HIq! HIq! va, *Hamlet*, tIqwIj puq!
HIq! HIq! muHoHpu' tar! [Hegh]

Ham: Qu'vatlh! ta' mIghqu'! 'eH, lojmIt yISoQmoH!
'urmang! 'eH, 'oH yISam! [pum *layerteS*]

la: naDev 'oH, *Hamlet*. *Hamlet* quv, DaHoHlu'.
DaH SoHvaD lo'laH 'u'vam naQ pagh Hergh.
bIyInmeH SoHvaD ratlh rep bIDHom neH.
bong ghoplIjDaq 'urmang chavwI' Daghaj.
jej 'etlh, 'ej tarDaq chaghmoH. chegh nab mIgh,
'ej DaH mumuppu' 'oH. naDev jIQot,
'ej not jIHu'qa'bej. tar tlhutlh SoSlI'.
pagh latlh vIja'laH. pIch ghaj ta'. ghaj ta'.

Ham: 'etlhDaq tar lanlu' jay'! 
vaj tar, DaH rInjaj Qu'lIj.

[ta' DuQ]

'oS, jawpu' je: 'urmang! 'urmang!

ta': HIHub, juppu'wI'. DaH jIrIQchoH neH.

Ham: 'eH, wembogh, chotbogh Qo'noS pIn quvHa'.
tarvam yItlhutlhchu'. tlho'qoq DaSam'a'?
SoSwI' yItlha'.

[Hegh ta']

la:              majQa'. ruv Suqpu' ghaH.
tar qeqta' ghaH. 'a DaH manoDchuqQo'jaj,
*Hamlet*. vavwI' HoH, HoHwIj je pIch Hoch
vIqIl. 'ej HoHlIj pIch yIqIlneS je.

[Hegh]

Ham: DuchunmoHjaj yo' qIj! SIbI' qatlha'.
*Horey'So*, tugh jIHegh. ta'be' Do'Ha',
Qapla'. SuH, lotvam bejvIpbogh ghot'e',
SuH, lut DawI'pu' tam, 'IjwI'pu' joq:
ratlhchugh neH poH --- va, moDlaw' qoptaHvIS
Sogh bergh, Heghqa' --- vaj tugh Saja'laHbej ---
'a ram. jIHegh, *Horey'So*. wej bIHegh.
jIHvaD yIja', 'ej batlhwIj Honchugh vay',
vaj chaHvaD 'oH yItI'.

Hor:                   Qo', vIta'Qo'.
tlhIngan jIHQo'. romuluSngan vIDarup.
wej lojlaw' HIqvam.

Ham:                Qu'vatlh, batlh Daghajchugh,
HIvje' HInob. ghop teq! baQa' vIjonbej.
Hu'tegh. wanI'mey teH luSovlu'be'mo',
tugh rIQbej pongwIj batlh, jIHeghDI' rIntaH.
'eH, qaStaHvIS poH vay''e', choparHa'chugh,
vaj loQ neH Dotlhvetlh Do'qu'vo' yIDach,
'ej 'u'vam webDaq lutwIj naQ Daja'meH,
'oy'lI'jaj tlhuHlIj, jup.
[Daq HopDaq chuS yItmeH QoQ, 'et 'o'Daq baHlu']
                          qatlh chuS veS QoQ?

'oS: *qInSaya*vo' chegh charghbogh *vortIbraS*.
tera'Duy vanmeH baH.

Ham:                 jIHegh, *Horey'So*.
'ej qa'wI' DungDaq mIytaH tarvetlh HoS.
tera'vo' De' vI'IjlaHbe' jIyaHmo'.
'a cho'meH *vortIbraS* luwIv yejquv,
'e' pIH leSSovwIj. 'ej jIHeghtaHvIS,
cho'meH vIwIvmeH jIH jIjeS. vaj ghaHvaD
ghu' ram ghu' potlh je Hoch Daja'pu'DI',
'ej chay' Hu' mutungHa' --- DaH tamchoH Hoch. [Hegh]

Hor: DaH ghor tIq quv. Qapla', joH quv. Qapla'.
bIleSmeH DaH DuDorjaj yo' qIj Dujmey!
naDev qatlh chol chuS'ugh?

['etDaq chuS yItwI' QoQ]

['el *vortIbraS*, tera' Duypu', latlh je]

vor: nuq mIgh vIlegh jay'!

Hor:                       toH, nuq mIgh Daleghqang?
'ItmeH pagh yay'meH vay' Daleghqangchugh,
bInej vaj 'e' yImev.

vor:                 qaSpu' HoH'a',
'e' maq lomghomvam! va, bIHemba', Hegh!
molvenglIjDaq yupma' Daqeqlaw'lI'mo',
joHpu'vam law' DamupmeH quqta' lotlIj!

Duy wa': qaSbej Qugh'a'. DaHjaj naDev mapaSlaw',
tera'vo' De' wIqengDI'. De' wIja'DI',
lu'IjnIS teS. 'a DaH pagh De' lutu' bIH.
vaj Qu''e' ra'ta'bogh voDleH wIchavmoH,
'ej Heghpu' *roSenQatlh*, qaH *ghIlDeSten* je,
'e' QoylaHbe'. 'Ivvo' Qu' tlho' wISuq?

Hor: not nujDajvo' tlho' vay' boSuqbej, Duy,
lItlho'meH ghaH wej yaHpu'chugh je yInDaj.
Hegh not 'e' ra'. 'a DaH naDev Supawmo',
rInDI' 'Iwna' may' qu' --- tera'vo' tlhIH,
*qInSaya* veSmeyvo' SoH --- DaH yIra':
lubejlu'meH muchDaqmey jenDaq lomvam
lulanlu'jaj. chay' qaS wanI'vam Hoch,
wej ghu'vam Sovbogh qo'vaD 'e' vIja'jaj.
HeS'a', wem'a' je, 'Iw je ta'mey ral;
Qagh yoj je, HoH lunablu'be'bogh je;
Hegh'e' je raDpu'bogh Duj 'ong, meq ngeb je;
'ej, qaSmo' Hoch, 'oghwI'pu'chajvaD Qaw'bogh
Qu''e' ta'Ha'lu'bogh je, Hoch bo'IjlaH.
'ej Hoch vIja'laHchu'.

vor:                   SIbI' DI'Ijjaj.
'ej 'IjmeH chuQunghot potlh Hoch yIra'.
jIDo'choH batlh DaH 'e' vIlajqang jIH
jI'IQtaHvIS je. wo'vam Dun vIche'meH
DIb lulIjbe'lu'bogh vIghajtaH jIH.
'ej wo' vIDoQmeH DaH mura'law' 'ebwIj.

Hor: tugh ghu'vam De' vIja' je. De'vetlh'e'
jatlhmo' nuj potlh, vaj nujmey law'qu' jIjmoH.
'ach DaH SIbI' ghu' naQ vIja'choHjaj,
qu'taHvIS ghot yabDu'. vaj tugh qaSbe'jaj
lot latlh. DaH yapbej QuSmey, Qaghmey je.

vor: 'eH, muchDaq'a'Daq *Hamlet* quv luqengjaj
loS HoD. vaj batlh SuvwI''a'vaD tIDa.
joH *Hamlet* toblu'chugh, vaj ta'na' mojlaw'.
'ej yo' qIj 'elmeH, ghaHvaD HoSqu'jaj
mang QoQ, veS tay je.
lommey tIwoH. may'DaqDaq motlh 'Iwngengvam.
baQa', naDev 'ach joch 'ej taQqu' Sengvam.
Ha'. baHmeH negh yIra'.

[chuS lom vanbogh yItwI' QoQ'e']

[mej chaH, lommey qengtaHvIS. qaSpu'DI', vanmeH baHlu']

[rIn *Hamlet* lotlut]